ۇلتتىق قوعامدىق سەنىم كەڭەسىنىڭ قۇرامىنا جەرگىلىكتى بيلىك ورگاندارىنىڭ جانىنان قۇرىلعان قوعامدىق كەڭەستىڭ وكىلدەرى دە شاقىرىلاتىن بولادى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا قر پرەزيدەنتىنىڭ كەڭەسشىسى, ۇلتتىق قوعامدىق كەڭەستىڭ حاتشىسى ەرلان قارين مالىمدەدى دەپ حابارلايدى ortcom.kz ءتىلشىسى.
«پرەزيدەنت جارلىعىمەن قابىلدانعان ۇلتتىق كەڭەستىڭ ەرەجەسىندە بۇل كەڭەستىڭ ماجىلىستەرى مەن وتىرىستارىنا ۇلتتىق كەڭەسكە ەنگەن ازاماتتارمەن قاتار, ايماقتاردا جەرگىلىكتى بيلىك جانىنان قۇرىلعان قوعامدىق كەڭەستىڭ وكىلدەرى دە قاتىساتىن بولادى»,- دەدى ەرلان قارين.
سونىڭ ناتيجەسىندە ۇلتتىق كەڭەستە تالقىلاناتىن ماسەلەلەر جالپى رەسپۋبليكالىق كولەمدە, سونىمەن قاتار, جەكەلەگەن ايماقتاردىڭ كوزقاراسىمەن دە تالقىلاۋ مۇمكىندىگىنە يە بولاتىنىن ايتىپ ءوتتى.
«سونىمەن قاتار, جۇمىس توپتارى ءوز جۇمىسى بارىسىندا جەكەلەگەن تاقىرىپتار بويىنشا ارنايى كوشپەلى وتىرىستاردى بەلگىلى ءبىر ايماقتاردا دا وتكىزۋ قاراستىرىلعان. سوندىقتان ايماقتىڭ وكىلدەرى ۇلتتىق كەڭەستىڭ جۇمىسىنا بارىنشا كەڭىرەك تارتىلاتىن بولادى», - دەدى ۇلتتىق قوعامدىق كەڭەستىڭ حاتشىسى ەرلان قارين.