قالانى قالپىنا كەلتىرۋ جۇمىستارىنا اتسالىسۋ ءۇشىن ەرىكتىلەر باردى. بۇدان بولەك مۇنايلى ايماقتىڭ كومەگىمەن ارىستا 482 ءۇي قالپىنا كەلتىرىلەدى. سونىڭ ىشىندە 24 ءۇي تۇرۋعا مۇلدە جارامسىز دەپ تانىلعان. تەرەزەلەرى سىنىپ, توبەلەرى قۇلاعان, ءىشى قيراعان باسقا تۇرعىن ۇيلەر قازىر جوندەلىپ جاتىر. ارىسقا جۇمىس ساپارىمەن بارعان پرەمەر-مينيستر اسقار مامينگە اتىراۋ وبلىسىنىڭ اكىمى نۇرلان نوعاەۆ وسى جۇمىستار جونىندە باياندادى.
– وبلىس اكىمىنىڭ ورىنباسارى جەتەكشىلىك ەتەتىن ۆەدومستۆوارالىق توپ تۇرعىن ۇيلەردى قالپىنا كەلتىرۋ جۇمىستارى اياقتالعانعا دەيىن ارىستا بولادى, – دەدى نۇرلان نوعاەۆ. – جوندەۋ جۇمىستارىنا تەحنيكالار مەن 500-گە جۋىق ادام تارتىلدى. قازىر وبلىس ۇلەسىندەگى سەكتوردا جۇمىس قارقىندى ءجۇرىپ جاتىر.
قۇرىلىس جۇمىستارىن ءجۇرگىزىپ جاتقان مەردىگەر مەكەمەلەردىڭ باسشىلارىمەن كەڭەس وتكىزگەن وبلىس اكىمى ەڭ الدىمەن ساپاعا كوڭىل ءبولۋ كەرەكتىگىن ەسكەرتتى. «ارىس, ءبىز بىرگەمىز» اكتسياسىنا قاتىسۋشى رەتىندە جاعداي تولىق رەتتەلگەنشە كومەك بەرۋ شارالارىن جالعاستىرا بەرەمىز», دەگەن ءوڭىر باسشىسىنا ارىس تۇرعىندارى ريزاشىلىقتارىن ءبىلدىردى. قالا تۇرعىنى ءبيبىحاديشا مومىن: «سىن ءساتتە شەت قالماي, قولداۋ كورسەتكەندەرىڭىزگە راحمەت. ۇيلەرىمىز جوندەلىپ, قونىستانعاننان كەيىن اتىراۋلىقتاردى قۋانا قوناققا شاقىرامىز», دەدى.
مۇنايلى ايماقتىڭ قامقورلىعىنان ارىستاعى مەكتەپ وقۋشىلارى دا قالىس قالمادى. وبلىس ورتالىعىنىڭ ماڭىنداعى «تۇلپار» لاگەرىندە قازىر ارىستىق 50 بالا دەمالىپ جاتىر. شىلدە ايىنىڭ سوڭىنا قاراي تاعى دا 50 وقۋشى كەلەدى. وبلىستىق ءبىلىم بەرۋ باسقارماسىنىڭ ءبولىم باسشىسى الماگۇل قايىرليەۆانىڭ ايتۋىنشا, لاگەردە بالالاردىڭ الاڭسىز دەمالۋلارى ءۇشىن بارلىق جاعداي جاسالعان. ىستىق تاماقپەن, كيىم-كەشەكپەن قامتىلادى, ءتۇرلى سپورتتىق, مادەني شارالارعا قاتىسادى. دەمالىس باعدارلاماسىنا ورتاعاسىرلىق سارايشىق قالاسىنىڭ ورنىنداعى كەشەنگە بارۋ, جايىق وزەنىندە كەمەمەن ساياحاتتاۋ, وبلىس ورتالىعىنداعى ءمادەني ورىنداردى, كورىكتى جەرلەردى ارالاۋ دا ەنگىزىلگەن. اتىراۋ