قازاقستان رەسپۋبليكاسى ىشكى ىستەر مينيسترلىگىنىڭ توتەنشە جاعدايلار جونىندەگى كوميتەتى ستەپنوگورسك قالاسىنداعى تاۋ-كەن كومبيناتى جانىندا دالالىق وقۋ-جاتتىعۋ جيىندارىن وتكىزدى.
جيىنعا ۇلتتىق ۇلاننىڭ رادياتسيالىق, حيميا جانە بيولوگيالىق قورعاۋ ماماندارى مەن ساربازداردان قۇرالعان 50-دەن استام ادام قاتىستى. وقۋ-جاتتىعۋ جيىندارى كەزىندە قاۋىپتى نىسانداردا ورىن الۋى مۇمكىن توتەنشە جاعدايلاردىڭ دەر كەزىندە الدىن-الۋ داعدىلارىن مەڭگەرۋ ادىستەرى قولدانىلدى. سونداي-اق قاتىسۋشىلار تەوريالىق العان بىلىمدەرىن تاجىريبەدە سىناپ كوردى. جاتتىعۋ وتكىزۋ ءۇشىن ستەپنوگورسك تاۋ-كەن كومبيناتى تاڭداپ الىندى.
– قازاقستان رەسپۋبليكاسى توتەنشە جاعدايلار جونىندەگى كوميتەتى توراعاسىنىڭ تاپسىرماسىمەن وقۋ-جاتتىعۋ جيىندارى وتكىزىلدى. بۇل جيىننىڭ وزىندىك ەرەكشەلىگى دە بار. ماسەلەن, ماماندار ناقتى رادياتسيالىق جانە حيميالىق قاۋىپ-قاتەر تونگەن شاقتا نە ىستەۋ كەرەك؟ مىنە, وسىنداي ماسەلەلەردى تاجىريبەلىك تۇرعىدا تالداپ, بۇگە-شىگەسىنە دەيىن ۇعىندىرىپ, شيراتا تۇسۋدەمىز. اپاتتىڭ ايتىپ كەلمەيتىندىگى بەلگىلى. حالقىمىز «جامان ايتپاي, جاقسى جوق» دەمەي مە,–دەيدى قر ءىىم توتەنشە جاعدايلار جونىندەگى كوميتەتى باسقارما باستىعىنىڭ ورىنباسارى قاھارمان ورازالين.
شارا بارىسىندا ماماندارعا تەحنولوگيالىق جابدىقتىڭ وندىرىستىك تسيكلىن جۇرگىزۋ كەزىندە دايىن ءونىم ىدىسىنىڭ گەرمەتيزاتسيالانۋى ناتيجەسىندە تۋىنداعان رادياتسيالىق ساۋلەلەردەن تۋىندايتىن قاۋىپتىڭ سالدارىن جويۋ تاپسىرىلدى. قاتىسۋشىلار وزدەرىنە قويىلعان مىندەتتى مۇقيات ورىنداپ شىقتى. مۇنداي ماڭىزداعى وقۋ-جاتتىعۋ جيىنى وبلىستا تۇڭعىش رەت وتكىزىلدى.
اقمولا وبلىسى