بۇگىندە ەكىباستۇز قالاسىنىڭ اكىمدىگى وزگە وڭىرلەردەن قونىس اۋدارۋشىلارعا 318 پاتەر بەرۋگە دايىن. بيىل ماۋسىم ايىندا ەلوردادان 60-قا جۋىق كوپ بالالى وتباسى كوشىپ كەلگەن-ءدى. ەندى بۇل تاجىريبە ەلىمىزدىڭ باسقا دا قالالارىندا پايدالانىلماق.
– بيىل شىلدە ايىنىڭ العاشقى كۇندەرى نۇر-سۇلتان قالاسىنان كوشىپ كەلگەن 35 وتباسىنى قارسى الدىق. بۇل «Nurly Ertis» باعدارلاماسى بويىنشا ەكىباستۇزعا قونىس اۋدارۋشىلاردىڭ جەتىنشى لەگى. قونىستانۋشىلارعا ارنالعان باعدارلاما بويىنشا وڭىرگە 137 وتباسى قونىس اۋداردى. الدىڭعى كەلگەن 103 وتباسىنىڭ 57 ادامى جۇمىسقا ورنالاستى, – دەيدى وبلىس اكىمى بولات باقاۋوۆ.
ءوندىرىستى وڭىرگە كوشىپ كەلگەن 137 وتباسىنىڭ ىشىندە 825 ەرەسەك ادام بولسا, 569-ى – بالالار. وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ مالىمەتىنشە, بۇل كۇندەرى وڭىردە 25 مىڭ جۇمىس ورنى بوس, ونىڭ ىشىندە 10 مىڭى تۇراقتى جۇمىس كوزى ەكەن. وسى رەتتە ايتا كەتەلىك, «Nurly Ertis» باعدارلاماسى ەلىمىزدە قاناتقاقتى جوبا نەگىزىندە باستالعان-دى. ويتكەنى ەكىباستۇز قالاسىندا سالىنعان تۇرعىن ۇيلەر ءوز قۇنىنا ساي ۋاقىتىندا ساتىلا قويمادى. ارينە, تەگىن جاتقان دۇنيە جوق. سوندىقتان اتالعان باعدارلاما بويىنشا قونىستانۋشىلارعا پاتەر بەرىلۋدە.
اكىمدىكتىڭ حابارىنشا, قونىس اۋدارۋشىلارعا جان-جاقتى كومەك كورسەتىلەدى. ولاردى قالاداعى جۇمىس كۇشى قاجەت كاسىپورىندارعا شاقىرىپ, جۇمىسپەن قامتاماسىز ەتپەك. ەكىباستۇزدا ءىرى جانە شاعىن كاسىپورىندار جەتەرلىك, كاسىپكەرلىك سالاسى دا جاقسى دامىعان. باسقارمانىڭ مالىمەتىنشە, كوشىپ كەلگەن وتباسىلاردىڭ بالالارى بالاباقشا مەن مەكتەپكە ورنالاستىرىلادى. اتاۋلى الەۋمەتتىك كومەك بەرۋ ءۇشىن قۇجاتتارىن ازىرلەيدى. ياعني, حالىقتىڭ ءال-اۋقاتى مەن ءومىر ءسۇرۋ ساپاسىن جاقسارتۋ بويىنشا قولداۋ شارالارى جۇزەگە اسىرىلۋدا. قونىستانۋشىلارعا الەۋمەتتىك كومەك كورسەتۋ اياسىندا جول شىعىنى وتەلەدى, پاتەردە العاشقى جىلى تەگىن تۇرادى. ودان كەيىن ءتورت جىل وتباسىلار كوممۋنالدىق قىزمەت قۇنىمەن قاتار اي سايىنعى جالعا الۋ قۇنىن تولەيدى. ماسەلەن, 3 بولمەلى پاتەرگە اي سايىن 14 مىڭ تەڭگە تولەيدى. ال 5 جىلدان سوڭ پاتەر قۇنىنىڭ قالعان قۇنىن تولەپ, اتىنا اۋدارىپ الۋعا قۇقىلى. ەگەر قاجەت ەتپەسە, جالعا الۋ شارتىن ۇزارتىپ, ءارى قاراي تۇرا بەرەدى. قازىر قونىس اۋدارۋشىلاردىڭ ءبىر بولىگى گرەس-2 ستانساسىندا, «Green نوuѕە-كاzتومات» جشس-ندە «قاراعاندى بي-ەنەردجي», موتور-ۆاگون دەپوسىندا جانە دەنساۋلىق ساقتاۋ مەن ءبىلىم بەرۋ مەكەمەلەرىندە ەڭبەك ەتۋدە. قالعان 188 ادامنىڭ 51-ءى بالا كۇتىمىنە بايلانىستى دەمالىستا بولسا, 40 قونىس اۋدارۋشىعا جۇمىسقا ورنالاسۋ ءۇشىن جولداما بەرىلگەن. ولاردىڭ اراسىندا ءبىر كارديولوگ, ەكى جالپى تاجىريبە دارىگەرى بار. وزگەلەرىن دە جۇمىسقا ورنالاستىرۋ بويىنشا جۇمىس جۇرگىزىلۋدە. جىل سوڭىنا دەيىن قونىس اۋدارۋشىلار سانىن 200 وتباسىعا جەتكىزۋ جوسپارلانىپ وتىر.
قونىس اۋدارعانداردىڭ ءبىرى رۇستەم ورازباەۆ قازىر «Greenhouse-Qaztomat» جشس جىلىجايىندا كوكونىس ءوسىرۋشى بولىپ ەڭبەك ەتەدى. «مەن بىردەن جۇمىس تاپتىم, دەيدى رۇستەم. – قازىر 5 بالام بالاباقشادان ورىن الىپ, مەكتەپكە قابىلداندى. ەكىباستۇز حالقى ءبىزدى جىلى كوڭىلمەن قارسى العانى قۋانتادى». ال ايداربەك ءمامىنوۆ ءاۋ باستا شاردارا قالاسىنان نۇر-سۇلتانعا كوشكەن ەكەن. «Nurly Ertis» باعدارلاماسىنىڭ شارتتارى ۇنادى. بۇعان دەيىن پاتەر جالداپ تۇردىق. ەندى مىنە, 3 بولمەلى پاتەر الدىق, 6 بالام مەكتەپكە, بالاباقشاعا بارادى. جۇمىس بار», دەيدى ول. قونىس اۋدارۋشىلاردىڭ بارلىعى تۇرعىلىقتى مەكەن-جاي تىركەۋىن الدى. «ەلگە ەل قوسىلسا – قۇت». جاقسىلىقپەن باستالعان باعدارلاما ۇزاعىنان بولسىن دەمەكپىز.
پاۆلودار وبلىسى