قازاق ءۇشىن بەسىكتەن كيەلى نە بار؟! اتا-بابامىز قاسيەت تۇتقان بەسىك – ءاربىر ءۇيدىڭ تورىندە تۇراتىن قۇندى دۇنيە. كونەكوز قاريالاردىڭ «بەسىگىڭ تارىلماسىن, بەسىگىڭ تەربەلسىن» دەپ باتا بەرۋى دە كوپ ماعىنانى بىلدىرسە كەرەك. وسىنداي اق باتامەن كوكتەپ, كوگەرىپ وتىرعان ارالدىق امانوۆتار وتباسىندا ءبىر عاسىر تەربەلگەن بەسىك بار.
اتادان بالاعا مۇرا بولىپ قالعان باعالى جادىگەرگە بۇل اۋلەتتىڭ ءتورت ۇرپاعى كۋا دەسەك, قاتەلەسپەيمىز. قازىردە توقسان جاسقا تاياپ قالعان رايحان اپا بۇل بەسىكتى قايىناتاسىنىڭ ءوز قولىمەن, ءبىر شەگە قاقپاي جاساعانىن ايتادى.
– مەنىڭ ەستۋىمشە, قايىناتامىز بەن ەنەمىزدە بالا تۇراقتاماي, تۋىلا سالا شەتىنەپ كەتە بەرگەن. سودان كەيىن اتامىز نيەتتەنىپ ءوز قولىمەن بەسىك جاساپتى. قۇدايدان الاقان جايىپ, وسى بەسىككە جاتاتىن ءبىر ءسابي بەرە گور دەپ تىلەپتى. كوپ ۇزاماي ولاردىڭ تىلەگى قابىل بولىپ, ەكى ۇل بالا دۇنيەگە كەلىپتى. سونىڭ ءبىرى – مەنىڭ جولداسىم ءۇبايدۋللا. ال قازىر بۇل بەسىككە شوبەرەلەرىمىز تەربەلىپ وسۋدە. ءبىز ءۇشىن قۇندى دۇنيە بولعاندىقتان, ونى بالالارىما ارقاشان امانات ەتىپ ايتىپ وتىرامىن. ۇلكەن بالام ونى مايلاپ قويادى. قازىر قالاداعى كىشى بالامنىڭ ۇيىندە ساقتاۋلى تۇر. بەسىك دەگەن بالانىڭ ۇياسى عوي. ءسابيدىڭ ۇيقىسى تىنىش, دەنەسى تازا بولادى,– دەيدى كەيۋانا.
ءتۇرلى تەحنيكالاردىڭ دامىعان زامانىندا ەلەكتروندى بەسىكتى ويلاپ تاپقاندار دا بار. ءوزى تەربەلەتىن بەسىك, ارينە جاقسى-اق. الايدا, قازاقتىڭ كيەلى دۇنيەسى باعا جەتپەس بايلىق بولىپ قالا بەرمەك.
ايساۋلە قاراپاەۆا
قىزىلوردا وبلىسى