جاڭادان سالىناتىن قۇرىلىس نىساندارىنىڭ جوبالىق قۇنى 2 ملرد تەڭگەدەن اسقان جاعدايدا قازىناشىلىق سۇيەمەلدەۋ قولدانىلادى. قارجى مينيسترلىگى قولعا العان بۇل باستاما كولەڭكەلى ەكونوميكانىڭ الدىن الۋعا, بيۋدجەت قاراجاتىن وڭتايلى پايدالانۋعا باعىتتالعان.
جوبا شارتى بويىنشا بارلىق وپەراتسيالار قازىناشىلىقتىڭ اۋماقتىق بولىمشەلەرىندە اشىلعان جەكە شوت ارقىلى جۇزەگە اسادى. باس مەردىگەر مەن ءبىرىنشى جەلىدەگى قوسالقى مەردىگەر عانا شوت اشا الادى. شوتتاعى اقشا جوبا اياقتالعانعا دەيىن ساقتالادى. قۇرىلىس نىسانى پايدالانۋعا بەرىلگەننەن كەيىن قاراجاتتى ەكىنشى دەڭگەيلى بانكتەگى شوتىنا اۋدارۋعا بولادى. بيۋدجەت قاراجاتى ەسەبىنەن قارجىلاندىرىلاتىن قۇرىلىس جوبالارىن ىسكە اسىرۋ كەزىندە بارلىق اقشالاي تولەمدەردى باقىلاۋعا مۇمكىندىك بەرەتىن بۇل جوبا وتكەن جىلى اتىراۋ وبلىسىندا دا ەنگىزىلدى. وبلىستىق قازىناشىلىق دەپارتامەنتى باسشىسىنىڭ ورىنباسارى ينديرا نۋحينانىڭ ايتۋىنشا, يساتاي, جىلىوي اۋداندارىنداعى تۇرعىن ۇيلەر, اتىراۋ قالاسىنداعى بەرەكە, بالاۋسا, سامال شاعىن اۋداندارىنداعى مەكتەپتەر مەن جاڭاتالاپ اۋىلىنداعى مەكتەپ-ينتەرنات, بەرەكە شاعىن اۋدانىنداعى قوسالقى ستانسا قۇرىلىستارى وسى جوبا اياسىندا جۇمىس ىستەپ جاتىر.
جاڭا جوبانىڭ تيىمدىلىگىمەن قاتار كەمشىن تۇستارى دا كۇندەلىكتى جۇمىس بارىسىندا بەلگىلى بولىپ وتىر. كاسىپكەرلەر الدىن الا تولەم جاساۋ, ەلەكتروندى شوت-فاكتۋرالار نەگىزىندە تولەم اۋدارۋ كەزىندە قيىندىقتار تۋىنداعانىن ايتىپ شاعىمدانعان. «قازىناشىلىق ورگاندارىندا وسى ماسەلەگە جاۋاپتى ارنايى قىزمەتكەر تاعايىندالدى, – دەيدى ينديرا نۋحينا. – ول جوبا باستالعاننان اياقتالعانعا دەيىن سۇيەمەلدەپ, ماسەلەگە قۇزىرەتى شەگىندە تۇسىنىكتەمە بەرەدى».
ەلباسى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا بيۋدجەت شىعىستارىنىڭ تيىمدىلىگىن ارتتىرۋعا باسا ءمان بەرگەن بولاتىن. قۇرىلىس سالاسىنداعى مەملەكەتتىك ساتىپ الۋلارعا ەنگىزىلگەن بۇل وزگەرىستىڭ دە باستى ماقساتى – وسى. تەك حالىقارالىق تاجىريبەدەگى ءۇردىستى وزىمىزگە بەيىمدەۋ كەزىندە ءالى دە جەتىلدىرەتىن تۇستار بارىن نازارعا الۋىمىز كەرەك.
اتىراۋ