پوليتسيا قىزمەتكەرلەرى مەن جۋرناليستەر ءار ەرىكتىگە «ەسىرتكىگە جول جوق!» جەيدەسى مەن بوياۋلار ۇلەستىردى. ءتارتىپ ساقشىلارى مەن ۆولونتەرلەردەن, جۋرناليستەردەن قۇرالعان توپ قالانىڭ شاعىن اۋداندارىن ارالاپ, ۇيلەردىڭ قابىرعاسىنا جازىلعان ەسىرتكى جارناماسىن ءوشىردى. اكتسياعا قاتىسۋشىلار جۇمىسىن قالا ورتالىعىنداعى مايلين كوشەسىندەگى 16 ۇيدەن باستادى. ودان كەيىن 8-ءشى شاعىن تۇرعىن اۋدانىندا ورنالاسقان № 16 جانە 17 ۇيلەردى جارنامادان تازالادى. ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرى, پوليتسيا مايورى ايگۇل ەرادىلوۆا قالا تۇرعىندارىن وسىنداي جازبالاردى بوياپ, ءوشىرىپ تاستاۋعا شاقىردى.
«كوبىنەسە جاستار اۋەسقويلىقتان وسى جازبالارعا ەرىپ كەتەدى, سينتەتيكالىق ەسىرتكىلەرگە تاپسىرىس بەرۋدى ۇسىناتىن كۇدىكتى مازمۇنى بار سايتتاردى تابادى. ءبىز وسىعان قارسى كۇرەسەمىز, ەسىرتكى تاراتۋشىلاردى انىقتاۋ جۇمىستارىن جۇرگىزەمىز. ماسەلەن, جاقىندا عانا اۆتوبۋس ايالداماسىندا گرافيتتي (ەسىرتكىنى جارنامالاۋ) سالعانى ءۇشىن 2 جاس جىگىت ۇستالدى, ولار اكىمشىلىك جاۋاپكەرشىلىككە تارتىلدى. جىل باسىنان بەرى بۇل 30-شى اكتسيا» دەيدى ايگۇل ەرادىلوۆا.
مۇنداي جازبالاردى تۇرعىن ۇيلەردە, ايالداما پاۆيلوندارىندا, گاراجداردا كەزدەستىرۋگە بولادى. ءبىر كۇن ىشىندە قاتىسۋشىلار وسىنداي وتىزدان استام مەكەنجايدى بويادى.
«ءبىز ەسىرتكىمەن بايلانىستى قانداي دا ءبىر قىلمىستىڭ الدىن الۋعا قاتىسقانىمىزعا قۋانىشتىمىز. بۇل ءبىز ءۇشىن وتە قىزىقتى. ويتكەنى بۇل جەردە جاستاردىڭ ءومىرىن باسقا ارناعا بۇرىپ جىبەرەتىن ەسىرتكىگە قارسى ءوز ەركىمەن كۇرەسىپ جۇرگەن جاقسى ادامدارمەن بىرگە جۇرەتىنىڭدى تۇسىنەسىڭ» دەدى قوستاناي قالاسىنداعى №16 مەكتەپتىڭ وقۋشىسى جانە «جاس سارباز» اۋلا كلۋبىنىڭ وكىلى ەليزاۆەتا راديونوۆا.
سونداي-اق, ءتارتىپ ساقشىلارى سينتەتيكالىق ەسىرتكىنى ساتۋ فاكتىلەرىن بايقاسا ونى جەدەل حابارلاۋ كەرەكتىگىن باق كومەگى ارقىلى جۇرتشىلىقتىڭ نازارىنا سالدى. پوليتسيا قىزمەتكەرلەرى حابارلامانى العاننان كەيىن ونى تەكسەرەدى جانە ول راستالعان جاعدايدا قىلمىستىق ارەكەتتىڭ جولىن كەسۋ جونىندە قاجەتتى شارالار جۇرگىزەدى.
قوستاناي