بۇل وقيعا تۋرالى ىشكى ىستەر ءمينيسترى ەرلان تۇرعىمباەۆ ارنايى مالىمدەمە جاسادى. جاريا بولعان ماعلۇمات بويىنشا «وحوتزووپروم» ءوب» رمقك ورتالىق وڭىرلىك فيليالىنىڭ ينسپەكتورلارىنا شابۋىل جاساعان قىلمىسكەرلەردى انىقتاۋ جانە ۇستاۋ ءۇشىن رەسپۋبليكا كولەمىندە «ۇستاۋ» جوسپارى جاسالىپ, قولداعى دەرەكتەر بارلىق ايماقتارعا جونەلتىلگەن. وقيعا ورنىنا جاقىن ورنالاسقان اقمولا, قوستاناي جانە سولتۇستىك قازاقستان وبلىستارىنىڭ جەكە قۇرامى دەرەۋ كۇشەيتىلگەن قىزمەتكە كوشىرىلگەن. وبلىستىق ءجانە رەسپۋبليكالىق ماڭىزى بار جولدارعا بلوك-بەكەتتەر قويىلىپ, ءۇش وبلىستىڭ اۆتوجولدارى بويىمەن جەدەل-ىزدەستىرۋ توپتارى جىبەرىلگەن. ىزدەستىرۋ جۇمىستارىنا ءىىم تجك تىكۇشاقتارى, ءىىم كريمينالدىق پوليتسيا دەپارتامەنتىنىڭ جانە «ارلان» ارنايى بولىمشەسىنىڭ قىزمەتكەرلەرى قاتىستى.
جوسپارلانعان ءىس-شارالاردىڭ ناتيجەسىندە ارقالىق قالاسىنىڭ تۇرعىنى كۇدىكتى رەتىندە انىقتالىپ, قاماۋعا الىندى. سونداي-اق قىلمىس ورنىنان 20 شاقىرىم جەردە قالدىرىپ كەتكەن «نيۆا» ماركالى اۆتوكولىك تابىلدى. قازىرگى ۋاقىتتا كۇدىكتىگە قاتىستى تەرگەۋ امالدارى جۇرگىزىلۋدە. قىلمىس قۇرالى مەن وق-ءدارىلەر تاركىلەندى. بىرقاتار كريميناليستىك ساراپتامالار بەلگىلەندى. بۇل قىلمىسقا باسقا دا قاتىسۋشىلاردىڭ بار-جوعى تەكسەرىلىپ جاتىر. قورىقشى ق.س.نۇرتازينوۆتىڭ ولىمىنە جانە قورىقشى س.ك.وسپانوۆتى ءولتىرۋ ارەكەتىنە بايلانىستى قىلمىستىق كودەكستىڭ 99-بابى, 2-ءبولىمى بويىنشا قىلمىستىق ءىس قوزعالدى.
سونىمەن قاتار ىشكى ىستەر مينيسترى ەرلان تۇرعىمباەۆ ىشكى ىستەر ورگاندارىنىڭ براكونەرلىكتىڭ الدىن الۋ جانە جولىن كەسۋ بويىنشا اتقارىپ جاتقان جۇمىستارى تۋرالى حابارلادى. «جىل باسىنان بەرى كيىكتەردى براكونەرلىك جولمەن اۋلاۋ فاكتىسى بويىنشا 37 قىلمىستىق ءىس قوزعالدى, 32 ادام ۇستالدى. سونداي-اق 634 كيىك ءمۇيىزى, قىلمىس قۇرالدارى, 13 اۆتوكولىك جانە 19 اتىس قارۋى ءتاركىلەندى. كەلتىرىلگەن شىعىن كولەمى 1,3 ميلليارد تەڭگەدەن استى. براكونەرلىك ءۇشىن اكىمشىلىك جانە قىلمىستىق جاۋاپكەرشىلىكتى كۇشەيتۋ, ونىڭ ىشىندە م ۇلىك پەن قىلمىس قۇرالىن ءتاركىلەۋ تۋرالى ۇسىنىستار ەنگىزىلدى. تابيعات ءجانە جان-جانۋارلار الەمىنە قاتىستى زاڭداردى بۇزۋشىلار كەلتىرگەن زيان ءۇشىن وندىرىلەتىن وتەماقى ءمولشەرىن ارتتىرۋ ماسەلەسى دە پىسىقتالۋدا. ورمان شارۋاشىلىعى جانە جان-جانۋارلار الەمىن قورعاۋ بولىمشەلەرىنىڭ كولىكتەرىن ارنايى جارىق جانە دىبىس سيگنالدارىمەن جابدىقتاپ, بەلگىلى ءبىر تۇسكە بوياۋ تۋرالى ءىس-شارالار ازىرلەندى», دەپ كورسەتىلگەن مينيستردىڭ مالىمدەمەسىندە.
كيىكتەردىڭ ءومىرىن اراشالاپ ءجۇرىپ اجال قۇشقان قانىش نۇرتازينوۆتى اقتىق ساپارعا شىعارىپ سالۋ ءراسىمى 26 شىلدەدە قاراعاندى وبلىسىنىڭ جەزقازعان قالاسىندا وتەدى. مارقۇمنىڭ دەنەسى تۋعان اۋىلىنا ەرتەڭ جەتكىزىلسە, تۋىستارى مەن جاقىندارى جانازاسىن جۇما كۇنى شىعارادى.
ال جارالانعان ەكىنشى ينسپەكتور سامات وسپانوۆتىڭ ومىرىنە قازىرگى ۋاقىتتا قاۋىپ ءتونىپ تۇرعان جوق. وعان دەرجاۆين اۋداندىق اۋرۋحاناسىندا وتا جاسالدى. كوپ بەيىندى اۋرۋحانا ديرەكتورىنىڭ حيرۋرگيا ءجونىندەگى ورىنباسارى دميتري چايكوۆ ناۋقاستى قوسىمشا تەكسەرۋدەن وتكىزىپ, كەۋدە قۋىسىن جانە يىق سۇيەگىن كومپيۋتەرلىك توموگرافياعا تۇسىرگەندەرىن حابارلادى. قازىر ول تراۆماتولوگيا بولىمشەسىندە كۇزەتتىڭ قاداعالاۋىمەن ارنايى پالاتاعا جاتقىزىلعان.