دومبىرا كۇنىنە وراي تالدىقورعان قالاسىندا ايتۋلى ءىس-شارا ءوتتى. جۋرناليستەر ءۇيىنىڭ الدىنا جينالعان قاراتال, اقسۋ, كوكسۋ, ەسكەلدى اۋداندارى مەن تالدىقورعان, تەكەلى, قاپشاعاي قالالارىنان جۇزگە جۋىق بالبارماق كۇيشىلەر تاۋلىك بويىنا كۇي تارتىپ, بەس جۇزگە جۋىق شىعارمانى الما-كەزەك ورىندادى. كۇمبىرلەگەن كۇيدىڭ ءۇنى قالا تۇرعىندارى مەن قوناقتارىن باۋراپ, كورەرمەندەر قاتارى شاقىرۋسىز كوبەيە ءتۇستى. جۋرناليستەر ءۇيىنىڭ الدىنداعى الىپ ەكراننان تىكەلەي ەفير ارقىلى كورسەتىلگەن دومبىراشىلار ونەرى جينالعانداردىڭ رۋحىن سەرپىلتىپ, قۇلاق قۇرىشىن قاندىردى.
ايتپاقشى, «دومبىرا – دالا داۋىسى» اتتى ءبۇل كۇي كەشى «قازاقستاندىق گيننەس رەكوردتار» كىتابىنا ەنەتىن بولدى. جۇزگە جۋىق دومبىراشىنىڭ 500 كۇيدى تاۋلىك بويىنا توقتاۋسىز شەرتۋى رەكوردتار كىتابىنىڭ وكىلدەرىن قىزىقتىرىپ, ەرەكشە باعالاۋدا لايىق دەپ تانىلىپتى. جەتىسۋلىق دومبىراشىلاردىڭ رەكوردتىق كورسەتكىشىن مويىنداۋ تۋرالى ارنايى سەرتيفيكاتتى «قازاقستاندىق گيننەس رەكوردتار» كىتابى دەپارتامەنتىنىڭ ديرەكتورى باقىتجان تاستۇلەكوۆ شارانىڭ ۇيىمداستىرۋشىسى, الماتى وبلىستىق ىشكى ساياسات باسقارماسىنىڭ باسشىسى رۋستام الپىسباەۆقا تابىس ەتتى.
الماتى وبلىسى