تاريحي مەكەندە 6 عاسىر بۇرىن بوي كوتەرگەن ايگىلى قوجا احمەت ياساۋي كەسەنەسىنىڭ ماڭىندا ءيىسى قازاقتىڭ ماقتانىشى بولعان 21 حان, 56 باتىر, 21 بي مەن 8 سۇلتان جانە جۇزدەگەن يگى جاقسى جەرلەنگەن. بۇگىندە وبلىس ورتالىعى بولىپ بەلگىلەنگەن بۇل قاستەرلى قالانى تۇركى الەمىنىڭ مادەني-رۋحاني ورتالىعى رەتىندە دامىتۋ جونىندەگى باس جوسپاردىڭ تۇجىرىمداماسى ماقۇلدانىپ, «TURKISTAN» ارنايى ەكونوميكالىق ايماعىن قۇرۋ جونىندەگى تاريحي جارلىقتارعا قول قويىلعان. سوعان سايكەس وبلىس ورتالىعىندا اۋقىمدى قۇرىلىس جۇمىستارى باستالىپ كەتتى. بيىلدىڭ وزىندە امفيتەاتر, اۋەندى سۋبۇرقاق, 900 ورىندىق مەكتەپ, مەديا-ورتالىق, اكىمدىك عيماراتى جانە مىڭداعان پاتەر پايدالانۋعا بەرىلەدى. بۇعان قوسا حالىقارالىق اۋەجاي, ستاديون, وقۋشىلار سارايى, ياساۋي مۋزەيى جانە وزگە دە نىسانداردىڭ قۇرىلىسى قاۋىرت ءجۇرىپ جاتقانىن جەتكىزگەن تۇركىستان وبلىسى اكىمىنىڭ ورىنباسارى مالىك وتارباەۆ جىل بويى تىندىرىلعان جۇمىستاردى تۇگەندەپ شىقتى.
اتاپ ايتقاندا, «تۋعان جەر» جوباسى بويىنشا كاسىپكەرلەر مەن ەل ازاماتتارى تۋعان اۋىلدارىنا كومەك كورسەتىپ, ەلدى قۋانىشقا بولەدى. وبلىس اكىمى ورىنباسارىنىڭ ايتۋىنشا, وڭىردە وتكەن جىلى دەمەۋشىلەر تاراپىنان قۇنى 3 ملرد 386 ملن تەڭگەنى قۇرايتىن 97 نىسان ىسكە قوسىلعان. بۇعان قوسا ايماقتا «التىن ۇيام» جوباسى قولعا الىنىپ, مەكتەپ بىتىرگەندەرىنە 10, 20, 30 جىل تولعان تۇلەكتەر ءسان-سالتانات قۇرۋدىڭ ورنىنا ءبىلىم العان مەكتەبىنە, تۋعان اۋىلىنا كومەك كورسەتكەن. بيىل بۇل جوبا بويىنشا وبلىستاعى 5 وتباسى باسپانالى بولدى. «سونىمەن قاتار سانانى جاڭعىرتۋعا باعىتتالعان ءىس-شارالار, فەستيۆالدار وتكىزىلدى. اي سايىن مىڭداعان ادامنىڭ قاتىسۋىمەن قازاق مادەنيەتىن, سالت-ءداستۇرى مەن ءتۋريزمىن ناسيحاتتايتىن جوبالار جۇزەگە استى. «رۋحاني جاڭعىرۋ» باعدارلاماسى اياسىندا قازىعۇرت تاۋىنىڭ باۋرايىندا 20 مىڭداي ادامنىڭ قاتىسۋىمەن «ناۋرىز قازىعۇرتتان باستالادى» مەرەكەسى ءوتتى. ەجەلگى ءداستۇردى جاڭاشىلدىقپەن جالعاستىرۋ ماقساتىندا بايدىبەك اۋدانىندا «قىمىزمۇرىندىق» ۇيىمداستىرىلىپ ساۋمال, قۇنان قىمىز, تۇنەمەل قىمىز, حان قىمىز تۇرلەرى تانىستىرىلدى جانە قىمىز باپتاۋشىلار, قولونەر شەبەرلەرى بايقاۋلار, سايگ ۇلىكتەر سايىسى بولدى. تۇڭعىش رەت تۇلكىباس اۋدانى شۇبايقىزىل شوقىسىندا «قىزىل كىتاپقا» ەنگەن قىزعالداقتى قورعاۋ جانە سول ايماقتىڭ تۋريستىك الەۋەتىن كوتەرۋگە ارنالعان «قىزعالداق» فەستيۆالى ءوتتى. تولە بي اۋدانىندا حالىقارالىق كوركەمسۋرەت «قاسقاسۋ» پلەنەرى ۇيىمداستىرىلىپ, ءتۇرلى ەلدەردەن كەلگەن سۋرەتشىلەر ءوڭىردىڭ تاماشا تابيعاتىن تۋىندىلارىنا ارقاۋ ەتتى», دەدى مالىك وتارباەۆ.
وبلىس ورتالىعىندا ازەربايجان, رەسەي, تۇركيا, قىرعىزستان, وزبەكستان, اقش, تاجىكستان, ءۇندىستان تۇركولوگتارىنىڭ قاتىسۋىمەن وتكەن «كيەلى تۇركىستان جانە تۇركى دۇنيەسىنىڭ رۋحاني جاڭعىرۋى» عىلىمي-تەوريالىق كونفەرەنتسياسى مەن 8 تۇركى ەلىنىڭ عالىمدارى باس قوسقان «تۇركىستان – تۇركى الەمىنىڭ بەسىگى» اتتى حالىقارالىق جيىننىڭ جانە «Túrkistan: jańa aqparattyq keńistik» اتتى حالىقارالىق جۋرناليستەر فورۋمىنىڭ دا كونە شاھاردىڭ رۋحىن كوتەرگەنى انىق.
تامىرى تەرەڭدە جاتقان تاريحي مەكەننىڭ بۇگىنگى ۇرپاققا بەرەر رۋحاني قازىناسى دا تاۋسىلماق ەمەس. وبلىستىق مادەنيەت جانە تىلدەردى دامىتۋ باسقارماسىنىڭ باسشىسى نۇرداۋلەت يسابەك وسى ماقساتتا اتقارىلعان جۇمىستارعا توقتالدى. اتاپ ايتقاندا, ۇلى دالانى مەكەن ەتكەن ۇلى تۇلعالار مەن دانالاردىڭ ەرلىگى, ادالدىق, دانىشپاندىق قاسيەتتەرىن باياندايتىن «ورداباسى – بىرلىكتىڭ تۋى» انيماتسيالىق ءفيلمى, الەمنىڭ ەكىنشى ۇستازى اتانعان ءال-ءفارابيدىڭ ءومىرى تۋرالى تۇسىرىلگەن ونەگەگە تولى «وقسىز وقيعاسى» انيماتسيالىق ءفيلمى, كونە قالانىڭ تاريحىن بەينەلەگەن «تۇركىستان» انيماتسيالىق ءفيلمى جانە تولە ءبيدىڭ تاعىلىمدى تۇلعاسىن سومداعان 10 سەريادان تۇراتىن «تولە بي» كوركەم ءفيلمى ءبىر جىلعى جۇمىستىڭ ناتيجەسىندە جارىققا شىققان. جاقىندا كورەرمەنگە جول تارتاتىن مۋلتفيلمدەردى 18 جىلدان بەرى مۋلتيپليكاتسيالىق فيلم تۇسىرۋمەن اينالىسىپ كەلگەن جەرگىلىكتى «ساق» كينوستۋدياسى دايىنداعان بولسا, «تولە بي» تۋىندىسىن دا وسى ستۋديا مەن «وڭتۇستىكفيلم» كينوستۋدياسى بىرلەسىپ تۇسىرگەن.
كونە شاھار كۇننەن-كۇنگە كوركەيىپ, زاماناۋي كەلبەتكە يە بولىپ كەلەدى. وبلىس اكىمى ومىرزاق شوكەەۆتىڭ تاپسىرماسىمەن تۇركىستان قالاسىنىڭ يدەولوگيالىق نەگىزدەمەسىن قالىپتاستىرۋ بويىنشا 4 باعىت ايقىندالعان. ءبىرىنشى, تۇركىستان – قازاق حالقى مەن تۇركى تىلدەس ەلدەردىڭ ەڭ ءىرى زيارات جانە تۋريزم ورتالىعى. ەكىنشى, تۇركىستان – الەمدىك دەڭگەيدەگى قولونەر جانە شەبەرلەر ورتالىعى. ءۇشىنشى, تۇركىستان – ۇلى جىبەك جولىنىڭ بويىندا ورنالاسقان ءىرى ساۋدا ورتالىعى. ءتورتىنشى, قوجا احمەت ياساۋي – رۋحاني تۇلعا. وبلىسى اكىمىنىڭ ورىنباسارى مالىك وتارباەۆتىڭ ايتۋىنشا, الدا وسى باعىتتار بويىنشا يدەولوگيالىق جۇمىستار قولعا الىنباق. ونىڭ بىرقاتارى تۇركىستان وبلىسىنىڭ 1 جىلدىعى اياسىندا باستالادى.
ماۋسىم ايىندا ايماقتا وتكىزىلەتىن 46 ءىس-شارانىڭ قاتارىندا «تۇركىستانىم – تۇرانىم» كورمە ەكسپوزيتسياسى, « ۇلى دالانىڭ تۇركىستانى» اتتى فوتوەكسپەديتسيا, «تۇركىستانعا تارتۋ» جاستار اكتسياسى, «ءTúrkىstan ءtórىnde» سۇحبات-سىرلاسۋ كەشى, باق وكىلدەرى اراسىنداعى وبلىستىق اشىق سپارتاكيادا, «تۇركىستاندا تۇلەگەن ءتول تاريحىم» ءمۇشايراسى, «قۇتتى ولكە ونىمدەرى» اۋىل شارۋاشىلىعى جارمەڭكەسى, «تۇركىستان – جاستار قالاسى» جاستار فەستيۆالى بار. مەرەيتوي 19 ماۋسىمدا تۇركىستاندا وتەتىن «ءان – شاشۋىم وزىڭە, تۇركىستانىم!» گالا-كونتسەرتىنە جالعاسپاق.