سەيسەنبى, 16 ءساۋىر 2013 2:19
چاۆەستىڭ مۇراگەرى جەڭىسكە جەتتى
جەكسەنبى كۇنى ۆەنەسۋەلادا وتكەن پرەزيدەنتتىك سايلاۋدا بيلىك پارتياسىنان كانديدات نيكولاس مادۋرو جەڭىسكە جەتتى. بۇل جونىندە كەشە «رەيتەر» اقپارات اگەنتتىگى داۋىس بەرۋدىڭ رەسمي ناتيجەسىنە سىلتەمە جاساي وتىرىپ حابارلادى.ەلدىڭ ۇلتتىق سايلاۋ كوميسسياسىنىڭ مالىمەتتەرى بويىنشا, نيكولاس مادۋرونى سايلاۋشىلاردىڭ 51 پايىزى قولداعان. ال ونىڭ باستى باسەكەلەسى وپپوزيتسيادان پرەزيدەنتتىككە كانديدات ەنريك كاپريلەسكە سايلاۋشىلاردىڭ 49 پايىزى داۋىس بەرگەن. «بۇگىن ءبىز سايلاۋدا ءادىل جەڭىسكە جەتتىك دەپ ايتا الامىز», – دەپتى مادۋرو داۋىس بەرۋدىڭ رەسمي ناتيجەسى جاريالانعاننان كەيىن.
وتىز ءتورت ادام وپات بولدى
سومالي استاناسى – موگاديشو قالاسىندا بولعان تەررورلىق ارەكەتتەن 34 ادام وپات بولىپ, ونداعان تۇرعىن جارالاندى. «فرانس-پرەسس» اگەنتتىگىنىڭ حابارلاۋىنشا, جارىلىستار سوت عيماراتى ورنالاسقان اۋماقتا جاسالعان.اقپارات كوزدەرىنە قاراعاندا, تەررورلىق ارەكەتتەر جاۋاپكەرشىلىگىن «ءال-كاەدا» ۇيىمىمەن بايلانىسى بار «ءال-شاباب» راديكالدى يسلام توبى العان كورىنەدى. وسى توپتىڭ وكىلى تەررورلىق ارەكەتتەر ءسوماليدى باسقىنشىلاردان ازات ەتپەيىنشە جالعاسا بەرەتىنىن مالىمدەپتى. سول كۇنى مۇنداي جارىلىستار ەل استاناسىنداعى اۋەجايدا دا بولعان ەكەن. سونىڭ سالدارىنان بەس ادام قازا تاپقان. ونىڭ ەكەۋى تۇركيالىق ازاماتتار. بۇل ەلدە ازاماتتىق سوعىس 1991 جىلدان بەرى جالعاسىپ كەلەدى.
وزىنە ءوزى ايىپپۇل سالدى
اقش-تىڭ ميچيگان شتاتىنداعى يونيا وكرۋگىنىڭ سۋدياسى رايموند ۆوۋت سوت تىڭداۋى ءوتىپ جاتقاندا, ۇيالى تەلەفونى قوڭىراۋلاتىپ كەتكەننەن كەيىن وزىنە ءوزى ايىپپۇل سالدى.جەرگىلىكتى باسىلىمداردىڭ جازۋىنشا, سوت وتىرىسى بارىسىندا ءبىر ىسكە قاتىستى پروكۋرور سويلەپ جاتقان ەكەن. سول كەزدە سۋديانىڭ ۇيالى تەلەفونىنا كۇتپەگەن جەردەن قوڭىراۋ شالىنىپ, وتىرىسقا قاتىسۋشىلاردى ەلەڭ ەتكىزسە كەرەك. ال سۋديا تەلەفونىنىڭ ءۇنىن باسەڭدەتۋدى ۇمىتىپ كەتىپتى. تىڭداۋ اياقتالعان سوڭ, سۋديا ۆوۋت سوتقا قۇرمەت كورسەتپەگەنى ءۇشىن وزىنە ءوزى 25 دوللار ايىپپۇل سالۋعا شەشىم قابىلداپ, ونى سول ساتتە كاسساعا تولەپتى. سونداي-اق, ول كەز كەلگەن سۋديا زاڭعا قۇرمەتپەن قاراۋعا ءتيىس ەكەنىن دە اتاپ ءوتىپتى.
زارداپ شەككەندەر ءوز ەلىنە جەتكىزىلدى
«ينتەرفاكس» اگەنتتىگىنىڭ حابارلاۋىنشا, كەشە بەلگيادا تۋريستىك اۆتوبۋستىڭ اپاتقا ۇشىراۋى سالدارىنان زارداپ شەككەن رەسەيلىكتەر ۆولگوگراد قالاسىنا جەتكىزىلدى. بارلىعى 26 ادام, ولاردىڭ 14-ءى اۋىر جاراقاتتارمەن مەديتسينالىق مەكەمەلەرگە جاتقىزىلدى.رەسەيلىك تۋريستەردى ءوز وتانىنا توتەنشە جاعدايلار مينيسترلىگى ۇشاعىمەن اكەلگەن. بەلگيادا زارداپ شەككەن تاعى التى ادام قالىپ وتىر. ولاردىڭ بارلىعى كامەلەتتىك جاسقا تولماعاندار, ۇشەۋىنىڭ دەنساۋلىعى اۋىر. ۆولگوگراد وبلىسىنىڭ بالالارى مىنگەن تۋريستىك اۆتوبۋس پاريجدەن كەلە جاتقاندا, 14 ساۋىردە ەرتەڭگىلىك ەستاكادادان قۇلاپ كەتكەن. اپات سالدارىنان اۆتوبۋستاعى 39 ادامنىڭ بەسەۋى قايتىس بولعان ەدى.
بەيبىت تۇرعىندار قازا تابۋدا
سيريادا ۇكىمەتتىك اۆياتسيانىڭ سوققى بەرۋى سالدارىنان 25 بەيبىت تۇرعىن قازا تاپتى. ولاردىڭ جارتىسىنا جۋىعى بالالار. بۇل جونىندە كەشە «اسسوشەيتەد پرەسس» اقپارات اگەنتتىگى حابارلادى.اۆياسوققى داماسكىدەگى كوتەرىلىسشىلەر باقىلاۋىنداعى اۋدانعا جاسالعان. بۇدان بولەك ۇكىمەتتىك اۆياتسيا ەلدىڭ وڭتۇستىك-شىعىسىنداعى كۇردتەر تۇراتىن حاداد دەرەۆنياسىن بومبالاعان. ونىڭ سالدارىنان 16 ادام وپات بولعان سياقتى. وتكەن جىلى سيريالىق اۆياتسيانىڭ شابۋىل جاساۋىنان 4,5 مىڭنان استام بەيبىت تۇرعىن قازا تاپتى دەگەن مالىمەتتەر بار.
عيمارات 10,6 مەترگە جىلجىتىلادى
باكۋدە قالانىڭ فيزۋلي كوشەسىنە ورنالاسقان تاريحي عيماراتتى 10,6 مەترگە جىلجىتۋ جوسپارلانىپ وتىر. ارا اگەنتتىگىنىڭ حابارلاۋىنشا, بۇل جوبانى نيدەرلاندىنىڭ Bresser Eurasia كومپانياسى جۇزەگە اسىرادى.كومپانيا باسشىسى لەون سۆەەگەردىڭ ايتۋىنشا, دايىندىق جۇمىستارى 18 ساۋىردە اياقتالادى. جوبانى جۇزەگە اسىرۋعا 200-دەن استام گيدراۆليكالىق اپپارات تارتىلادى. عيماراتتى جىلجىتۋعا بەس كۇندەي ۋاقىت كەتەدى. ءۇش قاباتتى تۇرعىن ءۇي 1908 جىلى سالىنعان ەكەن. ءۇيدىڭ ۇزىندىعى – 52 مەتر, ەنى – 35 مەتر, بيىكتىگى – 20 مەتر. ونىڭ سالماعى – 18 مىڭ توننا. عيماراتتى جىلجىتۋ كوشەلەردى كەڭەيتۋ ءۇشىن قاجەت.
قىسقا قايىرىپ ايتقاندا:* اقش-تىڭ بۇرىنعى پرەزيدەنتى كىشى دجوردج بۋش العاش رەت نەمەرەلى بولدى. ونىڭ قىزى دجەنني ومىرگە قىز بالا اكەلدى.* گەرمانيا تۇرعىنى لوتەرەيادان 46 ميلليون ەۋرو ۇتىپ الدى. حەلسينكيدە وتكەن بۇل لوتەرەيا ويىنىنا ەۋروپاداعى 14 ەلدىڭ تۇرعىندارى قاتىسقان ەكەن.* قىتايدىڭ حۋبەي پروۆينتسياسىنداعى قوناق ۇيدەن شىققان ورتتەن 14 ادام مەرت بولىپ, 47 ادام زارداپ شەكتى.* دۋباي سوتى تاجىكستاندىق وپپوزيتسيونەر ءارى ساياساتكەر ۋمارالي كۋۆۆاتوۆتى ءوز ەلىنە قايتارۋ جونىندە سانكتسيا بەردى. ول وتكەن جىلدىڭ جەلتوقسانىندا ءباا اۋماعىندا ۇستالعان بولاتىن.
ينتەرنەت ماتەريالدارى نەگىزىندە ازىرلەندى.