بۋراباي باۋرايىندا تۇڭعىش پرەزيدەنت – ەلباسى قورىنىڭ ۇيىمداستىرۋىمەن III حالىقارالىق «Burabay Forum: قازاقستاننىڭ حالىقارالىق ىنتىماقتاستىعى» جاس عالىمدار حالىقارالىق فورۋمى وتۋدە.
6 تامىزدا نۇر-سۇلتان قالاسىنداعى نازارباەۆ ورتالىعىندا اشىلعان فورۋم جۇمىسىنا ەلىمىزدىڭ, سونىمەن قاتار ارمەنيا, بەلورۋسسيا, ۆەنگريا, قىتاي, قىرعىزستان, ليتۆا, رەسەي, تاجىكستان, تۇركيا, وزبەكستان, ۋكراينا جانە فرانتسيانىڭ جاس عالىمدارى قاتىسىپ, يننوۆاتسيالىق تەحنولوگيالار, عىلىمنىڭ دامۋى, جاس عالىمدارعا جوبالارىن ىسكە اسىرۋعا قالاي كومەكتەسۋگە بولاتىنى جونىندە پىكىر الماسۋدا. وسى ورايدا الماتى قالاسىنان كەلگەن جاس عالىم نۇرلان وسپانوۆ ءوز پىكىرىن تاراتىپ ايتىپ بەردى.
– وسىنداي فورۋمدار جاس عالىمدارعا پىكىر الماسۋعا زور مۇمكىندىك بەرەدى. قازاقستاننىڭ عانا ەمەس, شەتەلدەردىڭ دە زەرتتەۋشى عالىمدارىمەن وي ءبولىسىپ, عىلىم سالاسىنداعى تۇيتكىلدى ماسەلەلەردى, تىڭ تاقىرىپتاردى تالقىلاپ جاتىرمىز. عىلىممەن اينالىسقانىما سەگىز جىل بولدى. قازىرگى تاڭدا ۇلى دالا ەلى مەن شىعىس ەلدەرى اراسىنداعى ەرتەدەگى بايلانىستاردى زەرتتەپ ءجۇرمىن. وسى ماقساتتا وڭتۇستىك كورەيا مەملەكەتىنە بارىپ, كورەي تىلىندەگى ءبىراز قۇندى دەرەكتەردى زەرتتەۋ جۇمىسىما پايدالاندىم, – دەدى الماتىلىق جاس عالىم. ال ارمەنيا مەملەكەتىنەن فورۋمعا ارنايى كەلگەن جاس عالىم گەۆورگ ۆاردانيان شارانى ۇيىمداستىرعان ەلباسى قورىنا زور ريزاشىلىعىن جەتكىزدى.
ەلوردادان باستاۋ العان بۋرابايداعى باسقوسۋدا عىلىمنىڭ ءارتۇرلى باعىتتارى بويىنشا سەكتسيالىق وتىرىستار جانە ديسكۋسسيالىق الاڭدار ۇيىمداستىرىلۋدا.
شارا مودەراتورى – تۇڭعىش پرەزيدەنت – ەلباسى قورى اتقارۋشى ديرەكتورىنىڭ ورىنباسارى يگور روگوۆ بۇل اۋقىمدى جوبا ىسكە اسىرىلعاننان بەرى ءۇش جىلدىڭ ىشىندە قازاقستاننىڭ جانە جاقىن شەتەلدەگى وقۋ ورىندارىنىڭ اراسىنداعى ىسكەرلىك قارىم-قاتىناس كەڭەيگەنىن اتاپ ءوتتى. ءىس-شارانىڭ اياسىندا جاس عالىمداردىڭ ارىپتەستىگى بىرلەسكەن عىلىمي زەرتتەۋلەر جۇرگىزۋگە ىقپال ەتۋدە.
فورۋم جۇمىسى «جاڭا فۋنكتسيونالدىق ماتەريالدار جانە تەحنولوگيالار», «قازاقستان ەۋرازيانىڭ الەۋمەتتىك-ساياسي جانە تاريحي-مادەني كەڭىستىگىندە», «ماركەتينگ پەن لوگيستيكاداعى Digital-تەحنولوگيالار: «XXI عاسىرداعى اگروونەركاسىپ كەشەنى: عىلىم جانە يننوۆاتسيالار», «جۇيەلىك مەديتسينا – مەديتسينانىڭ, دەنساۋلىق ساقتاۋدىڭ جانە الەۋمەتتىك قامتاماسىز ەتۋدىڭ مۋلتيپليكاتيۆتىك دامۋى» سەكتسيالارىنا بولىنگەن.
سونداي-اق پلەنارلىق وتىرىس, دوڭگەلەك ۇستەلدەر, ترەنينگ-اڭگىمەلەسۋ, فورسايت-الاڭدار, نەتۆوركينگ-سەسسيالار, «مەنىڭ تابىس تاريحىم» ۋاجدەمەلىك كەزدەسۋلەر, ينتەراكتيۆتىك سەمينارلار, عىلىم جانە ءبىلىمنىڭ ءارتۇرلى باعىتتارىنىڭ بازالىق ترەندتەرىن ناسيحاتتاۋ بويىنشا ترەنينگتەر وتەدى.
فورۋمنىڭ جۇمىسىنا كونستيتۋتسيالىق كەڭەس توراعاسى قايرات ءمامي, ءبىلىم جانە عىلىم ءمينيسترى اسحات ايماعامبەتوۆ, يندۋستريا جانە ينفراقۇرىلىمدىق دامۋ ءمينيسترى رومان سكليار, دەنساۋلىق ساقتاۋ ءمينيسترى ەلجان ءبىرتانوۆ, اۋىل شارۋاشىلىعى ءمينيسترى ساپارحان وماروۆ, ادىلەت ءمينيسترى مارات بەكەتاەۆ, مەملەكەتتىك قىزمەت ىستەرى جونىندەگى اگەنتتىگىنىڭ ءتورايىمى انار جايىلعانوۆا قاتىسادى دەپ كۇتىلۋدە.
فورۋم جۇمىسى 9 تامىزدا اياقتالىپ, رەزوليۋتسيا قابىلدانادى.
اقمولا وبلىسى,
بۋراباي اۋدانى