قىزىلوردادا 2003-2005 جىلدارى تۋعان جاسوسپىرىمدەر اراسىندا اسىق اتۋدان وتكەن قازاقستان چەمپيوناتىندا قاراعاندى وبلىسىنىڭ كومانداسى كۇمىس مەدالعا يە بولدى.
ۇلتتىق سپورت ويىنىنىڭ دوداسىنا اقمولا, سولتۇستىك قازاقستان, قوستاناي, جامبىل, قاراعاندى وبلىستارىنان جانە نۇر-سۇلتان, شىمكەنت قالالارىنان بارلىعى جەتى كوماندا قاتىسقان بولاتىن.
چەمپيوناتتا قاراعاندى وبلىسىنىڭ نامىسىن شەت اۋدانىنىڭ قۇرامىندا نۇرسۇلتان كاكەنوۆ, ايسۇلتان بۇعىباي جانە داۋلەت كامال سياقتى ويىنشىلار بار كومانداسى قورعادى. قولمەرگەن بالاقايلاردى باپكەر ەركەبۇلان اقىجانوۆ بىرنەشە جىلدان بەرى اقىسىز نەگىزدە جاتتىقتىرادى ەكەن.
– ءبىز ءۇشىن بۇل ۇلكەن جەتىستىك. بالالاردى جاتتىقتىرىپ جۇرگەنىمە جەتى بولدى. اۋدانىمىزدا بارلىعى جۇزگە جۋىق بالا اسىق اتۋ سپورتىمەن اۋەستەنەدى جانە وسى ۇلتتىق ويىننىڭ تانىمالدىعى جىل سايىن ارتىپ كەلەدى. ءبىز قازاقستان چەمپيوناتىنا تىڭعىلىقتى دايىندالدىق. تەك نۇر-سۇلتان كومانداسىنان عانا جەڭىلدىك. الدا ءبىزدى ءالى تالاي جەڭىستەردىڭ كۇتىپ تۇرعانىنا سەنىمدىمىن, – دەيدى كوماندا باپكەرى ەركەبۇلان اقىجانوۆ.
قاراعاندى وبلىسى