سارسەنبى, 13 اقپان 2013 7:13
ءۇشىنشى رەت يادرولىق سىناق جاسادى
سولتۇستىك كورەيا ۇكىمەتى كەشە جەراستى يادرولىق سىناعى تابىستى وتكىزىلگەنىن رەسمي تۇردە مالىمدەدى. ونىڭ ۇستىنە پحەنيانداعىلار جاي يادرولىق بومبا ەمەس, جوعارى قۋاتتى شاعىن يادرولىق زارياد سىناقتان وتكىزىلگەنىن اتاپ كورسەتتى. كحدر باسشىلىعىنىڭ مالىمدەۋىنشە, سىناق تەحنيكالىق جاعىنان تابىستى بولعان.
سارسەنبى, 13 اقپان 2013 7:13
ءۇشىنشى رەت يادرولىق سىناق جاسادى
سولتۇستىك كورەيا ۇكىمەتى كەشە جەراستى يادرولىق سىناعى تابىستى وتكىزىلگەنىن رەسمي تۇردە مالىمدەدى. ونىڭ ۇستىنە پحەنيانداعىلار جاي يادرولىق بومبا ەمەس, جوعارى قۋاتتى شاعىن يادرولىق زارياد سىناقتان وتكىزىلگەنىن اتاپ كورسەتتى. كحدر باسشىلىعىنىڭ مالىمدەۋىنشە, سىناق تەحنيكالىق جاعىنان تابىستى بولعان.
كحدر-ءدىڭ يادرولىق سىناق جاساعانىن ءوز كەزەگىندە وڭتۇستىك كورەيا دا راستادى. بۇل جونىندە وڭتۇستىك كورەيا پرەزيدەنتى اكىمشىلىگىنە سىلتەمە جاساي وتىرىپ, «رەيتەر» اگەنتتىگى حابارلادى. سەۋل كورشىلەرىنىڭ ءىس-ارەكەتىن جازعىرىپ قانا قويماي, ونى ارانداتۋشىلىق دەپ اتادى. وڭتۇستىك كورەيانىڭ ءوتىنىشى بويىنشا نيۋ-يوركتە بۇۇ قاۋىپسىزدىك كەڭەسىنىڭ پحەنياننىڭ يادرولىق سىناقتارىنا ارنالعان جەدەل ءماجىلىسى وتكىزىلەتىن بولدى.
تارتىپسىزدىكتەرمەن اتاپ ءوتتى
مىسىردىڭ استاناسى – كاير قالاسىندا پرەزيدەنت حوسني مۇباراكتىڭ بيلىكتەن كەتىرىلگەنىنىڭ ەكىنشى جىلدىعىنا ارنالعان شەرۋ بولىپ ءوتتى. شەرۋ اكتسياعا قاتىسۋشىلاردىڭ پوليتسيامەن جاپپاي قاقتىعىسىنا ۇلاستى. پرەزيدەنت سارايى جانىندا بىرنەشە ونداعان دەمونسترانت قازىرگى پرەزيدەنت موحاممەد ءمۋرسيدىڭ وتستاۆكاعا كەتۋىن تالاپ ەتتى.
شەرۋشىلەر ءوز تالاپتارىن پوليتسياعا قارسى تاس اتۋمەن «نىعايتپاق» بولدى جانە رەزيدەنتسياعا كىرەبەرىستى جاۋىپ تاستاۋعا ارەكەت جاسادى. پوليتسيا بۇعان قارسى سۋاتقىش جانە كوزدەن جاس اعىزاتىن گاز قولدانىپ, دەمونسترانتتاردى الاڭنان ىعىستىرىپ شىعاردى. ءسوز رەتىندە ايتا كەتسەك, ەگيپەتتى 30 جىلعا جۋىق ۋاقىت باسقارعان حوسني مۇباراك 2011 جىلدىڭ 11 اقپانىندا وتستاۆكاعا كەتۋگە ءماجبۇر بولعان ەدى.
ەۋرووداقتىڭ ۋكرايناعا 19 تالابى
ۋكراينانىڭ «گلاۆكوم» پورتالى ۋكراينانىڭ ەۋرووداقپەن ىنتىماقتاسۋى ءۇشىن قاجەت جانە ورىندالۋى تالاپ ەتىلەتىن 19 كريتەريدى جاريالادى. وسىنداي ءتىزىم بار ەكەنى تۋرالى اقپارات بۇعان دەيىن دە باق-تاردا كورىنىس بەرىپ قالعان ەدى. بۇل ءتىزىمنىڭ رەسمي اتاۋى جوق, ول تەك «19 ينديكاتور» رەتىندە قاپەرگە سالىنادى.
ال تىزىمگە ۋكرايناداعى سايلاۋ جۇيەسىن جاقسارتۋ, ميليتسيا مەن مەملەكەتتىك قارجى جۇيەلەرىن رەفورمالاۋ, جەمقورلىقپەن ءتيىمدى كۇرەستى قامتاماسىز ەتۋ سياقتى كريتەريلەر ەنگىزىلىپتى. بىرنەشە كريتەريدىڭ سوت وندىرىسىنە قاتىسى بار. دەگەنمەن, ەۋروكوميسسياداعىلار ءتىزىمنىڭ رەسمي مارتەبەگە يە ەمەس ەكەنىن كولدەنەڭ تارتادى. الايدا جوعارىداعى كريتەريلەر ۋكراينا مەن ەو اراسىندا 2011 جىلدىڭ اياعىندا قول قويىلادى دەپ كۇتىلگەن جاڭا شارتقا كۇنى بۇگىنگە دەيىن كەسىرىن تيگىزىپ كەلەدى.
شەكاراسىن جابىق دەپ جاريالادى
ليۆيا پرەمەر-ءمينيسترى الي زەيدان ەل 14-18 اقپان ارالىعىندا 5 كۇنگە ءوزىنىڭ مىسىرمەن جانە تۋنيسپەن شەكاراسىن جاباتىنىن جاريا ەتتى. پرەمەر مۇنداي شەشىمنىڭ سەبەبىن ليۆيا كوسەمى مۋاممار كاددافيدى تاعىنان تايدىرۋعا الىپ كەلگەن قارۋلى قاقتىعىستىڭ 2 جىلدىعىنا وراي ەرەكشە ساقتىق قاجەتتىگىمەن ءتۇسىندىردى.
كوتەرىلىس 17 اقپاندا باستالعانىمەن, جىلدىقتى تويلاۋ 15 اقپاندا ارنا تارتاتىن كورىنەدى. ليۆيانىڭ كوپتەگەن تۇرعىندارى, اسىرەسە, ەلدىڭ شىعىسىنداعىلار سونداي-اق وسى كۇنگە دەيىن ليۆيالىقتاردىڭ قاۋىپسىزدىگىن قامتاماسىز ەتە الماي وتىرعان جانە ەلدىڭ جاڭا كونستيتۋتسياسىن قابىلداۋعا قول جەتكىزە الماي كەلە جاتقان ۇكىمەتكە قارسى نارازىلىق اكتسيالارىن ۇيىمداستىرۋدى دا جوسپارلاپ وتىرسا كەرەك. قاۋىپسىزدىك شارالارى قاراستىرىلۋدا.
سىرتتاي 24 جىلعا سوتتالدى
بىشكەك گارنيزونىنىڭ اسكەري سوتى ەلدىڭ بۇرىنعى پرەزيدەنتى قۇرمانبەك باكيەۆ پەن ونىڭ باۋىرى, بۇرىنعى مەملەكەتتىك كۇزەت قىزمەتىنىڭ باستىعى جانىش باكيەۆكە قاتىستى سىرتتاي ۇكىم شىعاردى. اعايىندىلار وكىلەتتىكتەرىن اسىرا پايدالانعاندارى جانە باسقا دا قىلمىستارى ءۇشىن كىنالى دەپ تابىلعان.
ءسويتىپ, بۇرىنعى پرەزيدەنت 24 جىلعا باس بوستاندىعىنان ايرىلسا, ونىڭ باۋىرى ءومىر بويى تۇرمەدە وتىرۋعا كەسىلگەن. اسكەري سوتتىڭ اقپاراتىندا باكيەۆتەردىڭ نە ءۇشىن سوتتالعاندارى ناقتىلانبايدى. ق.باكيەۆتىڭ 2010 جىلعى توڭكەرىستەن كەيىن تاعىنان تايدىرىلعانى بەلگىلى. سول كەزدىڭ وزىندە-اق ول بەلورۋسسياعا قاشىپ ۇلگەرگەن بولاتىن. قىرعىزستاننىڭ جاڭا بيلىگى ونى قايتارۋعا تالپىنعانىمەن, ولارىنان تۇك شىقپاعان ەدى.
العاشقى سپۋتنيگىنە ءان ارنادى
ازەربايجاننىڭ العاشقى تەلەكوممۋنيكاتسيالىق جەر سەرىگى 8 اقپانعا قاراعان ءتۇنى وربيتاعا شىعارىلعان بولاتىن. ول تمد, شىعىس ەۋروپا, سولتۇستىك افريكا, ورتالىق جانە شىعىس ازيا ەلدەرىندەگى تۇتىنۋشىلارعا قىزمەت كورسەتەدى. باكۋ سپۋتنيك رەسۋرسىنىڭ شامامەن 20 پايىزىن پايدالانىپ, قالعانىن «حالىقارالىق رىنوكتا جۇزەگە اسىرۋ نيەتىندە».
ەل پرەزيدەنتى يلحام اليەۆ سپۋتنيكتىڭ ۇشىرىلۋىن تاريحي وقيعا جانە ازەربايجان حالقىنىڭ ۇلكەن تابىسى دەپ اتاسا, وعان ارناپ ءان شىعارىلدى. كومپوزيتسيا «ءبىزدىڭ ۇلتتىق سپۋتنيگىمىز» دەپ اتالادى. ءسوزىن جازعان ەڭبەك سىڭىرگەن ونەر قايراتكەرى, پولكوۆنيك, اقىن جانە پۋبليتسيست ابدۋللا گۋرباني, ال سازىن جازعان كسرو حالىق ءارتىسى, پروفەسسور اريف مەليكوۆتىڭ شاكىرتى نارمينا ناگيەۆا.
قىسقا قايىرىپ ايتقاندا:
قاڭتار ايىنىڭ سوڭىندا قاستاندىق جاسالعان ارمەنيا پرەزيدەنتتىگىنە كانديدات پارۋير ايريكيان اۋرۋحانادان شىعارىلدى. بىراق ول تەكسەرىلۋ ءۇشىن كۇن سايىن اۋرۋحاناعا كەلىپ تۇرۋى ءتيىس كورىنەدى. 18 اقپانعا بەلگىلەنگەن سايلاۋ اتالعان وقيعاعا بايلانىستى 2 اپتاعا شەگەرىلگەن-ءتىن.
رەسەي پرەزيدەنتى ۆلاديمير پۋتين مەمدۋماعا شەنەۋنىكتەردىڭ شەتەل بانكتەرىندە اقشا ۇستاۋلارىنا تىيىم سالاتىن زاڭ جوباسىن ەنگىزدى. زاڭ جوباسى شەنەۋنىكتەردىڭ شەتەلدەردە اكتيۆتەر يەلەنۋىمەن كۇرەسكە باعىتتالعان. مۇنى بۇزعانى ءۇشىن 5-تەن 10 ملن. رۋبلگە دەيىن ايىپپۇل سالۋ نەمەسە 5 جىلعا دەيىن باس بوستاندىعىنان ايىرۋ جازاسى قاراستىرىلادى.
رەسەيدىڭ كومي رەسپۋبليكاسىنىڭ باسشىسى ۆياچەسلاۆ گايزەر «ۆوركۋتينسكايا» شاحتاسىنداعى جارىلىستان قازا تاپقان كەنشىلەرگە بايلانىستى ءۇش كۇندىك ازا تۇتۋ جاريالادى. 800 مەتر تەرەڭدىكتەگى مەتان جارىلىسىنان 18 كەنشى وپات بولعان ەدى.
رەسەي ليبەرالدارىنىڭ سەركەسى ۆلاديمير جيرينوۆسكي پارتياداعى تەمەكى تارتاتىنداردىڭ بارلىعىن پارتيادان قۋىپ شىعۋعا ۋادە بەردى. وسىنداي مالىمدەمەنى ول مەمدۋمانىڭ ماجىلىسىندە جاسادى. مەمدۋمادا تەمەكى تارتۋعا قارسى زاڭ جوباسى تالقىلانعان بولاتىن.
ينتەرنەت ماتەريالدارى نەگىزىندە دايىندالدى.