- 2015 جىلى جاساندى ۇشىپ-قونۋ جولاعىنا كۇردەلى جوندەۋ جۇرگىزىلىپ, بارلىق تۇردەگى قازىرگى زامانعى اۋە كەمەلەرىن شەكتەۋسىز قابىلداۋعا مۇمكىندىك تۋدى. الايدا تەرمينال عيماراتىنىڭ توزۋى جانە تەحنيكالىق بازانىڭ ەسكىرۋى اۋەجايدىڭ جولاۋشىلار وتكىزۋ قابىلەتىن ارتتىرۋعا جانە جاڭا اۋە باعىتتارىن اشۋعا مۇمكىندىك بەرمەيتىن. قاراپايىم سوزبەن ايتقاندا, قوناقتاردى قارسى الىپ, شىعارىپ سالعان كەزدە اۋەجايدىڭ قازىرگى كورىنىسىنەن ىڭعايسىزداناتىنبىز, - دەدى جاڭعىرتۋ جۇمىستارىنىڭ باستالۋىنا وراي وتكەن سالتاناتتى شاراعا قاتىسقان باتىس قازاقستان وبلىسىنىڭ اكىمى عالي ەسقاليەۆ.
عالي ناجىمەدەن ۇلى ايتسا ايتقانداي, ورال قالاسىنىڭ اۋەجاي عيماراتى سوناۋ سوۆەت وكىمەتى زامانىن ەسكە تۇسىرەتىن كونە عيمارات بولاتىن. ءتىپتى توقىراۋ كەزەڭىنىڭ كورىنىسىن قاز قالپىندا ساقتاپ قالعان بۇل ءمۇيىس 40-50 جىل بۇرىنعى وقيعالاردى تاسپاعا تۇسىرۋگە تاپتىرماس دەكوراتسياداي ەدى. اۋەجاي عيماراتىنىڭ ىرگەتاسى 1979 جىلى قالانسا, سودان بەرى كۇردەلى جوندەۋ كورمەپتى. ماماندار «تەرمينال 79% توزىعى جەتكەن» دەگەن شەشىم شىعارعان. اۋەجايدىڭ «حالىقارالىق» دەگەن اتىنا زاتى ساي ەمەس, جولاۋشىلارعا قولايسىز, ينفراقۇرىلىمى ناشار, شىنىندا دا مورالدىق ءھام ماتەريالدىق جاعىنان ابدەن توزعان بولاتىن. «قازاقستاننىڭ باتىس قاقپاسى» سانالاتىن ورال قالاسىنا زاماناۋي اۋەجاي قاجەتتىگى كوپتەن ايتىلىپ جۇرگەن ەدى.
قپو ب.ۆ. كومپانياسىنىڭ باس ديرەكتورى ەدۆين بلوم جوبانىڭ قارجىسى الەۋمەتتىك مىندەتتەمەلەرى شەڭبەرىندە ءبولىنىپ وتىرعانىن ايتادى. جوبانىڭ قۇنى – 2,4 ملرد. تەڭگە. جاڭعىرتۋ جۇمىستارىن 2020 جىلدىڭ سوڭىنا دەيىن اياقتاۋ جوسپارلانعان. مەردىگەرى - «KazConstructionGroup» جشس.
قايتا جاڭارتۋ ناتيجەسىندە تەرمينال اۋدانى قازىرگى 4,5 مىڭ شارشى مەتردەن 7 مىڭ شارشى مەترگە دەيىن كەڭەيەدى. سونداي-اق جولاۋشىلار سانىن جىلىنا 160-تان 350 مىڭ ادامعا دەيىن ۇلعايتۋعا مۇمكىندىك بەرەدى. «ورال» اكك اق ديرەكتورىنىڭ ءبىرىنشى ورىنباسارى ارتۋر دوسقاليەۆتىڭ ايتۋىنشا, جاڭعىرتۋ جۇمىستارىنان كەيىن حالىقارالىق باعىتتار سانى كوبەيىپ, ءوڭىردىڭ ترانزيتتىك, تۋريستىك الەۋەتى ارتا تۇسپەك. سونداي-اق تەرمينالدىڭ تەحنولوگيالىق جابدىقتارى حالىقارالىق قاۋىپسىزدىك جانە كەدەندىك باقىلاۋ تالاپتارىنا سايكەس جاڭارتىلاتىن بولادى.
سۋرەتتى تۇسىرگەن رافحات حالەلوۆ
باتىس قازاقستان