سارسەنبى, 10 ءساۋىر 2013 1:40
بۇگىن استانادا قازاقستان پرەزيدەنتى جانىنداعى كاسىپكەرلەر كەڭەسىنىڭ وتىرىسى وتەدى
يگىلىكتى ىسكە نەگىز كوپ
دامىعان ەلدەردىڭ ەكونوميكاسىنىڭ باسىم بولىگىن شاعىن جانە ورتا كاسىپكەرلىك قۇرايتىنى بەلگىلى. ءبىزدىڭ ەلدە دە سوڭعى جىلدارى كاسىپكەرلىكتىڭ كەلەشەگىن كەمەلدەندىرە ءتۇسۋدىڭ ءساتتى قادامدارى جاسالۋدا. بۇل وڭىرلىك ەكونوميكالىق دامۋعا دا سونى سەرپىن بەرىپ كەلەدى.
سارسەنبى, 10 ءساۋىر 2013 1:40
بۇگىن استانادا قازاقستان پرەزيدەنتى جانىنداعى كاسىپكەرلەر كەڭەسىنىڭ وتىرىسى وتەدى
يگىلىكتى ىسكە نەگىز كوپ
دامىعان ەلدەردىڭ ەكونوميكاسىنىڭ باسىم بولىگىن شاعىن جانە ورتا كاسىپكەرلىك قۇرايتىنى بەلگىلى. ءبىزدىڭ ەلدە دە سوڭعى جىلدارى كاسىپكەرلىكتىڭ كەلەشەگىن كەمەلدەندىرە ءتۇسۋدىڭ ءساتتى قادامدارى جاسالۋدا. بۇل وڭىرلىك ەكونوميكالىق دامۋعا دا سونى سەرپىن بەرىپ كەلەدى.
ەلباسى نۇرسۇلتان نازارباەۆ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا كاسىپكەرلىكتى جان-جاقتى قولداۋدىڭ ۇكىمەت قىزمەتىنىڭ بىردەن-ءبىر ماڭىزدى باعىتى بولۋى قاجەتتىگىن قاداپ ايتۋى دا سوندىقتان. نۇرسۇلتان ءابىش ۇلى ءوز جولداۋىندا «مەن ۇكىمەتكە 2013 جىلدىڭ ءبىرىنشى جارتىجىلدىعىنىڭ سوڭىنا دەيىن قازاقستان ازاماتتارىنىڭ ءومىر-تىرشىلىگى قاۋىپسىزدىگىنە تىكەلەي ىقپال ەتپەيتىن بارلىق رۇقساتتار مەن ليتسەنزيالاردى قايتارىپ الىپ, ولاردى حابارلاندىرۋمەن اۋىستىرۋدى تاپسىرامىن» دەپ ايرىقشا اتاپ ءوتتى. شىندىعىندا دا شاعىن جانە ورتا بيزنەستى تاپ وسىلاي عانا دامىتۋعا بولادى. قازىر اكىمشىلىك كەدەرگىلەردى قىسقارتۋ ءۇشىن بارلىق رۇقسات بەرۋ قۇجاتتارىن وڭتايلاندىرۋ جانە ينۆەنتاريزاتسيالاۋ بويىنشا ۇلكەن جۇمىستار جۇرگىزىلۋدە. ليتسەنزيا مەن رۇقسات قۇجاتتارىن 30 پايىزعا دەيىن قىسقارتۋعا ۇسىنىس بەرىلدى.
ءبىزدىڭ وبلىسىمىزدا دا جىل وتكەن سايىن شاعىن جانە ورتا بيزنەس سەرپىندى دامىپ كەلەدى. بۇل ءوڭىردىڭ ىشكى رىنوگىن تاۋارلارمەن, جۇمىستارمەن جانە قىزمەتتەرمەن تولتىرۋعا ىقپال ەتىپ, سالالىق جانە اۋماقتىق مونوپوليانىڭ وسۋىنە كەدەرگى بولۋدا, ىسكەرلىك توپتار اراسىندا لايىقتى باسەكەلەستىك قالىپتاستىرۋدا.
وتكەن جىلى شاعىن جانە ورتا كاسىپكەرلىكتىڭ بەلسەندى نىساندارىنىڭ سانى 33,7 مىڭ بىرلىكتى قۇرادى. شاعىن جانە ورتا بيزنەس سالاسىندا جۇمىس ىستەيتىن ازاماتتار سانى 117,2 مىڭعا جەتىپ, 2011 جىلمەن سالىستىرعاندا, 4,2 پايىزعا ارتتى. شاعىن جانە ورتا بيزنەس نىساندارى وندىرگەن ونىمدەر, ورىندالعان جۇمىستار مەن قىزمەتتەر كولەمى 380,7 ميلليارد تەڭگە بولدى. ءسويتىپ 2011 جىلعا قاراعاندا 2,4 پايىزعا ءوستى. ولاردان بيۋدجەتكە 107,7 ميلليارد تەڭگە تولەمدەر ءتۇستى. وتكەن جىلدىڭ قورىتىندىسى بويىنشا شاعىن جانە ورتا بيزنەستىڭ جالپى وڭىرلىك ونىمدەگى ۇلەسى 28,2 پايىزدى قۇرادى. ال, بۇل سالادا جۇمىس ىستەيتىندەردىڭ ۇلەسى ەكونوميكالىق بەلسەندى تۇرعىنداردىڭ 27,0 پايىزى بولدى.
2012 جىلى «بيزنەستىڭ جول كارتاسى-2020» باعدارلاماسى بويىنشا وبلىسقا رەسپۋبليكالىق بيۋدجەتتەن 1824,8 ميلليون تەڭگە ءبولىنىپ, بۇل قارجى 99,0 پايىزعا يگەرىلدى. وسى كەزەڭدە اۋماقتىق ۇيلەستىرۋ كەڭەسىمەن 154 شاعىن جانە ورتا بيزنەس نىساندارىنىڭ تاپسىرىستارى ماقۇلدانىپ, باعدارلامانىڭ بارلىق باعىتتارى بويىنشا قولداۋ كورسەتىلدى. 154 كاسىپورىندا 5,7 مىڭنان استام ادام ەڭبەك ەتۋدە. وسى نىسانداردا تاعى دا 2,4 مىڭ جاڭا جۇمىس ورىنىن اشۋ كوزدەلۋدە. ولاردان 3,2 ميلليون تەڭگە سالىق تولەمدەرى اۋدارىلدى. باعدارلامانىڭ ءتورتىنشى باعىتى بويىنشا شاعىن جانە ورتا بيزنەستىڭ 5 كاسىپورنىنىڭ باسشىلارى «نازارباەۆ ۋنيۆەرسيتەتى» اق بازاسىنداعى بيزنەس مەكتەبىندە وقىدى, 17 كاسىپكەر «ىسكەرلىك بايلانىستار» الىپپەسىن يگەردى, ولاردىڭ سەگىزى گەرمانيا مەن اقش-تىڭ كاسىپورىندارىندا تاجىريبەدەن ءوتىپ كەلدى.
كاسىپكەرلەردىڭ پىكىرلەرى بويىنشا, ۇدەمەلى يندۋستريالىق- يننوۆاتسيالىق دامۋ باعدارلاماسى ءوز ىستەرىن جۇرگىزۋگە ۇلكەن كومەك, ال قازاقستاننىڭ يندۋستريالاندىرۋ كارتاسى جوبالاردى جۇزەگە اسىرۋداعى وزىندىك GPS-ناۆيگاتور بولىپ تابىلادى. ەلىمىزدىڭ يندۋستريالاندىرۋ كارتاسىنا 632,8 ميلليارد تەڭگە بولاتىن 73 اقتوبەلىك جوبا ەنگىزىلدى, بۇل جوبالار جۇزەگە اسقاندا 10 مىڭنان استام جاڭا جۇمىس ورنى اشىلادى. ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسى جۇزەگە اسىرىلا باستاعان 3 جىلدا 64 جوبا پايدالانۋعا بەرىلىپ, 188,3 ميلليارد تەڭگە ينۆەستيتسيا يگەرىلدى, 5 مىڭنان استام ادام ەڭبەككە تارتىلدى. باعدارلاما جۇزەگە اسىرىلاتىن العاشقى بەس جىلدا جالپى قۇنى 1 تريلليوننان استام تەڭگە تۇراتىن 100 نىسان ىسكە قوسىلىپ, مەتاللۋرگيا ونىمدەرى ءۇش, حيميا سالاسىنىڭ ونىمدەرى ەكى ەسەلەنەتىن بولادى, مەتالل جانە حيميا ونىمدەرىن ەكسپورتقا شىعارۋ اناعۇرلىم ارتادى. جۇمىس ىستەپ تۇرعان كاسىپورىنداردى جاڭعىرتۋ جانە جاڭا ءوندىرىس ورىندارىن اشۋ ەسەبىنەن اۋماقتىق ءونىم كولەمىندەگى وڭدەۋ ونەركاسىبىنىڭ ۇلەسى 13,0 پايىزعا دەيىن ارتادى, وڭدەۋ ونەركاسىبىندەگى ەڭبەك ونىمدىلىگى 1,5 ەسە, وبلىستاعى ايماقتىق ءونىم كولەمى 2015 جىلعا ەكى ەسە وسەدى. سونداي-اق, ءبىزدىڭ ايماقتا وڭدەۋ سەكتورىندا جوعارى تەحنولوگيالى بىرقاتار كاسىپورىندار قۇرۋعا مۇمكىندىك بەرەدى.
ۇستىمىزدەگى جىلى قازاقستاننىڭ يندۋستريالاندىرۋ كارتاسىنا ەنگىزىلگەن جالپى قۇنى 239,0 ميلليارد تەڭگە بولاتىن 5 جوبانى جۇزەگە اسىرۋ جوسپارلانىپ وتىر. بۇل كاسىپورىنداردا 1 مىڭ جاڭا جۇمىس ورنى اشىلادى دەپ كۇتىلۋدە. بۇدان باسقا 18,6 ميلليارد تەڭگە تۇراتىن 14 ينۆەستيتسيالىق جوبا ىسكە قوسىلىپ, 600 ادام جۇمىسپەن قامتاماسىز ەتىلەتىن بولادى. قازىر ولاردىڭ باستاماشىلارى يندۋستريالاندىرۋ كارتاسىنا ەنگىزۋ ءۇشىن قۇجاتتارىن يندۋستريا جانە جاڭا تەحنولوگيالار مينيسترلىگىنە دايىنداۋدا. وسىلاي 2013 جىلى 130,0 ميلليارد تەڭگەنىڭ 17 جوباسى جۇزەگە اسىرىلىپ, 1 مىڭنان استام جاڭا جۇمىس ورنى اشىلاتىن بولادى.
«ونىمدىلىك-2020» بيزنەستىڭ جول كارتاسى-2020», «ەكسپورتتاۋشى-2020» باعدارلامالارى اياسىنداعى ناقتى مەملەكەتتىك قولداۋ شاعىن جانە ورتا بيزنەسكە تەك ينۆەستيتسيا تارتۋعا عانا ەمەس, ولاردىڭ ينتەللەكتۋالدىق مۇمكىندىگىن مولايتۋعا, سونداي-اق, الىس-جاقىن شەتەلدەردىڭ بيزنەس قاۋىمداستىعىمەن بىرگە قادام باسۋىنا كومەك بەرەدى. «ونىمدىلىك-2020» باعدارلاماسىنا وبلىستىڭ جەتى كاسىپورنى قاتىسۋدا. ولاردىڭ ۇشەۋى «قازاقستان يندۋستريالىق دامۋ ينستيتۋتى» اق-تان قولداۋ تاپتى, ەكەۋىنىڭ قۇجاتتارى قارالۋدا, ال, ەكەۋى باعدارلاماعا قاتىسۋعا قۇجاتتارىن دايىنداۋدا. وسى اكتسيونەرلىك قوعام بەس كومپانيامەن ىنتىماقتاستىق تۋرالى مەموراندۋمعا قول قويدى. «اقتوبە» اوك» ۇك» اق-پەن بىرلەسە وتىرىپ, باعدارلامالاردىڭ تەتىكتەرىن ءتۇسىندىرۋ بويىنشا جۇمىستار جالعاسىن تابۋدا. سونداي-اق, ءبىز «ەكسپورتتاۋشى-2020» باعدارلاماسىن جۇزەگە اسىرۋ بويىنشا ناقتى جۇمىس ىستەۋدەمىز. ەكسپورتتاۋشىلاردىڭ ايماقتىق كەڭەسى قۇرىلدى, ولاردى قولداۋدىڭ 2011-2014 جىلدارعا ارنالعان باعدارلاماسى جاسالىپ, بەكىتىلدى, شيكىزاتتىق ەمەس ەكسپورتتى مەملەكەتتىك قولداۋ شارالارى تۇسىندىرىلۋدە, وتكەن جىلى ازەربايجاننىڭ استاناسى باكۋگە جانە تاتارستاننىڭ استاناسى قازانعا ساۋدا ميسسياسى ۇيىمداستىرىلىپ, كاسىپكەرلەر ىسكەرلىك بايلانىستار ورناتتى. بيىل مۇنداي ساۋدا ميسسياسىن باشقۇرتستانعا جانە رەسەيدىڭ كالۋگا قالاسىنا ۇيىمداستىرۋ جوسپارلانۋدا. مىنە, وسىنىڭ بارلىعى ەكونوميكالىق ىلگەرىلەۋگە يگىلىكتى نەگىز قالايدى دەگەن سەنىمدەمىز.
مارات بالمۇحانوۆ,
اقتوبە وبلىستىق كاسىپكەرلىك جانە
ونەركاسىپ باسقارماسىنىڭ باستىعى.