ورال قالاسىنداعى نازارباەۆ زياتكەرلىك مەكتەبىنىڭ تۇلەكتەرى مەن وقۋشىلارى تاماقتانۋ ورىندارىنا ارنالعان جاڭا تولەم جۇيەسىن جاساپ شىقتى. «Pie Pay» بويىنشا تۇتىنۋشى مەكەمە ۇسىنعان ارنايى pاۋ كارتا ارقىلى تولەم جاساي الادى.
جوبا جەتەكشىسى – اقش-تاعى ۆيردجينيا ۋنيسەرسيتەتىنىڭ ستۋدەنتى, ورالداعى زياتكەرلىك مەكتەپتىڭ 2018 جىلعى تۇلەگى شىمبولات تىناليەۆ. تالاپتى ورەن وقۋشى كەزىنەن-اق كوزگە ءتۇسىپ, مەكتەپ بىتىرگەن كەزدە بىردەن جەتى ۋنيۆەرسيتەتتىڭ ءبىلىم گرانتىن جەڭىپ العان ەدى. ونىڭ بەسەۋى امەريكانىڭ اتىنان ات ۇركەتىن ىرگەلى جوعارى وقۋ ورىندارى بولسا, التىنشىسى – فينليانديانىڭ اتاقتى التا ۋنيۆەرسيتەتى, جەتىنشىسى – استانا قالاسىنداعى نازارباەۆ زياتكەرلىك ۋنيۆەرسيتەتى. ۆيردجينيا ۋنيسەرسيتەتىن تاڭداعان شىمبولات امەريكادا وقىپ ءجۇرىپ فينليانديا, تۇركيادا ءبىلىم الىپ جاتقان مەكتەپ تۇلەكتەرى مەن وقۋشىلاردىڭ باسىن قوسىپتى.
– شەت ەلدە زياتكەرلىك مەكتەپ تۇلەكتەرى, جالپى قازاقستاندىق جاستار ماعان كوپ كومەكتەستى. ءبىزدىڭ شەتەلدە جيناقتاعان تاجىريبەمىز بەن ەلدەگى وقۋشىلاردىڭ ءبىلىمى قوسىلىپ, جاڭا جوبانى جاساپ شىقتىق, – دەيدى شىمبولات تىناليەۆ.
كوماندا مۇشەلەرى ورتاق يدەيا جولىندا ۇيىمشىلدىقپەن ءىس اتقارىپتى. ءبىرى باعدارلاما جاساسا, ەكىنشىسى – ديزاينىن, ەندى ءبىرى – قارجىلىق ماسەلەلەردى رەتتەگەن. ماركەتينگ, ۇيىمداستىرۋ جۇمىستارىنا جاۋاپتى ادام دا بار.
جوبا اۆتورلارىنىڭ ايتۋىنشا, جاڭا تولەم جۇيەسى ۋاقىت ۇنەمدەيدى, تاپسىرىستى جەدەلدەتەدى. سونىمەن قاتار جەكە مالىمەتتەر قاجەت بولماعاندىقتان, تۇتىنۋشى قاۋىپسىزدىگى قامتاماسىز ەتىلەدى. قازىر ينۆەستورلارمەن كەلىسسوز ءجۇرىپ جاتىر ەكەن. كوپ ۇزاماي الماتى قوعامدىق تاماقتانۋ ورىندارىندا سىناقتان وتپەك.
– ءبىز بۇل جوبادان وزىمىزگە كوپ تاجىريبە جينادىق. سەبەبى ستارتاپتى باستاۋ, ءونىمدى ۇسىنۋ جولدارى, كومپانيالارمەن قارىم-قاتىناس سياقتى تاجىريبە جيناقتاپ جاتىرمىز, دەيدى ورالداعى زياتكەرلىك مەكتەپتىڭ 11-سىنىپ وقۋشىسى دانيار جارقىن ۇلى.
مەكتەپ تۇلەكتەرىنىڭ وسىنداي باستامالارى وقۋشىلارعا دا قانات بىتىرگەن سىڭايلى. قازىر ولار دا مەكتەپ يگىلىگى ءۇشىن بىرقاتار جوبانى قولعا العان. دانياردىڭ سوزىنشە, قازىر وقۋشىلارعا ارنالعان دەربەس سايت جاسالۋدا. سونىمەن قاتار وبلىس مەكتەپتەرى وقۋشىلارىنىڭ قاتىسۋىمەن ءتۇرلى جارىس ۇيىمداستىرۋ جوسپارلانىپ جاتىر ەكەن.
باتىس قازاقستان