نارىقتىڭ سۇرانىمى قاشان دا ساپالى جانە باعاسى تومەن بۇيىمدى تالاپ ەتەدى. مىسالى, بۇكىل جەردە استىقتى كەپتىرۋ, تازالاۋ جۇمىستارى تەحنيكاسىز اتقارىلمايدى. دامىلسىز پايدالانىلاتىن تەحنيكالاردىڭ قوسالقى بولشەكتەرى تەز توزادى. شەت جەرلەردەن الۋ ديقان ءۇشىن قىمباتقا تۇسەدى. مەڭدىعارا اۋدانىنداعى «ارداگەر وكسۆا»جەكە كاسىپكەرلىگى ەكى جىل بۇرىن قوسالقى بولشەكتەردى وندىرۋگە كىرىستى. ەسەنتاي بايىمبەتوۆ باسقاراتىن شاعىن كاسىپورىن وندىرگەن قوسالقى بولشەكتەر وبلىستىق «قازاقستاننىڭ ۇزدىك تاۋارلارى» بايقاۋ- كورمەسىنە قاتىستى.
«مەن كاسىبىمدى كەڭەيتۋ ءۇشىن گرانت بايقاۋىنا قاتىستىم. ءوزىمنىڭ بيزنەسىمدى قورعادىم. ەگەر 3 ميلليون تەڭگەنىڭ گرانتىن ۇتىپ السام, وسى قوسالقى بولشەكتەردىڭ كولەمى مەن ساپاسىن كوتەرە تۇسەتىن قۇرال-جابدىقتار ساتىپ الامىن. بىزگە قازىردىڭ وزىندە وبلىس وڭىرىنەن, سولتۇستىك قازاقستان, اقمولا وبلىستارىنان سۇرانىستار ءتۇسىپ جاتىر, ويتكەنى بۇل قوسالقى بولشەكتەرسىز استىق تازالاۋ تەحنيكالارى جۇرمەيدى» دەيدى ەسەنتاي بايىمبەتوۆ.
بايقاۋ-كورمەدە ساپالى ەت ونىمدەرى مەن بال, قىمىز, شۇباتقا تۇرعان كەزەكتى كورسەڭىز. وتكەن جىلى عانا جۇمىسىن باستاعان رۋدنىي تسەمەنت زاۋىتى, «ارقالىق ەت» ەت كومبيناتى بيىل كورمەگە ءبىرىنشى رەت قاتىستى. كورمە-بايقاۋدا وبلىس اكىمى ارحيمەد مۇحامبەتوۆ بيزنەس دامىتۋ ءۇشىن مەملەكەت تاراپىنان بارلىق كومەك بەرىلەتىنىن ايتتى.
«بەس جىل ىشىندە وبلىس وڭىرىندەگى 36 كاسىپورىن ساپالى ونىمدەرىمەن بايقاۋ-كورمەنىڭ رەسپۋبليكالىق فينالىنان كورىندى. ولاردىڭ قاتارىندا ەلمىزگە, سىرت جەرلەرگە بەلگىلى بولىپ وتىرعان «بايان سۇلۋ», «ميلح», «قوستاناي ۇن كومبيناتى», «اگروماشحولدينگ» سەكىلدى جانە تاعى باسقا كاسىپورىندار بار. مۇنداي بايقاۋ-كورمەلەر وتە قاجەت, بيزنەس وكىلدەرى ءبىرى بىرىنەن ۇيرەنەدى, تاجىريبە الماسادى. بيزنەس ءۇشىن ەڭ باستىسى وندىرىلگەن ءونىمنىڭ ءوتۋى, سۇرانىسى. نارىقتى زەرتتەۋ ءۇشىن دە بايقاۋلاردىڭ ماڭىزى زور» دەدى ارحيمەد بەگەجان ۇلى.
وبلىستىڭ جالپى ىشكى ونىمىندەگى شاعىن جانە ورتا بيزنەستىڭ ۇلەسى ۇلعايىپ كەلەدى, بيىل جىل باسىنان بەرى ول 28 پروتسەنتتى قۇرادى. بايقاۋ-كورمەدە ۇزدىك كاسىپورىندار ساپا بەلگىسىمەن ماراپاتتالدى. ولار الداعى قازان ايىندا بايقاۋ-كورمەنىڭ رەسپۋبليكالىق قورىتىندى كەزەڭىندە وبلىس نامىسىن قورعايتىن بولادى.
قوستاناي