بەيسەنبى, 14 اقپان 2013 6:51
كونگرەسكە جولداۋىن جاريالادى
اقش پرەزيدەنتى باراك وباما كونگرەسكە جىل سايىنعى جولداۋىمەن شىقتى. جولداۋ تاقىرىبى «ەلدىڭ جاعدايى تۋرالى» دەپ اتالادى. بۇل اقش پرەزيدەنتىنىڭ قايتا سايلانعاننان كەيىنگى العاشقى جولداۋى بولىپ وتىر.
بەيسەنبى, 14 اقپان 2013 6:51
كونگرەسكە جولداۋىن جاريالادى
اقش پرەزيدەنتى باراك وباما كونگرەسكە جىل سايىنعى جولداۋىمەن شىقتى. جولداۋ تاقىرىبى «ەلدىڭ جاعدايى تۋرالى» دەپ اتالادى. بۇل اقش پرەزيدەنتىنىڭ قايتا سايلانعاننان كەيىنگى العاشقى جولداۋى بولىپ وتىر.
جولداۋدىڭ باستى تاقىرىپتارى ەكونوميكانى دامىتۋ مەن جۇمىس ورىندارىن قۇرۋعا نەگىزدەلگەن. اتاپ ايتقاندا, پرەزيدەنت الەۋمەتتىك باعدارلامالاردى قارجىلاندىرۋ قاجەتتىگىن اتاپ كورسەتكەن. مىسالى, ول ەلدەگى ەڭ تومەنگى جالاقى ساعاتىنا 9 دوللاردى قۇراۋى كەرەكتىگىن كولدەنەڭ تارتتى. بۇعان ەلدىڭ شاماسى جەتەتىنىن اتاپ ءوتتى. ب.وباما سونداي-اق, كونگرەسكە اتىس قارۋىنا باقىلاۋدى كۇشەيتۋ بويىنشا شارالار قابىلداۋ تۋرالى ۇسىنىسپەن شىقتى.
ابوريگەندەر بايىرعى تۇرعىندار
اۆستراليا پارلامەنتىنىڭ تومەنگى پالاتاسى ابوريگەندەردى ەلدىڭ بايىرعى تۇرعىندارى دەپ تانۋ تۋرالى زاڭ جوباسىن قابىلدادى. قۇجاتتا ابوريگەندەردىڭ اۆستراليا تاريحىنداعى عاجايىپ تا ەرەكشە ورنى مويىندالادى.
زاڭ جوباسى ابوريگەندەردى ەلدىڭ بايىرعى تۇرعىندارى دەپ تانۋ تۋرالى كونستيتۋتسياعا تۇزەتۋ ەنگىزۋ ءۇشىن رەفەرەندۋم وتكىزۋ جولىنداعى ماڭىزدى قادام بولىپ وتىر. كەيبىر باعالاۋلار بويىنشا, اۆسترالياعا اعىلشىندار اياق باسقان 1788 جىلدارى ماتەريكتە 1 ميلليون شاماسىندا ابوريگەندەر تۇرىپتى. 1921 جىلى ولار 60 مىڭعا دەيىن ازايعان. قازىر ەل حالقىنىڭ سانى 22 ميلليون ادامدى قۇراسا, ابوريگەندەر شامامەن 500 مىڭداي دەلىنىپ وتىر. ولار 1967 جىلدان بەرى سايلاۋعا قاتىسۋ قۇقىنا يە.
كولەڭكەلى ەكونوميكاسى – ءىجو-ءنىڭ 46%-ى
رەسەيدىڭ كولەڭكەلى ەكونوميكاسى 1994-2011 جىلدارى ەل ءىجو-ءسىنىڭ 46%-ىن قۇراعان. بۇل تۋرالى اقش-تىڭ زەرتتەۋ ينستيتۋتىنىڭ بايانداماسىندا ايتىلادى. زەرتتەۋشىلەر اتالعان كەزەڭدە رەسەيدەن 211,5 ميلليارد دوللار زاڭسىز شىعارىلعانىن كولدەنەڭ تارتادى.
ەكونوميكاعا زاڭسىز قۇيىلعان اقشا 552,9 ميلليارد دوللار بولىپتى. بۇل قارجىلار ءبىرىنشى كەزەكتە ەسەپ-فاكتۋرالاردى ۇسىنعان كەزدە دەرەكتەردىڭ بۇرمالانۋ جولىمەن ءتۇسىپتى. ال ەلدەن شىعارىلعان 211,5 ميلليارد دوللار ەشقانداي قۇجاتتاردا كورسەتىلمەگەن اقشا ەكەن. ولاردىڭ نەگىزىن پارالار, سالىقتان جاسىرىلعان تابىستار, ادامدار, ەسىرتكى جانە قارۋ-جاراق ساۋداسىنان تۇسكەن اقشا قۇرايدى.
پاپا وتستاۆكاسىنىڭ سەبەبى نەدە؟
نەمىستىڭ 2013 جىلعى Karicartoon كۇنتىزبەسىندە ريم پاپاسى بەنەديكت حVI-نىڭ 11 اقپانداعى وتستاۆكاسى تۋرالى الدىن الا بولجاۋ جاسالىپتى. كۇنتىزبەدە سالىنعان كاريكاتۋرادا ريم پاپاسى تەلەديداردىڭ الدىندا وتىرعان كورىنەدى.
سۋرەتتە ريم پاپاسىنىڭ تولتىرىلعان لوتەرەيا بيلەتىن تەلەديداردان كورسەتىلگەن ساندارمەن سالىستىرىپ وتىرعانى بەينەلەنىپتى. ۇتقانىن تۇسىنگەن كەزدە الەمنىڭ باس كاتوليگى بىلاي دەيدى: «و, جاراتقان! ەرتەڭ-اق وتستاۆكاعا كەتەمىن!». بەنەديكت حVI 11 اقپاندا شىن مانىندە كيەلى تاقتان باس تارتىپ, ءوزىنىڭ وتستاۆكاعا كەتەتىنىن جاريا ەتتى. كاريكاتۋرانىڭ اۆتورى سۋرەتشى كاتارينا گرەۆە ەكەن. ول سۋرەتتى 2011 جىلى سالىپتى. مۇنى شىنىندا دا كورىپكەلدىك دەمەسكە لاجىڭ جوق.
شيرەك عاسىرداعى ەڭ ءىرى كورابل
رەسەي اسكەري-تەڭىز فلوتىنىڭ باسشىلىعى جاڭا ەسمينەتستىڭ سىزباسىن بەكىتتى. ول سوڭعى 24 جىلدا ەلدە جوبالانعان اسا ءىرى كورابل بولىپ تابىلادى. ەسمينەتستىڭ جوباسىن جاساعان «سەۆەرنوە» دەپ اتالاتىن سانكت-پەتەربۋرگتىڭ كونسترۋكتورلىق بيۋروسى.
ەندى كونسترۋكتورلار وزدەرىنىڭ جوبالارىن قورعاپ شىعۋلارى ءتيىس. سودان كەيىن 2-3 جىل بەدەرىندە ونىڭ تەحنيكالىق قۇجاتتاماسىن دايىنداپ, كورابلدىڭ سىرتقى ءتۇرى مەن ورناتىلاتىن قارۋ-جاراعىن ايقىنداۋ مىندەتى تۇر. الدىن الا بولجام بويىنشا جاڭا ەسمينەتس اتوم كۇشىمەن جۇرەتىن بولادى. ونىڭ سۋ سىيىمدىلىعى 12 مىڭ توننانى قۇراماق.
5 مىڭ جىلدىق حرام تابىلدى
پەرۋلىك ارحەولوگتار ەجەلگى ەل پارايسو تۇراعى اۋماعىندا كولەمى شاعىن حرامنىڭ ۇستىنەن ءتۇستى. اتالعان تۇراق ەل استاناسى – ليماعا جاقىن ورنالاسقان. حرام وسىدان 5 مىڭ جىل بۇرىن سالىنعان دەگەن بولجام جاسالىپ وتىر.
عيباداتحانانىڭ كولەمى 6,8 دە 8 مەتر. قابىرعالارى سارى بالشىقپەن سىلانعان تاستان قالانعان. عالىمداردىڭ سوزدەرىنە قاراعاندا, قابىرعالارىنىڭ بيىكتىگى 2,5 مەترگە جەتكەن. بىراق بۇگىندە تومەنگى 70 سانتيمەتر بولىگى عانا ساقتالعان. ەسىگى تار. ودان ءبىر عانا ادام وتە العان. شاتىرسىز حرامنىڭ ورتاسىندا راسىمدىك وشاق ورناتىلىپتى. ودان شىققان ءتۇتىن اسپانعا كوتەرىلىپ, قۇلشىلىق ەتۋشىلەردىڭ قۇدايمەن ۇندەسۋىنە مۇمكىندىك بەرگەن دەپ سانالادى.
قىسقا قايىرىپ ايتقاندا:
رەسەي بيۋدجەتى 2013 جىلدى تاپشىلىقتان باستادى. الدىن الا باعامداۋ بويىنشا, بيۋدجەت تاپشىلىعى 81,25 ميلليارد رۋبلگە نەمەسە ءىجو-ءنىڭ 1,8 پايىزىنا تەڭ.
ميحايل پروحوروۆتىڭ «ازاماتتىق پلاتفورما» پارتياسى ميگرانتتاردى بەيىمدەۋدەن وتكىزۋ ءۇشىن كامپۋستار قۇرۋدى ۇسىندى. وسىلايشا, گاستاربايتەرلەردى رەزەرۆاتسيادا ۇستاۋدىڭ ۇتىمدىلىعى كولدەنەڭ تارتىلىپ وتىر.
ۋكراينانىڭ كيەۆ وبلىسىنا قاراستى وبۋحوۆ قالالىق كەڭەسىنىڭ دەپۋتاتى دميتري سەننيچەنكوعا رەسەيگە كىرۋگە رۇقسات بەرىلمەدى. ول ماسكەۋگە جولداسىن كورۋ ءۇشىن كەلگەن كەزدە «دومودەدوۆو» اۋەجايىندا ۇستالىپتى.
ينتەرنەت ماتەريالدارى نەگىزىندە ازىرلەندى.