ءيا, تاعدىردىڭ تاسى ءتۇسىپ, ارباعا تاڭىلسا دا, ساناسىنىڭ وياۋلىعىمەن, جۇرەگىنىڭ جاۋىنگەرلىگىمەن اۋىرتپالىققا مويىماي, العا ۇمتىلعان جاندار ءوز ارامىزدا دا بار. ولار ەشتەڭەگە قاراماستان, تالانتىمەن, قاراپايىم ەڭبەگىمەن قوعامىمىزدىڭ دامۋىنا ۇلەس قوسىپ ءجۇر.
«نەگە, نەگە مەن؟! و, قۇدايىم, ەشكىمنىڭ الا ءجىبىن اتتاماپ ەدىم عوي...» دەگەن زاپىران ءدامدى اھ ۇرعان وكىنىشپەن وياندى ول توعىز كۇنگە سوزىلعان كومادان. 26 جاستاعى جىگىت جۇمىس ورنىندا ءوندىرىستىك جاراقات العان ەدى. بۇرعىلاۋ مەكەمەسىندە بۇرعىشىنىڭ كومەكشىسى بولىپ ەڭبەك ەتەتىن ول كۇندەگىشە جوعارىدا روتوردا ءوز مىندەتىن اتقارىپ جاتتى. بىراق بۇل كۇنى جاڭبىر ءسىركىرەپ جاۋىپ تۇرعان. سودان با, قايدام, كونۋستى تۇربانى ارنايى قۇرىلعىمەن تارتقاندا باسى تايقىپ كەتىپ, 9 مەترلىك اۋىر تۇربا بەرەكەتتىڭ يىعىنا تۇسەدى. ءناتيجەسىندە ج ۇلىنى جانشىلىپ, كەۋدە ومىرتقاسى سىنىپ, دەنەسىنىڭ تومەنگى بولىگى جانسىزدانعان.
– بۇل وقيعا 2010 جىلى 1 مامىردا بولدى. بۇل كەزدە مەن اقتاۋدا ەڭبەك ەتەتىنمىن. سودان كەيىن اياعىمنان تۇرا الماي قالدىم. دارىگەر انام بار, جان-جاقتان كونسيليۋمگە كەلگەن حيرۋرگتەر بار, اقىلداسا كەلە گەرمانيادا نەمەسە قىتايدا وتا جاساتۋعا كەڭەس بەرىلدى. مەن ۇرىمجىگە بارىپ, وتا جاساتتىم. ونداعىلار ج ۇلىن جانشىلىپ قالعانىن, ونى بەيجىڭگە بارىپ, دىڭگەك جاسۋشاسى ارقىلى قالپىنا كەلتىرۋ قاجەتتىگىن ايتتى. سودان ءبىر-ەكى جىلدان سوڭ ارباعا وتىراتىن بولدىم. قارعا ادىم جەر مۇڭ بولعان مەن ءۇشىن مۇنىڭ ءوزى ۇلكەن قۋانىش بولدى, – دەيدى جىلىويلىق بەرەكەت اقجىگىتوۆ.
مۇنداي جاعداي باسىما تۇسەدى-اۋ دەگەندى ءوڭى تۇگىلى تۇسىندە دە كورمەگەن بەرەكەت مويىمادى. قۇلازۋعا بويىن الدىرماي, كوكىرەك كوزىن اشىق ۇستاعاندىكى مە, ول قىتايدا ەمدەلىپ ءجۇرىپ-اق جاڭا ونەرگە ۇيرەندى.
– قىتايدا قالپىنا كەلتىرۋ ورتالىعىندا الدەنەنى توقىپ وتىرعان ايەلدەردى كوردىم. قىزىعۋشىلىعىم ويانىپ: «مىنالار نە ىستەپ وتىر؟» – دەيمىن جانىمداعى ادامعا. ول: «كەستە عوي, سىزدەردە مۇنداي جوق پا ەدى؟» – دەيدى. قىزدار كەستە تىكپەسە, بۇرىن مۇندايعا ءمان بەرمەيمىز عوي, – دەپ ءومىرىنىڭ جاڭا پاراعىن اشقان ونەردى قالاي ۇيرەنگەنى تۋرالى اڭگىمەسىن باستادى ول. – الگى ايەل «توقىپ كورەسىڭ بە؟» دەپ قولىنداعى ماتاسى مەن ينەسىن ۇسىنىپ, كەستەلەپ سۋرەت سالۋ ونەرىن ۇيرەتتى. باسىندا اق ماتاعا توقىدىم, كەيىن قىتايدان ارنايى سۋرەتتىڭ ورنى سىزىلعان ماتالاردى اكەلدىم.
ءسويتىپ بەرەكەت اسا توزىمدىلىكتى قاجەت ەتەتىن كەستەلەپ سۋرەت سالۋ ونەرىنە ىقىلاسپەن دەن قويدى. اتىراۋ مۇناي جانە گاز ۋنيۆەرسيتەتىنە گرانتپەن وقۋعا تۇسكەن ول وندىرىستىك سىزبالاردى شەبەر جاسايتىن. سودان با قولونەردى ەركىن مەڭگەرىپ كەتتى.
ءبىر كارتينانى جاساۋ ءۇشىن ادەتتە ءبىر ايداي ۋاقىت كەتسە, ونىڭ ەڭ ۇزاق جاساعان سۋرەتى باقانداي ءتورت ايعا سوزىلعان ەكەن. ءبىر جىلدا ون شاقتى كارتينانى اياقتايدى. ول ءۇشىن بەرەكەت كۇنىنە 7-8 ساعات ينەمەن قۇدىق قازعانداي جۇمىس ۇستىندە وتىرادى. پەيزاجدى, ناتيۋرمورتتى, جانۋارلار مەن ايەل سۇلۋلىعىن بەينەلەگەندى ۇناتاتىن تالانتتىڭ قولىنان وسى ۋاقىتقا دەيىن كەستەلەنگەن, تاس-مونشاقپەن كومكەرىلگەن سەكسەن شاقتى كارتينا تۋعان ەكەن.
الايدا كوزىنىڭ مايىن تامىزىپ جاساعان جۇمىستارى ۇيدە ەلەۋسىز ءار جەردە جاتاتىن, بىراق ءبىر كۇنى ونىڭ كارتينالارى سول كەزدەگى اۋداندىق جۇمىسپەن قامتۋ, الەۋمەتتىك باعدارلامالار جانە ازاماتتىق حال اكتىلەرىن ءتىركەۋ ءبولىمىنىڭ باسشىسى سەرىك قاميدوللانىڭ كوزىنە تۇسەدى. ونىڭ كەڭەسىمەن اتالعان بولىمدەگى ءمۇمكىندىگى شەكتەۋلى جانداردىڭ قولىنان شىققان بۇيىمداردىڭ كورمەسىنە قاتىستى. مىنە, سودان باستاپ بەرەكەتتىڭ ونەرى كوپكە تانىلا باستايدى. اتىراۋعا, استاناعا شاقىرتۋ الادى. «پانا» قوعامدىق بىرلەستىگىنىڭ مۇرىندىق بولۋىمەن ىستانبۇلداعى تۇركى الەمى سۋرەتشىلەرىنىڭ كورمەسىنە بارىپ قايتادى. 2017 جىلى ەلىمىزدە وتكەن حالىقارالىق ەكسپو كورمەسىندە دە بەرەكەتتىڭ كارتينالارى الەمنىڭ نازارىنا ۇسىنىلدى.
– تەڭىز قالاشىعىندا وتكەن شارادا اۋكتسيون بويىنشا ءتورت كارتينام 377 مىڭ تەڭگەگە باعالانىپ ساتىلدى. استانادا وتكەن فورۋمدا ءبىر كارتينامدى الدەبىر ونەر باعالاۋشى 80 مىڭعا ساتىپ الىپتى, – دەيدى ول. ال بىلتىر جىلىويدا وتكەن «كاسىپكەرلەر بالىندا» ونىڭ كارتينالارى جوعارى باعالاندى. اۋكتسيون بويىنشا كەستەلى, تاسپەن, مونشاقپەن كومكەرىلگەن كوز تارتار تۋىندىلارى 3 ملن تەڭگەگە ساتىلىپ, بۇل قاراجات جارىنان ايىرىلىپ, جەتى بالانى باعىپ قالعان جاعدايسىز جىلىويلىققا باسپاناسىن كەڭىتىپ, جوندەپ الۋعا جۇمسالدى. بەرەكەت سولايشا ءوز ونەرىمەن, ماڭدايتەرىن توگىپ جاساعان ەڭبەگىمەن ءبىر مۇقتاج وتباسىنا جاردەم بەردى.
دەگەنمەن سونشالىقتى ءتوزىم مەن يكەمدىلىكتى قاجەت ەتەتىن بۇل ونەر ودان دا قىمبات, ودان دا باعالى. ويتكەنى ءبىر عانا كەستەدەگى كرەستىڭ ءوزى 7 تەڭگە تۇرادى ەكەن. ال ماتانىڭ بەتىنە الۋان ءتۇستى جىپپەن سۋرەت سالىپ شىعۋ ءۇشىن قانشاما كەستەلەۋ كەرەك بولادى, ونى ساناپ جاتۋعا ەشكىمنىڭ جۇيكەسى شىداماس. سونى باعالاعاندىكى مە, بەيجىڭنىڭ وزىندە ءبىر كارتينا 1200 دوللار تۇرادى. ال ءبىزدىڭ جاقتا 70-80 مىڭ تەڭگەدەن جوعارى باعاعا ساتىپ الماۋى مۇمكىن. ايتسە دە بەرەكەتتى قۇر اقشا تولعاندىرمايدى, ول – ونەرىنەن ءلاززات الىپ, بەرەكە تاۋىپ وتىرعان جان.
بەرەكەتتىڭ بۇدان باسقا دا قىزىعۋشىلىعى كوپ. ول بىلتىردان بەرى مۇگەدەكتەر قوعامىندا اشىلعان تەننيس ويىنىنا دا قاتىسىپ ءجۇر. ءتىپتى وبلىس ورتالىعىنا بارىپ, جارىسقا دا قاتىسقان. «جارىستا ۇتىلىپ قالدىم, بىراق بۇل مەنىڭ قىزىعۋشىلىعىمدى ودان سايىن ارتتىردى», – دەيدى جىگەرى مىقتى جىگىت. كەيبىرەۋلەر جەڭىلىستەن مۇقالىپ قالسا, كەرىسىنشە شابىت الاتىن ول اتىراۋداعى ءمۇمكىندىگى شەكتەۋلى جانداردى سپورتقا باۋليتىن باپكەر گۇلنار ءابىلقايىرقىزىنىڭ ۇسىنىسىمەن ءتورت ادام بولىپ پاراليمپيادالىق جاتتىعۋ ورتالىعىندا دايىندىق جاساپ, بيىل اقپان ايىندا دۋبايداعى بۇكىلالەمدىك جارىسقا بارىپ, جۇلدەلى ورىنمەن ورالدى. «الەم تامساناتىن دۋبايدا نە ۇنادى؟» دەگەن سۇراعىمىزعا ول: «شىنىمدى ايتسام, دۋباي ۇنامادى. زاڭعار بيىك عيماراتتارى بولعانمەن, ءبىزدىڭ ەلدىڭ تابيعاتى ودان ون ەسە ارتىق ەكەن, – دەيدى جادىراپ ك ۇلىپ. – بارلىق جاعداي جاسالسا, قۇلسارىنى دۋبايدان كەرەمەت ەتۋگە بولار ما ەدى!».
ءيا, ون ساۋساعىنان ونەر تامعان, كىسىگە ءۇيىرىلىپ تۇراتىن, پايدالى ءىس ىستەۋگە ۇمتىلىپ تۇراتىن بەرەكەتتى اۋداندىق جۇمىسپەن قامتۋ, الەۋمەتتىك باعدارلامالار جانە ازاماتتىق حال اكتىلەرىن ءتىركەۋ ءبولىمى دە نازاردان تىس قالدىرماي جۇمىس ۇسىندى. «2015-2016 جىلدارى «يۋنيكسستروي» مەكەمەسى 10 ادامدى جۇمىسقا الدى. وندا بەرەكەت ۇيىمنىڭ باسشىسى بوپ تاعايىندالىپ, ەكى جىلداي جۇمىس ىستەپ, مۇمكىندىگى شەكتەۋلى جاندارعا كاسىپ ۇيرەتتى», – دەيدى جالعىزباستى قارتتار مەن مۇگەدەكتەرگە الەۋمەتتىك قىزمەت كورسەتۋ ورتالىعىنىڭ ديرەكتورى التىناي قوجيەۆا. ال قول قۋسىرىپ قاراپ وتىرعاندى قالامايتىن بەرەكەت «مەكەمەلەردە جۇمىس بولسا, باس تارتپاس ەدىم» دەيدى.
ال ونەر مەن سپورتتان باسقا سوڭعى كەزدە جانى سۇيەتىن ءحوببيى – كىتاپ وقۋ. ونىڭ سول وقيعادان كەيىن مۇڭ-قايعىعا مالىنباي, ساناسىن وياتىپ, جىگەرىن جانىعان دا وسى سىرلاس دوسى – كىتاپ بولاتىن. بەرەكەت ومىرگە قۇلشىندىراتىن, ىسكەرلىككە ۇيرەتەتىن كىتاپتاردى وقىعاندى جاقسى كورەدى. ول بۇل كۇندەرى الەمدەگى اتىشۋلى جەتىستىككە جەتكەندەردىڭ جولنۇسقاۋشىسىنداي بولعان تانىمال كىتاپتاردىڭ ءبىرازىن وقىپ تاستاعان. نيك ءۆۋيچيچتىڭ, ناپولەون حيلدىڭ, روبين شارمانىڭ كىتاپتارىن تامامداعان. بۇگىندە گرەگوري دەۆيد روبەرتستىڭ ميلليون تيراجدى «شانتارام» كىتابىن وقۋ ۇستىندە. ماسكەۋ مەموريالدىق مەشىتىنىڭ يمامى, كوپتەگەن كىتاپتاردىڭ اۆتورى شاميل الياۋتدينوۆتىڭ «ميلليونەر سلۋشاەت» كىتابىن وقىپ, اقتاۋ قالاسىندا اۆتوردىڭ وزىمەن دە كەزدەسكەن. بۇلار, ءسوز جوق, ونىڭ ومىرگە دەگەن كوزقاراسىن وزگەرتتى. ءوز ىشكى سارايىن سارالاپ, ومىرلىك ءتۇيىن ءتۇيدى.
ءيا, بەرەكەت اقجىگىتوۆ ارباعا تاڭىلىپ, تاڭەرتەڭنەن كەشكە دەيىن تاعدىرىنا نالا ايتىپ, قايعى-مۇڭعا مالىنىپ وتىرعان جان ەمەس, ول – ارمان-ماقساتى بار جىگەرلى ازامات.
سالتانات جاقىپوۆا
اتىراۋ وبلىسى