وسىدان بىرەر اپتا بۇرىن ءۇرجار اۋدانىنىڭ قاراتال جانە كوكتەرەك اۋىلدارىنىڭ اراسىندا, ماقانشى-باقتى تاسجولىنىڭ 5-ءشى شاقىرىمىندا جوعالىپ كەتكەن “مي-8” تىكۇشاعىنىڭ سىنىقتارى ءبىر تاۋلىكتەن كەيىن ارەڭ تابىلدى. ءۇرجار اۋدانىنداعى قاتتى بوران سالدارىنان اپاتتىڭ نەدەن بولعانىن انىقتاۋ, ”قارا جاشىكتى” تاۋىپ الۋ قيىنعا سوعىپ تۇر. تاياۋدا مەملەكەتتىك كوميسسيا مۇشەلەرى اپاتتىڭ نەدەن بولعانى جايلى اقپارات قۇرالدارى وكىلدەرىنە حابار تاراتتى.
باستاپقىدا تىكۇشاق اۋەدە جارىلىپ كەتكەن سوڭ ونىڭ سىنىقتارى 800 مەترگە دەيىن شاشىلعان دەگەن حاباردى ەستىدىك. ونداي جاعدايدا, ارينە, ادامدار دەنەسىن تابۋ قيىنعا سوعاتىنى بەلگىلى. ال كولىك جانە كوممۋنيكاتسيا ۆيتسە-ءمينيسترى, مەملەكەتتىك كوميسسيانىڭ توراعاسى ەركىن دۇيسەمباەۆ جۋرناليستەرگە تىكۇشاقتىڭ اپاتقا ۇشىراۋىنا اۋا-رايىنىڭ قولايسىز بولعانى كىنالى دەپ ايتتى. ”ازىرشە اپاتتىڭ نەدەن بولعانىن ءدال بولجاۋ قيىن. سەبەبى, بوران تولاستار ەمەس, سوندىقتان ءبىر ايدان كەيىن عانا بەلگىلى بولادى”, دەدى كوميسسيا توراعاسى.
شىعىس قازاقستان وبلىسى اكىمىنىڭ ءبىرىنشى ورىنباسارى سەرىك ابدەنوۆتىڭ ايتۋىنشا, اپاتتىڭ سەبەپتەرى بىرنەشە باعىت بويىنشا انىقتالۋدا. ءبىر ءماسەلەنى عانا ناقتى ايتۋعا بولادى, ۇشقىشتار ۆ.ستولبوۆسكي, يۋ.تيۋرنيكوۆ, بورتمەحانيك س.بارابانوۆ, دارىگەرلەر ا.سترەلنيك, ۆ.تيۋكتياەۆا ءوزگەلەردى قۇتقارامىز دەپ ءوز جاندارىن قيدى. ماقانشى جانە بلاگودارستۆەننوە اۋىلدىق وكرۋگتەرىنىڭ اكىمدەرى ە.ساعىمبەكوۆ پەن ب.يبراەۆ تىكۇشاققا جەرلەستەرىنە قولعابىس جاساساق دەگەن ويمەن وتىرعان. ال 17 جاسار ق.قاليەۆ قاتتى سىرقاتتانعان سوڭ ءدارىگەرلەر ونى وتىرعىزىپ الىپ, اۋدان ورتالىعىنداعى اۋرۋحاناعا جەتكىزۋدى ويلاعان. اقىرى سەگىزى بىردەي وقىستا قازا تاپتى.
مۇنىڭ الدىندا وبلىس اكىمى ب.ساپارباەۆ قايتىس بولعانداردىڭ وتباسىلارى مەن تۋعان-تۋىستارىنا كوڭىل ايتىپ, ولاردى جەرلەۋ جانە وتباسىلارىنا كومەك كورسەتۋ جونىندە كوميسسيا قۇرعان. قازا تاپقانداردىڭ وتباسىلارىنا ۇكىمەت قولداۋ جاساماق. وبلىس اكىمىنىڭ ۇيعارىمى بويىنشا ءار وتباسىنا 1 ميلليون تەڭگەدەن كومەك كورسەتىلەدى.
سارسەنبى كۇنى ءۇش تىكۇشاق ءمۇشەلەرى جانە ەكى دارىگەرمەن قوشتاسۋ ءراسىمى وسكەمەندەگى “مەتاللۋرگتەر” مادەنيەت سارايى الدىندا ءوتتى. وعان مىڭداعان قالا تۇرعىندارى قاتىستى. وبلىس اكىمى ب.ساپارباەۆ قازا تاپقانداردىڭ تۋىستارىنا كوڭىل ايتىپ, ولاردىڭ ازاماتتىعى ەشقاشان ۇمىتىلمايتىنىن, ەلباسى ن.نازارباەۆتىڭ قايعىعا بايلانىستى كوڭىل ايتۋ جەدەلحاتىن جولداعانىن, قازا تاپقاندارعا قولعابىس جاساۋعا تاپسىرما بەرگەنىن ايتتى. ءۇرجاردا دا ءۇش ازاماتتى جەرلەۋ ءراسىمىنە تۇرعىندار مول جينالدى.
ويدى وي قوزعايدى. تىكۇشاقپەن ۇشۋ شىنىندا دا قاۋىپتى مە؟ وبلىستىق توتەنشە جاعدايلار ءجونىندەگى دەپارتامەنت قاراماعىندا بىرنەشە ”مي” تىكۇشاقتارى, سوسىن ءبىر-ەكى جەكە مەنشىك كومپانيادا شاعىن تىكۇشاقتار بار كورىنەدى. ولاردىڭ ءبىرازى ەسكىرگەن, قانشا سىلاپ-سىيپاسا دا قاۋىپتى. ەندەشە, اۋە پاركىن جاڭالاپ, قازىرگى جەتىلدىرىلگەن جاڭا تىكۇشاقتاردىڭ اۋا رايى وتە قولايسىز, قىستا بوراننان كوز جازبايتىن كەندى التايعا كوبىرەك بولسە دەگەن وي بار. راس, جاقىندا ۇكىمەت وبلىسقا 1 ميلليارد 200 ملن. تەڭگە ءبولدى.
ەكىنشى ماسەلە, بيىلعى ۇزاق ءارى قاتال قىستا قاجەتتى تەحنيكالاردىڭ جەتىسپەيتىنى دالەلدەندى. جاقىندا وڭتۇستىك قازاقستان جانە پاۆلودار وبلىستارىنان ءبىرنەشە تەحنيكا كومەككە كەلدى. ول ءۇشىن سىن ساتتە قولدارىن سوزعان وبلىس باسشىلارىنا العىستان باسقا ايتارىمىز جوق.
وڭداسىن ەلۋباي, شىعىس قازاقستان وبلىسى.