جۇما, 4 قاڭتار 2013 7:51
«قازاقستاندا ەكى قولعا ءبىر كۇرەك تابىلاتىن جۇمىس كوپ, ولاردىڭ تەك جولىن تابا ءبىلۋ كەرەك. نارىقتىق ەكونوميكا بىزدەن ادال ەڭبەكپەن قوعام ءۇشىن دە, ءوزىڭ ءۇشىن دە قىزمەت ەتۋدى تالاپ ەتىپ وتىر. سوندىقتان بارشاڭىزدى ەڭبەك ەتۋگە شاقىرامىن».
نۇرسۇلتان نازارباەۆ.
جۇما, 4 قاڭتار 2013 7:51
«قازاقستاندا ەكى قولعا ءبىر كۇرەك تابىلاتىن جۇمىس كوپ, ولاردىڭ تەك جولىن تابا ءبىلۋ كەرەك. نارىقتىق ەكونوميكا بىزدەن ادال ەڭبەكپەن قوعام ءۇشىن دە, ءوزىڭ ءۇشىن دە قىزمەت ەتۋدى تالاپ ەتىپ وتىر. سوندىقتان بارشاڭىزدى ەڭبەك ەتۋگە شاقىرامىن».
نۇرسۇلتان نازارباەۆ.
«قازاقستاننىڭ الەۋمەتتىك جاڭعىرتىلۋى:
جالپىعا ورتاق ەڭبەك قوعامىنا قاراي 20 قادام» ماقالاسىنان
___________________________
«تاكسيست» – گۇلشارا مىڭبايقىزى…. وسى ءبىر قارا تورى ءجۇزدى, ورتا بويلى, شيراق قيمىلدى, كىمدى دە بولسا ك ۇلىمدەي قارسى الاتىن ەگدە تارتقان ايەل ادامدى تەك ماڭعىستاۋ اۋدانىنداعىلار ەمەس, وبلىس ءوڭىرىنىڭ دە ادامدارى ءجيى كورەدى. تانىس. ويتكەنى, ول ماڭعىستاۋدىڭ تۇكپىر-تۇكپىرىن قىسى-جازى شارلاپ ءجۇر. جولاۋشىلار قايدا قالاسا سول جاققا تەز جۇرە بەرەدى. «ايەلدىڭ اۆتوماشيناعا ءالى كەلمەيدى», دەگەن پىكىر ءوزىن اقتاماعالى قاشان. ال مامانداردىڭ ايتۋى بويىنشا, ولار ناعىز ۇقىپتى جۇرگىزۋشىلەر.
ول جىگىتتەردىڭ قيمىلىنا ءتان بولمىسىمەن جول ۇستىندە زاۋلاپ كەلە جاتادى. جاسى جاسامىس تارتسا دا جىگەرى وتتى, قايراتى مىعىم. وسىدان ون جىل بۇرىن تاكسيست بولعاندا قايسى بىرەۋلەردىڭ: «مىنا گۇلشاراعا نە بولعان, باسقا كاسىپ تاپپاعانداي…» دەپ پىش-پىش اڭگىمەگە ارقاۋ قىلدى. راسىندا دا, بۇكىل اۋداندا «شاپقىلاپ» جۇرگەن جالعىز عانا گۇلشارا بولدى. العاشىندا سول قيمىلىمەن كوپتى تاڭداندىرعانى راس.
گۇلشارا كولىككە وتىرعالى بەرى ءتورت جىل «موسكۆيچ 412», ءتورت جىل «جيگۋلي 2106» كولىگىن جۇرگىزىپ توزدىرعان ەكەن. ال قازىرگىسى كوك جاسىل ءتۇستى «وپەل» اۆتوماشيناسى. بۇل جارىقتىق تا باۋىرىمەن جەر سىزىپ, جۇلدىزداي اعىپ, ءازىر سىر بەرەر ەمەس. «موسكۆيچ» ەسكىلىكتى دەگەنمەن ىستىق-سۋىققا بىردەي بولاتىن. جول بويى بۇزىلا قالسا «تۇمسىعىنان» تارتىپ و جەر, بۇ جەرىن جىپپەن بايلاپ, ايتەۋىر ءبىر قاراعا جەتكەنىمىز دە بار ەدى», دەپ كەيىپكەرىمىز ءسوز اراسىندا ك ۇلىپ قويادى.
ءيا, گۇلشارانى كورگەن ايەلدەر جاعى وزدەرىنىڭ كولىكتى ەرلەردەن كەم جۇرگىزبەيتىندىگىنە ماقتاناتىن كورىنەدى. ولار تاكسي قاجەت بولعان جاعدايدا ارينە, ەڭ الدىمەن وسى قۇربىسىن شاقىرتادى.
– ۋاقىتپەن ساناسپاي جول بويى جۇرگەندە قاۋىپتەنبەيسىز بە؟ – دەپ سۇرادىق ءبىز.
– جاسىراتىنى جوق, تاكسي جۇرگىزۋشىلەردىڭ كەزدەيسوق وقىس وقيعالارعا, كوشە كەزگەن كەيبىر بۇزاقىلاردىڭ كەسىرىنەن ءتۇرلى قاۋىپ-قاتەرگە ۇشىراپ جاتقاندىعى ايتىلىپ قالادى. سوڭعى جىلدارى مۇنداي كەلەڭسىز جاعدايلار اقتاۋ قالاسىندا دا ورىن الدى. سوندىقتان ساقتىق كەرەك. دەگەنمەن, نازىك جانداردى ەسكەرىپ, تەنتەكتەر دە تەزگە كەلەدى-اۋ دەيمىن.
ماعان وندايلار كەزىككەن ەمەس. جۇمىس بارىسىندا ماساڭداۋ كليەنتتەردى, توبەلەسىپ جاراقات العانداردى اراكىدىك كەزدەستىردىم. مەن وندايلاردى الداپ-سۋلاپ «بالام» دەپ, «ىنىشەك» دەپ جەتەر جەرىنە جەتكىزىپ تاستايمىن.
– ولار سىزگە جول اقىسىن تولەي مە؟
– كەيبىرەۋى تولەمەيدى. «قۇتىرعاننان قۇتىلعان», دەپ جۇرە بەرەتىنىم بار. سوسىن مەن قۋانىشتى دا, قايعىلى دا نەشە ءتۇرلى كوڭىل-كۇيدەگى ادامدارمەن ساپارلاس بولامىن. وندايعا ابدەن پسيحولوگ بولىپ العان سياقتىمىن. قينالىپ وتىرعان كليەنتكە ءسال دە بولسا مورالدىق قولداۋ كورسەتىپ, ال قۋانىپ كەلە جاتقانداردىڭ جىلى سەزىمىنە ورتاقتاسىپ وتىرامىن. ايتپاقشى, كليەنتتەر ءۇشىن مەن كوبىنەسە ماشينامداعى ءشامشىنىڭ اندەرىن جىبەرىپ, شەتەلدىك ايقاي-ۇيقاي اندەردى قوسقان ەمەسپىن.
– ءسىز مەيرام كۇندەرى دە جۇرە بەرەسىز بە؟
– ءبىز ۋاقىتپەن ساناسپايمىز. سەنبى, جەكسەنبى كۇندەرى جۇمىستىڭ ناعىز قىزاتىن كەزى. مۇندايدا «تەمىر تۇلپار» قاڭتارۋلى جورىققا ءازىر تۇرادى. بىلايعى كۇندەرى دە دەمالىس جەتەدى, ءوز بيلىگىم وزىمدە عوي…
گۇلشارا اپاي وسى ون جىلدىڭ ىشىندە بىردە ءبىر رەت بىرەۋدى سوعىپ كەتىپ نەمەسە بىرەۋگە سوعىلىپ كورمەگەن. سەبەبى, ول جولدا كەلە جاتىپ, بولىپ قالۋ ىقتيمال دەگەن وقيعانى ەسەپكە الادى. الدىندا كەتىپ بارا جاتقان كولىكتى قۋىپ جەتىپ, باسىپ وزبايدى. بۇرىلىس, قالتارىستا وتە ساق جۇرەدى. ونىڭ كولىگى كەي رەتتە قارلى بوران, كوكتايعاقتا دا جۇرەدى. جول قاۋىپسىزدىگى ەرەجەلەرىن بۇزبايدى. اقتاۋدا نە جاڭاوزەندە ءتۇن ىشىندە كەلە جاتىپ, باعدارشامنىڭ «قىزىل كوزىن» «قۇداي ساقتاسىن, مەزگىلسىز ۋاقىتتا كىم باعىپ تۇر دەيسىڭ» دەپ جولدى كەسىپ وتە شىققان ەمەس. ەرەجە بۇزۋ وسىندايلاردان باستالادى عوي. بىراق ول ەل قاتارلى ورتاشا جىلدامدىقتان اينىمايدى.
– الىس جولدا ماشيناڭىز سىر بەرىپ, دوڭگەلەگى جارىلىپ قالسا, نە باسقا ءبىر كىلتيپانى بولىپ جاتسا بىرەۋدىڭ كومەگىن كۇتىپ, تۇرىپ قالمايسىز با؟
– ەشكىمگە دە جالىنبايمىن. ماشينادا تەحنيكالىق اقاۋدىڭ بولماۋى ءۇشىن الدىن-الا كولىك جوندەۋ شەبەرحاناسىنا بارىپ, ءجيى-ءجيى تەكسەرتىپ تۇرامىن.
– گۇلشارا اپاي, ەندى وتباسىڭىز تۋرالى ايتساڭىز.
– قۇداي بەرگەن اداممىن. ءتورت قىز, ءۇش ۇلىم بار. ەكى بالام ۇيلەنىپ, شاڭىراق كوتەردى. ءۇش قىزىم تۇرمىس قۇردى. ءبىر بالام قولىمدا. كەنجە قىزىم اينۇر اقتاۋداعى ش.ەسەنوۆ اتىنداعى ۋنيۆەرسيتەتتىڭ ستۋدەنتى. بالالارىم دا جانە قىزدارىم دا جوعارى جانە ارناۋلى ءبىلىم الدى. ولار دا تەحنيكاعا ۇيىرسەك…
– تاعى ءبىر ساۋال بار؟
– ايتا بەر.
– ءسىز دومبىرا تارتىپ, ءان سالادى دەسەدى عوي؟
– مەن ونەر ورداسى اتانعان جىڭعىلدى اۋىلىنىڭ تۋماسىمىن. ال بىزدە تورىندە قارا دومبىراسى تۇرماعان ءۇيدى كەزدەستىرمەيسىز. ءبىز ەسىر كۇيشىنىڭ ۇرپاقتارىمىز. ول بابامىز كۇي اتاسى, حالىق كومپوزيتورى بولعان ادام. اكەم مىڭباي دا اتاقتى كۇيشى ەدى. 1957 جىلى ماسكەۋدەگى جاستار مەن ستۋدەنتتەردىڭ بۇكىلدۇنيەجۇزىلىك VI فەستيۆالىنە قاتىسقانىن بۇل كۇندەرى بىرەۋ بىلسە دە, بىرەۋ بىلمەيدى.
سوزگە شەشەن, كوڭىلدى قالىپتاعى گۇلشارا اپايدى مەن ەسكەرتكىشكە سۋرەتكە ءتۇسىرىپ الدىم. سودان كەيىن ول كىسى فورت-شەۆچەنكو قالاسىنا تويعا ادامدار الىپ جۇرەتىنىن ايتىپ, رولگە وتىرا بەردى.
اللابەرگەن قونارباەۆ,
قازاقستان جۋرناليستەر
وداعىنىڭ مۇشەسى.
ماڭعىستاۋ وبلىسى,
ماڭعىستاۋ اۋدانى.