15 قىركۇيەكتە ەلوردادا TEDxAstana عىلىمي-كوپشىلىك كونفەرەنتسياسى وتەدى. بۇل تۋرالى سارسەنبى كۇنى كونفەرەنتسيا ۇيىمداستىرۋشىلارى الەۋمەتتىك جەلىلەردەگى پاراقشالارى ارقىلى حابارلادى.
«بيىلعى كونفەرەنتسيانىڭ تاقىرىبى – Under One Sun ء(بىر اسپان استىندا). بۇل تاقىرىپتى تاڭداۋىمىزدىڭ وزىندىك سەبەبى بار. سەبەبى, ءبىز ءبىر-بىرىمىزگە ۇقسامايمىز. وي-پىكىرىمىز دە ءارتۇرلى. دەگەنمەن ءبارىمىزدى بىرىكتىرەتىن تاقىرىپتار دا بار. ءدال وسى تاقىرىپ ءبىزدى الاڭداتاتىن ماسەلەلەردى ورتاعا سالۋعا مۇمكىندىك بەرەدى دەپ ويلايمىز», - دەدى TEDx Astana كونفەرەنتسياسىنىڭ كۋراتورى ءاليا ساندىباەۆا.
ۇيىمداستىرۋشىلار پىكىرىنشە, كونفەرەنتسيادا ادامزات جەتكەن جەتىستىكتەردىڭ قورشاعان ورتا مەن ەكونوميكاعا اسەرى تۋرالى جىلدار بويى قالىپتاسقان «ۇيرەنشىكتى» پىكىرلەردى وزگەرتەتىن يدەيالار ءسوز بولادى. سپيكەرلەر ادامداردىڭ ءومىر سالتى مەن بولاشاعىنا اسەر ەتەتىن مادەني-الەۋمەتتىك قۇبىلىستار, يننوۆاتسيالار مەن زاماناۋي تەحنولوگيالاردىڭ قازىرگى زاماننىڭ ەڭ وزەكتى دەگەن ماسەلەلەرىن شەشۋگە قانشالىقتى مۇمكىندىگى بار دەگەن ساۋالدارعا جاۋاپ ىزدەيدى.
العاشقى TEDx كونفەرەنتسياسى قازاقستان مەن تمد ەلدەرى اۋماعىندا 2010 جىلى وتكىزىلگەن بولاتىن. ال, TED قورىنىڭ ارنايى ليتسەنزياسىمەن وتكىزىلەتىن TEDxAstana 2015 جىلدان بەرى ۇيىمداستىرىلىپ كەلەدى. TEDx – جەرگىلىكتى جەرلەردە ءتۇرلى اعارتۋشىلىق شارالار وتكىزۋگە ارنالعان عالامدىق جوباسى.
كونفەرەنتسياعا تىركەۋ tedxastana.com سايتىندا قىركۇيەكتىڭ 5 دەيىن جالعاسىن تاپپاق.