فرانتسيا تاس جولدارىندا ءوتىپ جاتقان ۆەلوسپورتتان بەيرەسمي الەم چەمپيوناتى سانالاتىن «تۋر دە فرانس» كوپكۇندىگىنىڭ 16-كەزەڭى «استانا» ۆەلوكومانداسى ءۇشىن ءساتسىز اياقتالدى.
نيم قالاسىندا وتكەن 16-كەزەڭنىڭ مارە سىزىعىنا 28 شاقىرىم قالعاندا «استانا» ۆەلوكومانداسىنىڭ كاپيتانى ياكوب فۋلسانگ سپورتشىلاردىڭ قاقتىعىسىنان جاراقات الىپ, جارىستى مەرزىمىنەن بۇرىن اياقتاۋعا ءماجبۇر بولدى. فۋلسانگ بيىلعى «تۋر دە فرانس» جارىسىندا وسىمەن ەكىنشى رەت جاراقات الىپ وتىر. ول بۇعان دەيىن باسەكەنىڭ العاشقى كەزەڭىندە قۇلاپ, جەڭىل جاراقاتتانعان-دى. بۇل جولعى جاراقاتى اۋىر بولىپ, دارىگەرلەر وعان جارىسقا قاتىسۋعا تىيىم سالدى. سونىمەن قاتار «استانانىڭ» تاعى ءبىر وكىلى لۋيس لەون سانچەس تە قاتاردان شىعىپ قالدى.
بۇل كەزەڭگە دەيىن فۋلسانگ جالپى ەسەپتە توعىزىنشا ورىندا كەلە جاتقان ەدى. ال قازىرگى جاعداي بويىنشا «استانا» ۆەلوكومانداسىنان ەڭ ۇزدىك ناتيجە قازاقستاندىق الەكسەي لۋتسەنكوعا تيەسىلى. ول جالپى ەسەپتە 25-ورىندا تۇر.