اۋرۋ اتىنا سايكەس, ناۋقاستىڭ تەرىسى كوبەلەك قاناتى ىسپەتتى ءۇلبىرەپ, ءارى كۇلدىرەپ, قىشىپ, قابىرشاقتانىپ تۇرادى. ءومىر بويى كۇتىمدى قاجەت ەتەتىن كۇلدىرەگەن جارالار ءتىپتى, بولىمسىز جاراقاتتاردان دا, كەيدە ءبىردەن وزدىگىنەن پايدا بولا بەرەدى. جازىلمايتىن اۋرۋ, جۇقپايدى, ناقتى ءبىر گەندەردىڭ مۋتاتسيالانۋىنان پايدا بولىپ, تۇقىم قۋالايدى. قۇرساقتا جاتقان كەزدە-اق كلينيكالىق بەلگىلەرى بىلىنەتىن دەرتپەن تۋعان بۇل بالالار ەرەكشە كۇتىمدى قاجەت ەتەدى. اۋرۋدى اسقىندىرماۋ ءۇشىن ماماندارعا عانا ەمەس, اتا-اناسىنا دا كوپ قاجىر-قايرات جۇمساۋعا تۋرا كەلەدى.
ال قازاقستاندا ءتۋابىتتى بۋللەزدى ەپيدەرموليز دياگنوزى قويىلعان 56 بالا بار. ونىڭ 50%-ى 5-15 جاس ارالىعىندا.
جاقىندا الماتىداعى پەدياتريا جانە بالالار حيرۋرگياسى عىلىمي ورتالىعىندا «قازاقستانداعى بۋللەزدى ەپيدەرموليزگە شالدىققان ناۋقاس بالالاردى ەمدەۋ, دياگنوستيكالاۋ مەن مەديتسينالىق كومەك بەرۋدىڭ زاماناۋي اسپەكتىلەرى» تاقىرىبىندا سەمينار وتكەن ەدى. پەدياتريا ورتالىعى مەن «كوبەلەك بالالار» قايىرىمدىلىق قورىنىڭ ۇيىمداستىرۋىمەن وتكەن سەمينارعا ەلىمىزدىڭ بارلىق ايماعىنان دەرماتولوگ, دەرماۆەنەرولوگ, كارديورەۆموتولوگ, پەدياتر ماماندارىمەن قاتار قر دەرماتولوگيا جانە جۇقپالى اۋرۋلار عىلىمي ورتالىعىنىڭ دارىگەرلەرى قاتىستى.
شەبەرلىك سىنىبىنا ماسكەۋدەگى Mölnlycke Health Care كومپانياسىنىڭ قولداۋىمەن, وسى دەرتتى ەمدەۋگە ماشىقتانعان حالىقارالىق گەنەتيكالىق دەرماتوزدار قاۋىمداستىعىنىڭ دارىگەرلەرى ارنايى شاقىرىلدى.
رەسەيلىك ماماندار سەميناردا بۋللەزدى ەپيدەرموليزگە شالدىققان بالالاردى ەمدەۋ مەن دياگنوستيكالاۋ, مەديتسينالىق جوعارى دەڭگەيدە كومەك كورسەتۋ, زاماناۋي تاڭعىشتاردى پايدالانۋدىڭ ءادىستەرى, جاڭا تۋعان نارەستەلەر مەن بالالاردىڭ نەوناتالدىق جانە پەدياتريالىق اسپەكتىلەرى بويىنشا ءدارىس وقىپ, رەسەيدىڭ كەشەندى ەمدەۋ تاجىريبەسىمەن ءبولىستى.
سەمينار اياسىندا ماماندار «كوبەلەك اۋرۋىنا» شالدىققان بالالاردى قاراپ, شەبەرلىك سىنىپقا قاتىسۋشىلار مەن اتا-انالاردى مازالاعان سۇراقتارىنا جاۋاپ بەردى.