قاسىم-جومارت توقاەۆ ەلشىلەردىڭ ءبارىن قازاقستانداعى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاپ, مەملەكەتارالىق قاتىناستاردى ودان ءارى نىعايتۋ ىسىندە تابىس ءتىلەدى.
مەملەكەت باسشىسى راسسا دجاليچاندرامەن كەزدەسۋ بارىسىندا تايلاندتاعى سايلاۋدىڭ تابىستى وتۋىمەن جانە ەلدىڭ جاڭا پرەمەر-ءمينيسترىنىڭ سايلانۋىمەن قۇتتىقتادى.
– قازاقستان مەن تايلاند بارلىق سالادا, سونىڭ ىشىندە ساياسي, ەكونوميكالىق جانە مادەني باعىتتاردا دوستىق قاتىناستاردى جەمىستى دامىتىپ كەلەدى. تايلاندقا ءبىزدىڭ ەلىمىزدەن تۋريستەر كوپ بارادى. ءسىزدىڭ ەلىڭىز – قازاقستاندىقتاردىڭ سۇيىكتى جەرلەرىنىڭ ءبىرى. ەلدەرىمىز اراسىنداعى ءوزارا قارىم-قاتىناستاردى ودان ءارى دامىتۋعا سەپتىگىڭىزدى تيگىزەتىنىڭىزگە سەنىمدىمىن, – دەدى مەملەكەت باسشىسى.
قاسىم-جومارت توقاەۆ يۋسەف ابدەلعانيمەن كەزدەسۋدە قازاقستان مەن يوردانيا اراسىنداعى ىقپالداستىقتىڭ جوعارى دەڭگەيدە ەكەنىن اتاپ ءوتتى.
– ەلدەرىمىز اراسىنداعى قارىم-قاتىناستاردىڭ جاقسى دامۋىنا كورول ءىى ابداللا زور ۇلەس قوستى. بۇگىندە ەكىجاقتى ىنتىماقتاستىق ءوزارا دوستىق پەن سەنىم نەگىزىندە تابىستى دامىپ كەلەدى, – دەدى قازاقستان پرەزيدەنتى.
قاسىم-جومارت توقاەۆ ەنريكە مەندوزامەن كەزدەسۋدە ءوزارا بايلانىستاردىڭ ودان ءارى نىعايا بەرەتىنىنە سەنىم ءبىلدىرىپ, ديپلوماتيالىق جۇمىستا تابىس تىلەدى.
– ەلشى مىرزا, جاڭا قىزمەتىڭىزبەن قۇتتىقتايمىن. ءسىز ۆەنەسۋەلانىڭ قازاقستانداعى العاشقى توتەنشە جانە وكىلەتتى ەلشىسى بولعاندىقتان, ەكى تاراپ ءۇشىن دە بۇل سەنىم گراموتاسىن تاپسىرۋ ءراسىمىنىڭ ماڭىزى زور. باسشىلارىڭىزدىڭ ءبىزدىڭ ەلىمىزدە ەلشىلىك اشۋ جانە ديپلوماتيالىق ميسسيا باسشىسى رەتىندە ءسىزدى جىبەرۋ جونىندەگى شەشىمىنە ريزاشىلىق بىلدىرەمىن, – دەدى قاسىم-جومارت توقاەۆ.
ەلشىلەر مەملەكەت باسشىسىنا سەنىم گراموتالارىن تاپسىرعان سوڭ جەكە-جەكە بريفينگ وتكىزدى.
– بۇگىن تايلاند كورولدىگىنىڭ جاڭا ەلشىسى رەتىندە قازاقستان پرەزيدەنتى, اسا مارتەبەلى قاسىم-جومارت توقاەۆقا سەنىم گراموتاسىن تابىستاۋ قۇرمەتىنە يە بولدىم. قاسىم-جومارت توقاەۆ قازاقستان پرەزيدەنتى بولىپ سايلانعاننان كەيىن سەنىم گراموتاسىن تاپسىرعان ءبىرىنشى ەلشى بولۋ – مەن ءۇشىن ۇلكەن مارتەبە. سەنىم گراموتاسىن تاپسىرعان سوڭ توقاەۆ مىرزامەن شاعىن اڭگىمەلەسۋ مۇمكىنشىلىگى بولدى. ءبىز قازىرگى ۋاقىتتا قازاقستان مەن تايلاند اراسىنداعى قاتىناس وتە جاقسى دەگەن ورتاق پىكىرگە كەلدىك, – دەدى تايلاند كورولدىگىنىڭ توتەنشە جانە وكىلەتتى ەلشىسى راسسا دجاليچاندرا.
سونىمەن قاتار راسسا دجاليچاندرا بيىل بانگكوك پەن نۇر-سۇلتان قالاسى اراسىنداعى دوستىقتىڭ 15 جىلدىعى ەكەندىگىن ايتىپ, قازىرگى ۋاقىتتا تايلاند ەلشىلىگى نۇر-سۇلتان قالاسى كۇنى مەرەكەسىن اتاپ وتۋگە دايىندالىپ جاتقانىن اتاپ ءوتتى.
قازاقستان پرەزيدەنتىنە سەنىم گراموتاسىن تاپسىرىپ شىققان يوردانيا كورولدىگىنىڭ ەلشىسى يۋسەف ابدەلعاني قازاقستان مەن يوردانيا كورولدىگى اراسىندا تىعىز قارىم-قاتىناس ورناعاندىعىنا نازار اۋداردى. ەكى ەل اراسىندا ۇكىمەتارالىق كوميسسيانىڭ جۇمىس ىستەيتىندىگىن, مادەنيەت, ءبىلىم جانە وزگە دە سالالاردا ءبىرقاتار كەلىسىم جاسالعانىن ايتتى.
– قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ يوردانيامەن جاقسى قارىم-قاتىناستى جولعا قويۋ ءۇشىن كوپ ەڭبەك سىڭىرگەندىگىن ايرىقشا اتاپ وتكىم كەلەدى. بۇگىن پرەزيدەنت قاسىم-جومارت توقاەۆ تا يوردانيا كورولدىگىمەن اراداعى قارىم-قاتىناستى ودان ءارى دامىتۋعا بارلىق ۋاقىتتا دايىن ەكەنىن ايتتى, – دەدى يۋسەف ءابدەلعاني.
ال ۆەنەسۋەلا ەلشىسى ەنريكە انتونيو اكۋنيا مەندوزا جاڭا تاريحي كەزەڭدى باستان كەشىرىپ وتىرعان قازاقستان حالقى مەن ۇكىمەتىنە بەيبىتشىلىك, ءورلەۋ مەن گۇلدەنۋ تىلەيتىنىن جەتكىزدى. «قازاقستانداعى ءبىزدىڭ ميسسيامىزدىڭ باستى ماقساتى – ۇكىمەتتەرىمىزدىڭ اراسىنداعى ساياسي, الەۋمەتتىك, مادەني, ەكونوميكالىق ىنتىماقتاستىقتى نىعايتۋ, حالىقتارىمىزدىڭ اراسىنداعى دوستىق پەن ىنتىماقتاستىق بايلانىستاردى كۇشەيتۋ, – دەدى ەلشى.