7 تامىز كۇنى كەشكە كوي-تاش اۋىلىندا قىرعىز رەسپۋبليكاسىنىڭ بۇرىنعى باسشىسى المازبەك اتامباەۆتى تۇتقىنداۋ وپەراتسياسى باستالدى. 8 تامىز كۇنى ەكىنشى رەت شابۋىل جاسالدى. ەكس-پرەزيدەنت ءالى دە ۇستالمادى.
رەسمي اقپارات بويىنشا, ارنايى جاساق وكىلدەرى ا.اتامباەۆتىڭ رەزيدەنتسياسىن قورشاپ, حالىقتى جىبەرمەدى. الايدا ا.اتامباەۆتىڭ جاقتاستارى جەتەكشىسىن قورعاپ, قارۋلى كۇشتەر وكىلدەرىنە وق اتتى. ناتيجەسىندە, 52 ادام جاراقات الدى, ءبىر ارنايى جاساق قىزمەتكەرى كوز جۇمدى, 6 جاۋىنگەردى تۇتقىنعا الدى. مەملەكەتتىك ۇلتتىق قاۋىپسىزدىك كوميتەتىنىڭ باسشىسى وروزبەك وپۋمباەۆ ەكس-پرەزيدەنت جاقتاستارى كوميتەت قىزمەتكەرلەرىنەن 55 دانا قارۋ تارتىپ العانىن مالىمدەدى.
المازبەك اتامباەۆ حالىققا بەينە جولداۋىندا ارنايى جاساق وكىلدەرىنە ءوزى وق اتقانىن, حالىقتىڭ بۇعان قاتىسى بولماعانىن ايتتى. سونىمەن قاتار, بيلىكتەگىلەردىڭ بۇل ارەكەتىن باسسىزدىق دەپ ويلايتىنىن جەتكىزدى.
8 تامىزدا جوگاركۋ كەڭەشتىڭ كەزەكتەن تىس سەسسياسىندا ا.اتامباەۆتى تۇتقىنداۋ ماسەلەسى تالقىلاندى. قىرعىز رەسپۋبليكاسىنىڭ پرەزيدەنتى س.جەەنبەكوۆ «بۇل ەكى كوشباسشى اراسىنداعى قاقتىعىس ەمەس, ەلدەگى جەمقورلىقتى توقتاتۋعا نەگىزدەلگەن كۇرەس» دەگەن مالىمدەمە جاسادى. ءدال وسى وتىرىستا مەملەكەتتىك ۇلتتىق قاۋىپسىزدىك كوميتەتىنىڭ باسشىسى وروزبەك وپۋمباەۆ بۇل وقيعا قاتىستى كىناسىن مويىنداپ, مەملەكەت باسشىسىنان ءوزىن قىزمەتتەن بوساتۋدى سۇرادى. الايدا پرەزيدەنت ونىڭ ءوتىنىشىن قابىلداماي, وپەراتسيانى جالعاستىرۋ كەرەگىن ايتتى.
اkipress اگەنتتىگى 8 تامىز جەرگىلىكتى ۋاقىت بويىنشا 16:20-دا ەكس-پرەزيدەنت ءۇيىنىڭ قاسىنا 500-گە جۋىق ادام جينالىپ, بەش-كۇنگەي اۋىلىنا قاراي بەت العانىن مالىمدەدى. ال 16:23-تە ميليتسيانىڭ ەكىنشى شابۋىلدى باستاعانىن حابارلادى. ا.اتامباەۆتىڭ جاقتاسى فاريد نيازوۆ گراناتالاردىڭ لاقتىرىلعانىن ايتتى. جاپا شەككەندەر تۋرالى ازىرگە حابار جوق.