قازىرگى ۋاقىتتا سىرتقى ىستەر مينيسترلىگىنىڭ ۇيلەستىرۋىمەن 1-2 تامىزدا نۇر-سۇلتان قالاسىندا وتكىزىلۋى جوسپارلانعان سيريا جونىندەگى جوعارى دەڭگەيدەگى حالىقارالىق كەزدەسۋدىڭ كەزەكتى 13-ءشى راۋندىنا دايىندىق جۇمىستارى تولىق قارقىنمەن جۇرگىزىلۋدە. بۇل تۋرالى مينيسترلىكتىڭ ءباسپاسوز قىزمەتى حابارلادى.
بۇگىنگى كۇنگە دەيىن بارلىق شاقىرىلعان تاراپتار وزدەرىنىڭ قاتىساتىندىعىن راستادى. اتاپ ايتقاندا, رەسەي دەلەگاتسياسىن رف پرەزيدەنتىنىڭ سيريا جونىندەگى ارنايى وكىلى الەكساندر لاۆرەنتەۆ, تۇركيا دەلەگاتسياسىن تر سىرتقى ساياسي ۆەدومستۆو باسشىسىنىڭ ورىنباسارى سەدات ونال باسقارادى. يران دەلەگاتسياسىنا سىرتقى ىستەر ءمينيسترىنىڭ ساياسي ىستەر جونىندەگى جوعارى كومەكشىسى الي اسگار حادجي باسشىلىق ەتەدى.
سونىمەن بىرگە, اتالعان كەزدەسۋگە سيرياداعى ەكى قاقتىعىسۋشى تاراپ – سيريانىڭ بۇۇ-داعى تۇراقتى وكىلى باشار ءال-دجاافاري باستاعان سار ۇكىمەتتىك دەلەگاتسياسى جانە احماد ال-توۋما باستاعان قارۋلى وپپوزيتسيا قاتىسادى.
كەزدەسۋدىڭ جاڭالىعى - استانا فورماتىنداعى بۇعان دەيىنگى كەلىسسوزدەر نەگىزىندە قابىلدانعان شەشىمگە سايكەس, يراك پەن ليۆان دەلەگاتسيالارىنىڭ اتالعان پروتسەسكە بايقاۋشىلار رەتىندە قاتىسۋى.
وكىنىشكە وراي, بۇۇ باس حاتشىسىنىڭ سيريا جونىندەگى ارنايى وكىلى گەير پەدەرسەن دەنساۋلىعىنا بايلانىستى الداعى كەلىسسوزدەرگە قاتىسا المايتىن بولادى. بۇۇ دەلەگاتسياسىن ونىڭ ورىنباسارى باسقارادى.
بۇعان قوسا, وسى كۇندەرى سيرياارالىق كەلىسسوزدەر شەڭبەرىندە وتەتىن تۇتقىنداردى بوساتۋ, قازا تاپقانداردىڭ دەنەلەرىن تابىستاۋ جانە ءىز-ءتۇزسىز جوعالعانداردى ىزدەستىرۋ بويىنشا جۇمىس توبىنىڭ كەزەكتى كەزدەسۋىنە قاتىسۋ ءۇشىن بۇۇ بوسقىندار ىستەرى جونىندەگى جوعارعى كوميسسارى باسقارماسى جانە حالىقارالىق قىزىل كرەست كوميتەتىنىڭ وكىلدەرى نۇر-سۇلتانعا كەلەدى.
بۇرىن وتكەن سيرياارالىق كەلىسسوزدەرگە ۇقساس, ءبىرىنشى كۇنى «جابىق ەسىك» جاعدايىندا ەكىجاقتى جانە كوپجاقتى تەحنيكالىق كونسۋلتاتسيالار, ال كەلەسى كۇنى جالپى وتىرىس وتەدى. ەكى كۇندىك كەلىسسوزدەردىڭ نەگىزگى ناتيجەلەرى استانا پروتسەسىنىڭ كەپىلگەر مەملەكەتتەرىمەن قابىلداناتىن بىرلەسكەن مالىمدەمەسىندە باياندالادى.