Nur Otan پارتياسىنىڭ باستاماسىمەن قۇرىلعان دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسى – ەلدەگى ەڭ ۇلكەن ديالوگ الاڭدارىنىڭ ءبىرى. ول 5 ساياسي پارتيانىڭ جانە 24 ءىرى قوعامدىق ءبىرلەستىكتىڭ باسىن بىرىكتىرىپ, 6,5 ملن قازاقستاندىقتىڭ مۇددەسىن قورعايدى.
كەلەلى كەڭەستە Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ قازىرگى تاڭدا قازاقستان دامۋدىڭ جاڭا داۋىرىنە قادام باسقانىن ايتتى. ول سايلاۋدا قازاقستاندىقتاردىڭ باسىم بولىگى ءوز داۋىستارىن قاسىم-جومارت توقاەۆقا بەرىپ, ەلباسىمىزدىڭ ستراتەگيالىق ساياساتىنىڭ ساباقتاستىعى مەن ەلىمىزدىڭ تۇراقتى دامۋىن تاڭداعانىن, سونىڭ ناتيجەسىندە قازاقستاندا جوعارى بيلىكتىڭ اۋىسۋى ەلىمىزدىڭ بارلىق زاڭىنا ءسايكەس ءجۇرگىزىلگەنىن اتاپ ءوتتى. وسىلاي دەي كەلە مەملەكەت باسشىسى ۇلىقتاۋ راسىمىندە اتاپ كورسەتكەن بيلىك پەن قوعامنىڭ الدىندا تۇرعان ەڭ نەگىزگى ماقساتتارعا توقتالدى.
– قازاقستان پرەزيدەنتى قاسىم-جومارت توقاەۆ بيلىك پەن ازاماتتىق قوعام اراسىنداعى ديالوگتى ءارى قاراي دامىتۋ كەرەكتىگىنە ەرەكشە نازار اۋداردى. ونىڭ ءبىر دالەلى – مەملەكەت باسشىسىنىڭ جارلىعىمەن قۇرىلعان ۇلتتىق قوعامدىق سەنىم كەڭەسى. بۇل – قازاقستاندا ازاماتتىق قوعامدى دامىتۋ جولىندا جاسالعان ناقتى قادام. مەملەكەت باسشىسى اتاپ وتكەندەي, ءبىرتۇتاس ۇلت بولىپ قالۋ – ءبىزدىڭ باستى باعدارىمىز. سوندىقتان جۇدىرىقتاي جۇمىلىپ, قوعامنىڭ بارلىق وكىلدەرىن, سونىڭ ىشىندە جاستاردى دا ديالوگقا شاقىرىپ, بىرىگىپ ارەكەت ەتسەك قانا كوزدەگەن ماقساتتارىمىزعا قول جەتكىزەمىز. ۇلتتىق قوعامدىق سەنىم كەڭەسى ازاماتتىق قوعامنىڭ دامۋىنا تىڭ سەرپىن بەرىپ قانا قويماي, جاڭعىرۋ مەن رەفورمالاردىڭ وزەگىنە دە اينالادى دەپ قابىلدايمىز. ميلليونداعان قازاقستاندىقتىڭ پىكىرى مەن كوزقاراسىن ءبىلدىرەتىن دەموكراتيالىق كۇشتەردىڭ جالپىۇلتتىق كواليتسياسى وسىنداي ماڭىزدى كەزەڭدە ەلباسى ساياساتىنىڭ ساباقتاستىعىن قامتاماسىز ەتىپ, پرەزيدەنتىمىزدىڭ ەلدىڭ الدىنا قويىپ وتىرعان ماقساتتارعا قول جەتكىزۋىنە ءوزىنىڭ سۇبەلى ۇلەسىن قوسۋى ءۇشىن جۇمىس ىستەيدى, – دەدى ءماۋلەن اشىمباەۆ.
وتىرىسقا ەلدەگى جەتەكشى پارتيالاردىڭ باسشىلارى, پارلامەنت دەپۋتاتتارى, قازاقستان حالقى اسسامبلەياسىنىڭ, كاسىبي جانە قوعامدىق بىرلەستىكتەردىڭ وكىلدەرى قاتىستى. جيىن بارىسىندا كواليتسيا مۇشەسى, «اق جول» دەموكراتيالىق پارتياسىنىڭ توراعاسى ازات پەرۋاشەۆ ءسوز الىپ, تاۋەلسىزدىكتىڭ, تۇراقتىلىقتىڭ قادىرىن ءبىلىپ, تىنىشتىق پەن بەيبىت ءومىردى ساقتاۋىمىز كەرەكتىگىن, ول ءۇشىن قوعامداعى وزەكتى ماسەلەلەردى زاڭ شەڭبەرىندە شەشۋ ماڭىزدى ەكەنىن جەتكىزدى.
بۇدان كەيىن «بىرلىك» پارتياسىنىڭ توراعاسى سەرىك سۇلتانعالي تۇڭعىش پرەزيدەنت وڭىرلەردىڭ اكىمدەرىنە حالىقتىڭ ءال-اۋقاتىن كوتەرۋ ءۇشىن بارلىق مۇمكىندىكتى جاساعانىن اتاپ كورسەتتى. تەك اكىمدەردىڭ سول ۇدەدەن شىعا ءبىلۋى كەرەك-ءتى. ياعني, اكىمدەردىڭ سالعىرت جۇمىسىنىڭ سوڭى وسىنداي داۋعا ۇلاستى دەگەن پىكىردە.
ال «اۋىل» پارتياسى توراعاسىنىڭ ءبىرىنشى ورىنباسارى تولىمبەك عابدىلاشىموۆ جينالعان قاۋىمنىڭ نازارىنا اگروونەركاسىپ كەشەنىن دامىتۋعا بارىنشا كوڭىل ءبولۋ, سول ارقىلى حالىقتىڭ تۇرمىسىن تۇزەۋ تۋرالى ۇسىنىس ءبىلدىردى. سونداي-اق سايلاۋالدى ناۋقان بارىسىندا اۋىلداردى گۇلدەندىرۋ كەڭىنەن ناسيحاتتالعانىن اتاپ ءوتتى. ونىڭ بۇل ويىن ماۋلەن اشىمباەۆ تا قۇپتاپ, حالىقتىڭ 42 پايىزى اۋىلداردا تۇراتىنىن, سوندىقتان بۇل سالاعا باسىمدىق بەرىلەتىنىن قوسا ايتتى.
سونىمەن قاتار بۇل وتىرىستا «جاڭارۋ» سىبايلاس جەمقورلىققا قارسى جالپىۇلتتىق قوزعالىسى» رقب پرەزيدەنتى ورالباي ابدىكارىموۆ, قازاقستان رەسپۋبليكاسى كاسىپوداقتار فەدەراتسياسىنىڭ توراعاسى باقىتجان ءابدىرايىم, «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆ جانە «قازاقستان تۇتىنۋشىلارىنىڭ ۇلتتىق ليگاسى» رقب ءتورايىمى سۆەتلانا رومانوۆسكايا ءسوز سويلەپ, ۇلتتىق قوعامدىق سەنىم كەڭەسىنىڭ جۇمىسىن جانداندىرۋ ءۇشىن جان-جاقتى پىكىرلەرىن ورتاعا سالدى.
ءىس-شارا سوڭىندا بارشا قازاقستاندىقتاردى ىنتىماققا, ءبىرلىككە, قازاقستاندىق دامۋ جولىنىڭ باستى قۇندىلىقتارى – قوعامدىق كەلىسىم مەن ساياسي تۇراقتىلىقتى, ەتنوسارالىق جانە كونفەسسياارالىق بەيبىتشىلىك پەن ءتوزىمدىلىكتى ساقتاۋعا, سونداي-اق بارلىق قوعامدىق-ساياسي كۇشتەردى سايلاۋدان كەيىنگى كەزەڭدە ەلىمىزدىڭ ستراتەگيالىق ماقساتتارى جولىندا بىرىگۋگە, قازاقستان پرەزيدەنتىنىڭ ەل دامۋىنىڭ وزەكتى ءماسەلەلەرىنە قاتىستى بيلىك پەن ازاماتتىق قوعام اراسىندا تۇراقتى جانە كونسترۋكتيۆتى ديالوگ قۇرۋ باستاماسىن قولداۋعا شاقىرعان ۇندەۋ قابىلداندى.