ويىننىڭ ءبىرىنشى كەزەڭى قارسىلاس كوماندانىڭ باسىمدىعىمەن اياقتالعان بولاتىن.
ەكىنشى كەزەڭنىڭ العاشقى مينۋتىنان رۋمىن ويىنشىلارى ءبىزدىڭ كوماندانى تىقسىرا باستادى. كەزدەسۋدىڭ 50-مينۋتىنا دەيىن ولاردىڭ گول سوعاتىن بىرنەشە مۇمكىندىگى بولدى. دەسە دە ونى الاڭ يەلەرى ءتيىمدى پايدالانا العان جوق.
ال 73-مينۋتتا بيلەل ومراني تاعى ءبىر سوعىپ كەتتى. تابلودا چفر كومانداسىنىڭ پايداسىنا 3:1 ەسەبى جانىپ تۇردى. ويىننىڭ سوڭىندا «استانا» شابۋىلشىسى رانگەلو يانگا گول سوعاتىن مۇمكىندىكتى ءمۇلت جىبەرىپ الدى.
كەزدەسۋدە چفر كومانداسى «استانانى» 3:1 ەسەبىمەن جەڭىپ كەتتى. ناتيجەسىندە جارىستىڭ كەلەسى ساتىسىنا رۋمىن كومانداسى جولداما الدى. ەندى ولار 23 جانە 30 شىلدە كۇندەرى ءيزرايلدىڭ «ماككابي» (تەل-اۆيۆ) كومانداسىمەن كەزدەسەدى.
ەندى «استانا» UEFA ەۋروپا ليگاسىندا سىنعا تۇسەدى. ەلوردالىق كلۋب اتالمىش ءتۋرنيردىڭ ەكىنشى ىرىكتەۋ كەزەڭىندە اندوررانىڭ «سانتا-كولوما» كومانداسىمەن وينايدى. ويىندار 23 شىلدە جانە 1 تامىز كۇندەرى بولادى.
ەستەرىڭىزگە سالا كەتەلىك, ەكى كوماندا اراسىنداعى العاشقى كەزدەسۋ ەلوردادا وتكىزىلدى. بۇل ويىندا «استانا» 1:0 ەسەبىمەن باسىم تۇسكەن بولاتىن.
«استانا» ايتۋلى الامانعا بيىل بەسىنشى جىل قاتارىنان قاتىستى. بۇدان بۇرىنعى جىلداردا ءبىر مارتە ۋەفا چەمپيوندار ليگاسىنىڭ توپتىق كەزەڭىندە س توبىندا سىنعا ءتۇستى. قالعان جىلداردا اتالمىش ءتۋرنيردىڭ ءۇشىنشى جانە پلەي-وفف كەزەڭدەرىندە ءسۇرىنىپ, ناتيجەسىندە ۋەفا ەۋروپا ليگاسى توپتىق كەزەڭىندە باق سىنادى.
العاشقى ءۇش جىلدا بولگار مامانى ستانيمير ستويلوۆ كومانداعا باپكەرلىك جاساسا, بىلتىر ونى جەرگىلىكتى باپكەر گريگوري بابايان اتقاردى.
سونداي-اق, 18 شىلدەدە قازاقستاندىق ءۇش كلۋب UEFA ەۋروپا ليگاسى ءبىرىنشى ىرىكتەۋ كەزەڭىندەگى قارىمتا كەزدەسۋ ويىندارىن وتكىزەدى. ءوز الاڭىندا نۇر-سۇلتان ۋاقىتىمەن 18.00-دە قوستانايدىڭ «توبىلى» ليۋكسەمبۋرگتىڭ «جەنەسس ەش», 20.30-دا الماتىنىڭ «قايراتى» بوسنيا جانە گەرتسوگوۆينانىڭ «شيروكي بريەگ» كلۋبىن قابىلداسا, سىرت الاڭدا 23.00-دە شىمكەنتتىڭ «ورداباسى» كلۋبى گرۋزيانىڭ «تورپەدو» (كۋتايسي) كومانداسىمەن شەبەرلىك بايقاسادى.