اۋعان جاستارى قازاقستاندا ءبىلىم الادى

شەتەلدىك ستۋدەنتتەر بيىلعى قازاننان وقۋ جىلىنىڭ اياعىنا دەيىن الدىمەن اعىلشىن ءتىلىنىڭ دايىندىق كۋرستارىنان وتەدى. ايتا كەتەيىك, وقۋ ستاتيستيكا (statistics), پايدالى قازبالار ءوندىرۋ (mining) جانە اۋىل شارۋاشىلىعى (agriculture) ماماندىقتارى بويىنشا اعىلشىن تىلىندە جۇرگىزىلەدى. ال نەگىزگى وقۋىن 2020 جىلدىڭ قىركۇيەگىنەن, ياعني جاڭا وقۋ جىلىنان باستايدى. اۋعان ستۋدەنتتەرى ق.ي.ساتپاەۆ اتىن­داعى قازاق ۇلتتىق تەحنيكالىق ۋنيۆەر­سيتەتى, قازاق-بريتان تەحنيكالىق ۋنيۆەر­سيتەتى, قازاق ۇلتتىق اگرارلىق ۋنيۆەرسيتەتى جانە Almaty management university سىندى رەسپۋب­ليكامىزداعى بەدەلدى جوعارى وقۋ ورىندارىنا ورنالاستىرىلادى.

بۇل ءىس-شارا بۇۇ دامۋ باعدارلاماسى جۇزەگە اسىراتىن «قازاقستان مەن وزبەك­ستاندا ءبىلىم بەرۋ جانە كاسىبي دايارلاۋ ار­قىلى اۋعان ايەلدەرىنىڭ ەكونوميكالىق قۇقىقتارى مەن مۇمكىندىكتەرىن كەڭەيتۋ» جوباسى شەڭبەرىندە جۇزەگە اسىرىلماق. جوباعا قاتىساتىن 50 ادامنىڭ 40-ى بىزدە, قالعان 10-ى وزبەكستاندا ءبىلىم الادى.

قازاقستانداعى بۇۇ دامۋ باعدارلاما­سى­نىڭ تۇراقتى وكىلى ياكۋپ بەريش «ەۋرو­پا­­لىق وداق اۋعان ايەلدەرىنىڭ ءبىلىم الۋ مۇم­كىن­دىكتەرىن كەڭەيتۋگە, ولارعا جانە ولار­­دىڭ اۋعانستانداعى قاۋىمدارىنا بيز­نەس جۇرگىزۋ مەن جۇمىسپەن قامتۋدىڭ جاڭا مۇم­كىن­دىكتەرىن قۇرۋعا كومەكتەسۋگە ارنال­عان جوباعا 2 ملن ەۋرو كولەمىن­دە گرانت ۇسىن­دى», دەدى. سونداي-اق ول ءوز سوزىندە حالىق­ارا­لىق الماسۋ باعدار­لامالارىن قولداۋ بويىنشا ەڭ ۇلكەن تاجىريبەسى بار قازاق­­ستان­داعى سەرىكتەسى «حالىقارالىق باع­دار­­لا­ما­­لار ورتالىعى» وسى جوبا شەڭ­بەرىن­دە اۋعان ستۋ­دەنتتەرى ءۇشىن اكادەميالىق ورنا­لاسۋ مەن وقىتۋ ۇدەرىسىن رەتكە كەلتىرۋگە كومە­ك­تە­سەتىنىنە سەنەتىنىن ايتقان. ال «حالىق­­ارا­لىق باعدارلامالار ورتالىعى» اق پرە­­زي­دەنتى جانبولات مەل­دەشوۆ ىنتى­ماق­­تاس­تىققا دايىن ەكە­نىن جەتكىزگەن. «جوبا­­نىڭ ىسكە اسىرىلۋى­نا قاتىسۋ بىزگە ۇلكەن ابىروي. بۇل – ەۋرووداق پەن بۇۇ دامۋ باع­دار­لاماسى تارا­­پى­نان بىل­دى­رىل­گەن جوع­ارى سەنىم. حالىق­ارالىق باع­دار­لا­مالار ورتالى­­عى­­نىڭ حالىقارالىق ءبىلىم بەرۋ سالاسىن­داعى تاجىريبەسى كوپ. قازاق­ستاندا اۋعانستان ايەلدەرىنىڭ ءبىلىم الۋى بو­يىن­شا باعدار­لاماعا قۇجاتتار قابىلداۋ باس­ت­الدى جانە 10 تامىزعا دەيىن جالعاسا­دى. بىر­لەس­كەن جۇمىس وڭ ناتيجەلەرگە الىپ كەلەدى دەپ ويلايمىن», دەدى ورتالىق باسشىسى.

اتالعان ورتالىق ۇمىتكەرلەردى ىرىكتەۋ, تىلدىك كۋرستاردى جۇرگىزۋ جانە وقۋ ۇدە­رىسىن ۇيىمداستىرۋ بويىنشا كونكۋرس وتكىزۋدى قوسا العاندا جوبانىڭ ىسكە اسىرىلۋىنا تەحنيكالىق, ساراپتامالىق جانە تالدامالىق قولداۋ كورسەتەدى.

شەتەلدىك ستۋدەنتتەر باكالاۆريات (4 جىل), ماگيستراتۋرا (1 جىل) جانە كاسىبي دايارلىق (TVET – Technical and Vocational Education and Training) باعدارلامالارى بو­يىنشا ءبىلىم الادى. ورتالىق تاراتقان اق­پاراتقا سۇيەنسەك, TVET باعدارلاماسى قاتىسۋ­شىلاردىڭ ودان ءارى قاجەتتى ءبىلىم مەن داعدىلاردى يگەرۋىنە باعىتتالعان ءبىر جىل­دىق كۋرستاردى ۇسىنادى. اكادە­ميا­لىق باع­دار­لامالارعا تەوريالىق اسپەكتىلەردى تەرە­ڭى­نەن زەرتتەۋ, سونىمەن قاتار وندىرىستە تاجىريبەلىك داعدىلاردى الۋ جاتادى.

ايدانا شوتبايقىزى,

«Egemen Qazaqstan»