تيان-شان تاۋىندا جوعالىپ كەتكەن الپينيستەردى ىزدەۋ توقتاتىلدى

قر قورعانىس مينيسترىلىگى جوعالىپ كەتكەن الپينيستەردى ىزدەۋ توقتاتىلعانىن مالىمدەدى. ويتكەنى, قازاقستاندىق قۇتقارۋشىلار جەڭىس شىڭىنا 14 رەت ۇشىپ, الپينيستەردى تابا الماعان. بۇل دەرەكتى الماتى تەلەارناسىنىڭ سايتى جاريالادى.

ال جاياۋ ىزدەۋ وپەراتسياسىن جاساۋ قار كوشكىنىنە بايلانىستى مۇمكىن ەمەس ەكەن.  

«ىزدەۋ جۇمىستارى 5100 - 6000 مەتر بيىكتىكتە جۇرگىزىلدى.  بوكتەرگە ماكسيمالدى جاقىنداۋ 70 مەتردى قۇرادى. شولۋ مەن تەپلوۆيزور ارقىلى ىزدەۋ ناتيجە بەرمەگەن. ءتىرى ادامداردىڭ دا, جانسىز مايىتتەر دە تابىلمادى. جاياۋ ىزدەۋ وپەراتسياسىن ءجۇرىزۋ مۇمكىن ەمەس, ويتكەنى قار كوشكىنى قاۋپى جوعارى»,  دەدى ىزدەۋ-قۇتقارۋ وپەراتسياسىنىڭ جەتەكشىسى ۆاسيلي پيۆتسوۆ.

ايتا كەتەيىك, الماتىلىق الپينيستەر مۇرات وتەپباەۆ, اندرەي كورنەەۆ جانە الەكساندر چەچۋلين جەڭىس شىڭىن باعىندىرۋعا كەتكەن ەدى. الايدا ولار 6600 مەتر بيىكتىكتەن تۇسە الماي, بايلانىسسىز قالعان كورىنەدى.

16 تامىزدا ولار سوڭعى رەت بايلانىسقا شىعىپ, الەكساندر چەچۋليننىڭ كوز جۇمعانىن ايتتى. مارقۇمنىڭ دەنەسى 6900 مەتر بيىكتىكتە قالدى. اندرەي مەن مۇرات تومەنگە ءتۇسۋىن جالعاستىردى. اۋا رايىن ەسكەرگەندە اتالعان باعىت بويىنشا ولار تاۋ ەتەگىنە كەمىندە ءتورت كۇننىڭ ىشىندە جەتۋى ءتيىس بولعان.

18 تامىزدا جەڭىس شىڭىنا تىكۇشاق ۇشىپ, الپينيستەردىڭ ىزدەرىن تابا الماي قايتتى.

19 تامىزدا تجم قۇتقارۋشىلارى مىنگەن تىكۇشاق كەلدى.

20 تامىزدا الپينيستەر ۆاسيلي پيۆتسوۆ پەن ماقسۇت جۇماەۆ باستاعان اسكەري بورت ىزدەۋگە شىعىپ, ەشتەڭە تاپپادى.

21 تامىزدا اۋا رايىنىڭ ناشارلىعىنان تىكۇشاق كوتەرىلمەدى.

الماتى