وسىندايدا سابىر كەرەك. سابىردى اللانىڭ ءبىر اتى دەپ جاتادى, دەمەك, ول دا ادامنىڭ بويىنداعى اسىل قاسيەتتىڭ ءبىرى. الىپقاشپا ۇرەي مەن ايعاي-سۇرەڭدى دۇربەلەڭگە سالىنباي, سابىردى جۇرەككە ءتۇيىپ, قاۋىپسىز جەرلەرگە جىلجىعان دۇرىس. ەشكىم دە ەشكىمگە قاساقانا قاستاندىق جاساعان جوق, ال پالە-جالا ايتىپ كەلمەيدى, اياق استىنان بولادى. وعان كىنالىلەر ءالى انىقتالىپ, ءتيىستى جازاسىن الاتىنى كۇمانسىز.
الايدا, مۇندايدا كەيبىرەۋلەر ءدۇربەلەڭگە دەم بەرىپ, حالىقتىڭ باسىنا تۇسكەن قيىندىقتىڭ وزىنەن ۇپاي جيناپ, «اتىڭ شىقپاسا جەر ورتەنىڭ» قيمىلىن جاساپ قالۋعا تىرىسادى. وندايلار ءتۇرلى وسەك-اياڭ تاراتىپ, باسىنا ونسىز دا كۇن تۋعان حالىقتى ابىرجىتىپ, ءتۇرلى قاۋىپتى بولجالداپ, ايعاي-شۋ تۋدىرىپ, الەككە سالادى. مۇندايدى حالىق «جىننىڭ ءىسى» دەپ باعالايدى. حالىقتى ادامگەرشىلىك جولدان اداستىرىپ, ايعاي مەن ويبايعا شاقىرىپ, بىرەۋلەرگە كەكتەنۋدى, كىمنىڭ ءىسى ەكەنىن انىق بىلمەسە دە جالعاندى جاپپاي جازعىرۋدى تۋدىرۋ – وسىنداي ارەكەتتەردىڭ سالدارى. ءتىپتى «ماشيناسىنا مىنگىزبەي كەتتى, الماي كەتتى, نە سۇمدىق, نە دەگەن قايىرىمسىزدىق, نە دەگەن قاتىگەزدىك» دەگەن سياقتى بايبالامداردى دا جانى اشىعانسىپ ۇدەتەتىن, ويبايدى ۇشتاي تۇسەتىندەر جەتىپ-ارتىلادى. اركىمنىڭ ءوز جاعدايى بار-اۋ دەگەندى وندايلار استە ويلامايدى. ادام الدىمەن ءوز بالاسىن, ءوز وتباسىن قۇتقارۋعا اسىققانىن سەزسە دە وندايلار تىرناق استىنان كىر ىزدەپ, ايتەۋىر بىرەۋدى جازعىرىپ, حالىقتىڭ اشۋ-ىزاسىن تۋدىراتىن جول ىزدەيدى. وتقا ماي قۇياتىندار دا تابىلىپ, كەيدە ونسىز دا اۋىر جاعدايدى ۋشىقتىرىپ جىبەرەدى.
بىراق... ينشاللا, ءبىزدىڭ حالقىمىزدىڭ كوبىنىڭ بويىندا اتا-بابامىزدان, اسىل دىنىمىزدەن قانىمىزعا سىڭىرگەن ارداقتى قاسيەتىمىز – سابىر بار. سابىر ساقتاساق, ءبارىنىڭ دە ارتى قايىر بولادى. ەڭ باستىسى, ادام شىعىنى بولماسىن. «سابىر ءتۇبى – سارى التىن, سارعايعان جەتەر مۇراتقا, سابىرسىز قالار ۇياتقا» دەگەن دانالىقتى حالقىمىز عاسىرلار بويى بويىنا ساقتاپ كەلەدى...
مۇنداي اسىل قاسيەت بىزدەن باسقا دا كەيبىر ازيا حالىقتارىنىڭ بويىندا بار ەكەن. مىسالى, جوعارى دامىعان ۇلتتاردىڭ ءبىرى – جاپون حالقى دا سونداي كورىنەدى. 2011 جىلى جاپونيادا تەڭىز بويىنداعى 200 شاقىرىم جەردى شارپىعان توعىز بالدىق سۇراپىل جەر سىلكىنىسى بولعانى ەسىمىزدە. سونىڭ كەسىرىنەن 20 مىڭنان استام ادام قازا بولىپ, 300 مىڭنان استام ادام باسپاناسىز قالدى. ءتسۋناميدىڭ كەسىرىنەن اەس جارىلىپ, حالىققا وراسان زور زالال كەلتىرىلدى. سونىڭ ءبارىن تەلەديداردان كوردىك. الايدا بىردە-ءبىر ادامنىڭ ايعاي-ۇيعاي سالعانىن, جىلاۋ مەن جوقتاۋعا جول بەرگەنىن بايقامادىق. اللانىڭ باسقا سالعانىن ءبارى دە سابىرمەن توسىپ الدى. ءتىپتى, اەس-ءتى جوندەۋ جۇمىستارىنا دا ءۇي-ءىشى, وتباسىمەن ماڭگىگە قوشتاسىپ, قۇتقارۋ جۇمىستارىنا قاپتاپ جازىلعان ەرىكتىلەردى دە كورسەتتى... مىنە, ناعىز ۇلگى الاتىن جاعداي.
ال ارىستاعى وقىس وقيعاعا ورالاتىن بولساق, ورتالىق بيلىك تە, جەرگىلىكتى بيلىك تە قولدان كەلگەننىڭ ءبارىن ىستەپ جاتىر. پرەزيدەنت ق.توقاەۆ جارىلىستىڭ زارداپتارىن جويۋ تۋرالى بىردەن تاپسىرما بەردى. كەيدە بيلىك مۇندايدى كوزگە ىلمەي, حالىقتى دۇربەلەڭگە سالدىرمايىن دەگەن پيعىلمەن نازار اۋدارتپاۋعا تىرىساتىن ارەكەتتەر دە بولاتىن. جوق, ولاي ەمەس, پرەزيدەنتىمىز بىردەن ناقتى تاپسىرما بەردى. بولعان جاعدايدى ءوز كوزىمەن كورۋ ءۇشىن تۇركىستانعا باراتىنى دا بەلگىلى بولدى. قورعانىس ءمينيسترى ۇشىپ بارىپ, وقيعا ورنىندا ءجۇر. تۇركىستان وبلىسىنىڭ اكىمى بىردەن وقيعانىڭ بەل ورتاسىنا كىرىپ كەتتى. ول حالىقتىڭ جاعدايىمەن تانىسىپ, ينفراقۇرىلىمدىق نىسانداردى تەكسەرۋدە. ازىرگە, قورعانىس مينيسترلىگى الماتىدان 500 اسكەري قىزمەتشىنى جىبەرىپ, ءورت سوندىرۋگە جانە ونىڭ زاردابىن جويۋعا جۇمىلدىرعان. وسىنداي ارەكەتتەر كۇننەن-كۇنگە كوبەيە تۇسەرى انىق.
ەڭ باستىسى, حالىقتىڭ تىنىشتىعى بۇزىلماسىن, ورىنسىز دۇربەلەڭ تۋماسىن دەپ تىلەيىك. سوندا ءبارى دە ەپتەپ قالپىنا كەلەتىن بولدى.