باتىس قازاقستان وبلىسىنىڭ اقجايىق اۋدانى ورتالىعىندا ۇلتتىق سپورت تۇرلەرىنەن باتىس قازاقستان وبلىسىنىڭ V فەستيۆالى ءوتتى. سايىسقا ورال قالاسىنان جانە 12 اۋداننان كوماندا قاتىسىپ, سپورتتىڭ 11 تۇرىنەن باسەكەگە ءتۇستى.
510-دەن اسا سپورتشى, 300-گە تارتا جەتەكشى وكىل قاتىسقان فەستيۆالدە كوماندالار بايگە, كوكپار, اۋدارىسپاق, تەڭگە ءىلۋ, جامبى اتۋ, توعىزقۇمالاق, اسىق اتۋ, قازاق كۇرەسى, ۇلتتىق جەكپە-جەك تۇرلەرىنەن باق سىنادى.
– حالقىمىزدىڭ سالت-ءداستۇرىن, بولمىسى مەن رۋحىن ايگىلەيتىن بۇگىنگى ۇلى دالا ويىندارى ارقىلى ۇلتتىق ءتول ونەرىمىزدى جاس تولقىنعا جەتكىزۋ, سپورتىمىزدىڭ مارتەبەسىن بيىكتەتۋ – بارشامىزدىڭ زور مىندەتىمىز. ەلباسىمىز نۇرسۇلتان نازارباەۆتىڭ باعدارلامالىق ماقالالارى بارشانى وسىعان ۇندەيدى. ۋاقىت وزعان سايىن قارقىندى دامىپ جاتقان الەمدىك جاھاندانۋ داۋىرىندە ۇلتىمىزدىڭ ۇلىلىعىن تانىتاتىن رۋحاني قۇندىلىقتارىمىزدى كەيىنگى تولقىنعا امان جەتكىزۋ - ۇلت الدىنداعى بۇلجىماس پارىزىمىز, - دەدى فەستيۆالدىڭ اشىلۋ سالتاناتىندا ءسوز العان اقجايىق اۋدانىنىڭ اكىمى قاليار ايتمۇحامبەتوۆ.
ەكى كۇنگە سوزىلعان جارىستىڭ العاشقى كۇنى كوماندالار كوكپار سايىسىنا ءتۇستى. تاسقالا مەن قازتالوۆ, جانىبەك پەن ورال, شىڭعىرلاۋ مەن ءبورلى, اقجايىق-قاراتوبە-جاڭاقالا كوماندالى اراسىندا وتكەن تارتىستى ويىندا ءبىرىنشى ورىن – ورال قالاسى كومانداسىنا بۇيىردى. ەكىنشى ورىندى – جانىبەك اۋدانى شاباندوزدارى السا, ءۇشىنشى جۇلدەگە الاڭ يەلەرى – اقجايىق اۋدانى كوكپارشىلارى يە بولدى.
حالىق تاقىمىن قىسىپ, ەرەكشە جانكۇيەر بولعان سايىستىڭ ءبىرى ات جارىس – بايگە ەكەنى تۇسىنىكتى عوي. 25 شاقىرىمدىق الامان بايگەدە ءبىرىنشى ورىن - جانىبەك اۋدانى جۇيرىگىنە, ەكىنشى ورىن – جاڭاقالا, ءۇشىنشى ورىن – بوكەيوردا اۋدانىنا ءتيدى. 15 شاقىرىمدىق توق بايگەنىڭ جۇلدەسىن اقجايىق, ءبورلى جانە سىرىم اۋداندارى وسى رەتپەن ءبولىستى. 7 شاقىرىمدىق قۇنان بايگەدە بايتەرەك اۋدانىنان كەلگەن ماناربەك كەنجەعاليەۆتىڭ «بايتورەسى» - ءى ورىن, اقجايىق اۋدانىنان قاتىسقان سىرىم ساناۋلىنىڭ «كەرمارالى» - ءىى ورىن, قازتالوۆتىق نۇربولات اديەتوۆتىڭ «سۇلتانى» - ءىىى ورىندى جەڭىپ الدى.
وسى فەستيۆالدە 10 سالماق دارەجەسىندە تۇڭعىش رەت ۇلتتىق جەكپە-جەك باسەكەلەرى ءوتتى. 6 ساعاتقا سوزىلعان جەكپە-جەك باسەكەلەرىندە جالپىكوماندالىق جەڭىستى ءبورلى اۋدانى باتىرلارى تارتىپ الدى. ەكىنشى ورىن – اقجايىق اۋدانىنا, ءۇشىنشى ورىن – جانىبەك اۋدانى سپورتشىلارىنا ءتيدى.
جالپى باتىس قازاقستان وبلىسىنىڭ V فەستيۆالىنىڭ جالپىكوماندالىق ەسەپ قورىتىندىسى دا وسىنداي بولدى. ءبورلى اۋدانى - فەستيۆال جەڭىمپازى اتانسا, ەكىنشى ورىندى – اقجايىق اۋدانى سپورتشىلارى, ءۇشىنشى ورىندى – جانىبەك اۋدانى كومانداسى جەڭىپ الدى. جەڭىمپازدار مەن جۇلدەگەرلەر العىس حات پەن باعالى سىيلىقتارعا يە بولدى.
سۋرەتتى تۇسىرگەن نۇربەك يحسان
باتىس قازاقستان