ورتالىق كوممۋنيكاتسيالار قىزمەتىنىڭ الاڭىندا وتكەن ءباسپاسوز كونفەرەنتسياسىندا اتالعان ءىس-شارانىڭ جاي-جاپسارى باياندالدى. الدىمەن «Jas Otan» جاستار قاناتىنىڭ توراعاسى داۋلەت كارىبەك «Jastar alańy 2019» پىكىرسايىس ءتۋرنيرىنىڭ ەرەكشەلىكتەرى تۋرالى ايتىپ بەردى.
– تۇشىمدى وي, ورىندى ءسوز الەمدەگى بولىپ جاتقان كوپتەگەن كەلەڭسىز جاعدايلاردى رەتتەۋگە زور ىقپالىن تيگىزەدى. سوزگە توقتاۋ, بىتىمگەرلىك, ىمىراشىلدىق – قازاقتىڭ قانىنا سىڭگەن جاقسى قاسيەتتەرى. سوندىقتان جاستاردىڭ وي-پىكىرىن قالىپتاستىرۋ, قازاقستانداعى پىكىرسايىس الاڭدارىن قايتا جانداندىرۋ ءۇشىن بيىل اقپارات جانە قوعامدىق دامۋ مينيسترلىگىمەن بىرگە وسى ۇلكەن جوبانى ىسكە اسىرۋدى قولعا الدىق. جوبا اياسىندا جاستاردى تەك پىكىرسايىسقا قاتىستىرىپ قانا قويماي, ولاردىڭ وقىپ, بىلىمدەرىن كەڭەيتۋىنە دە جاعداي جاسالادى. سونداي-اق تورەشىلەرگە دە ارنالعان ترەنينگتەر وتەدى. جالپى, جاستار الاڭىنا 120 جاس جينالادى. جوبانىڭ تاعى ءبىر ەرەكشەلىگى, ونىڭ ارنايى سايتى جاساقتالادى, ءموبيلدى قوسىمشاسى دا ازىرلەنەدى. وندا تىركەلگەندەر جۇيەلى تۇردە سوڭعى ماعلۇماتتارعا قانىعىپ, پىكىرسايىسشىلاردىڭ رەيتينگىن, جەتىستىكتەرىن باقىلاپ وتىرادى. مۇنىڭ ءبارى – پىكىرسايىسشىلاردىڭ قوعام نازارىنان تىس قالماۋعا, شىعارماشىلىق باعىتتارىن دامىتۋعا وتە ۇلكەن مۇمكىندىك, – دەدى د.كارىبەك.
بۇدان كەيىن «ازاماتتىق باستامالاردى قولداۋ ورتالىعى» كەاق باسقارما توراعاسى باتيما مۋكينا جاستار جىلى اياسىندا قولعا الىنعان جوبالارعا توقتالدى. ونىڭ ايتۋىنشا, ورتالىق 109 الەۋمەتتىك جوبانى جۇزەگە اسىرىپ جاتىر ەكەن. سونىڭ ىشىندە 44 جوبا جاستاردى قولداۋعا باعىتتالىپتى. وسى ورتالىق ۇيىمداستىرعان كونكۋرستىڭ گرانتى اتالعان پىكىرسايىس ءتۋرنيرىن ۇيىمداستىرۋعا سەپ بولىپتى. «Jastar alańy 2019» پىكىرسايىس ءتۋرنيرىنىڭ جالپى جۇلدە قورى – 4 ملن تەڭگە.
بلوگەر, «حا-حا» جوباسىنىڭ اۆتورى اقسۇلتان قاليەۆ بۇل تۋرنير بۇرىنعى «ازامات» پىكىرسايىس باعدارلاماسىنان كەيىنگى ەلىمىزدەگى بارلىق پىكىرسايىسشىنىڭ باسىن بىرىكتىرەتىن, جاڭا ماقساتتارعا ۇمتىلۋعا سەرپىن بەرەتىن جۇيەلى جوبا بولاتىنىنا سەنىم ءبىلدىردى.