بۇگىندە تۇلكىباستاعى كاسىپكەرلەر جاقسىلىق جاساۋدان جارىسقا ءتۇسىپ جاتقانداي. مىنە, سونداي ىزگىلىكتى ءىستى تەمىر جول بويىندا ورنالاسقان تۇلكىباس كەنتى مەن تابيعاتى كوز تارتار ءيىرسۋ اۋىلىنىڭ تۇرعىندارى باستاپ وتىر.
ۇنەمى اينالاسىنا جاقسىلىق جاساۋدى ادەتكە اينالدىرعان كوپ بالالى كاسىپكەر انا ايىمكۇل ماتكاريموۆا ءوز وتباسى اتىنان كەنت ورتالىعىنا 2 ملن تەڭگە قارجىعا زاماناۋي ۇلگىدەگى ايالداما سالىپ بەردى. وسىلايشا, ول جازدىڭ اپتاپ ىستىعى مەن قىستىڭ قاقاعان سۋىعىندا قوعامدىق كولىك كۇتكەن تۇرعىندارعا ىڭعايلى جاعداي جاساپ وتىر.
ەلباسى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «باسقا ايماقتارعا كوشىپ كەتسە دە, تۋعان جەرلەرىن ۇمىتپاي, وعان قامقورلىق جاساعىسى كەلگەن كاسىپكەرلەردى, شەنەۋنىكتەردى, زيالى قاۋىم وكىلدەرى مەن جاستاردى ۇيىمداستىرىپ, قولداۋ كەرەك», دەگەن ەدى.
انىعىندا, كەز كەلگەن اۋىلدىڭ كەلبەتىنە قاراپ, سول ايماقتان شىققان ازاماتتاردىڭ قانداي ەكەنىن اڭعارۋعا بولادى. اۋىلى جايناپ تۇرسا, دەمەك كىندىك كەسكەن جەرىنە بۇيرەگى بۇرار يگى جاقسىلار كوپ دەگەن ءسوز.
تۇلكىباس اۋدانى, ءيىرسۋ اۋىلىنىڭ تۋمالارى دا سونداي ەلگە قامقور جاندار. ەرتەرەكتە اۋىلدان اۋدان ورتالىعىنا كوشىپ كەتكەن جەكە كاسىپكەر ءابىلحان داۋىلباەۆ تا اۋىلداستارىنا جاقسىلىق جاساۋدى ءجون ساناپتى. اۋىل كوشەلەرىنە 9 ملن تەڭگەگە سوڭعى ۇلگىدەگى 64 دانا شامدار مەن 64 دانا جاڭا تەمىر-بەتوندى ەلەكتر باعانالارىن ورناتقىزىپ, سيپ سىمىن تارتىپ بەرىپتى.
بۇگىندە ءتۇنى كۇندىزگىدەي اۋىلدىڭ جاسىنان جاسامىسىنا دەيىن ءابىلحاننىڭ يگىلىكتى ءىسىن سۇيىنىشپەن ايتىپ ءجۇر.
تۇركىستان وبلىسى