اۋە قورعانىسى كۇشتەرىنىڭ باس قولباسشىسى, اۆياتسيا گەنەرال-مايورى ن. كاربەنوۆ كىشى سەرجانت ەرلان رايىمقۇلوۆتىڭ ماراپاتىن مارقۇمنىڭ وتباسىنا تابىس ەتتى.
– ەرلاننىڭ باتىل ەرلىگى ءاربىر قازاقستاندىق ءۇشىن ۇلگى. سەبەبى جانقيارلىق پەن باتىلدىقتى قىزمەتتىك مىندەتتى ورىنداۋ كەزىندە عانا ەمەس, سونىمەن بىرگە كەز كەلگەن ومىرلىك جاعدايدا تانىتۋعا بولادى. ەرلان قيىن كەزدە ءوز تاڭداۋىن جاسادى. ونىڭ تاڭداۋى مەن جاساعان ارەكەتى باتىپ بارا جاتقان بالاعا ءومىر سىيلاعان ماقتان تۇتارلىق ارەكەت بولدى. مۇنى استە ۇمىتۋعا بولمايدى. ءوزىنىڭ ەرلىگىمەن ول قازاقستاندىق ءاسكەري قىزمەتشىنىڭ ار-نامىس كودەكسىنە ساي ارەكەت ەتتى, – دەگەن اقك باس قولباسشىسىنىڭ ورىنباسارى, اۆياتسيا گەنەرال-مايورى ت.قويشىقۇلوۆ, سونداي-اق وسىنداي ونەگەلى تاربيە بەرگەنى ءۇشىن قازا بولعان اسكەري قىزمەتشىنىڭ اناسىنا زور العىس ءبىلدىردى.
ءوز كەزەگىندە, كىشى سەرجانت ە.رايىمقۇلوۆتىڭ اناسى ريزاگۇل نازاربەكوۆا اسكەري ۆەدومستۆو باسشىلىعىنا كورسەتىلىپ جاتقان مورالدىق جانە ماتەريالدىق قولداۋى, قايعى-قاسىرەتكە دۋشار بولعان تۋعان-تۋىسقاندارىنىڭ جاراسىن جەڭىلدەتىپ جۇرگەندەرى ءۇشىن العىسىن ءبىلدىردى.ەستەرىڭىزدە بولسا, قايعىلى وقيعا 10 مامىردا نۇر-سۇلتان قالاسىندا تاپا-تال تۇستە «گازماشاپپاراتۋرا» باۋ-باقشا اۋدانىندا بولعان ەدى. سۋداعى يتىنە قاراي ۇمتىلعان
12 جاسار قىز بالا سۋعا قارعيدى. بىراق جەتكىنشەكتى ەكپىنى قاتتى قىزىل سۋ يتىمەن قوسا اعىزا جونەلەدى. مۇنى كەزدەيسوق كورىپ قالعان كىشى سەرجانت ە.رايىمقۇلوۆ سۋعا ويلانباستان سەكىرەدى. الايدا اسكەري قىزمەتشىنىڭ ءوزى سۋدان شىعا الماي قالادى. ءسويتىپ ايتىپ كەلمەيتىن اجال ەرلاننىڭ ءومىرىن قيىپ, كوزسىز ەرلىك كورسەتكەن مارقۇمنىڭ ارتىندا ايەلى مەن كامەلەتكە تولماعان ەكى بالاسى قالدى.
ارىپتەستەرى ەرلاننىڭ ەرلىگى بۇل اسكەري قىزمەتشىلەر ءۇشىن عانا ەمەس, بارشا قازاقستاندىقتار ءۇشىن دە جانقيارلىق پەن قايسارلىقتىڭ ۇلگىسى ەكەندىگىن ايتادى.
«ول ءوز قىزمەتىن جاقسى كوردى جانە ءوز ءىسىنىڭ ناعىز مامانى بولدى. جوعارى جاۋاپكەرشىلىك, ءتارتىپتىلىك, اسكەري قىزمەتكە ادالدىعىمەن ۇنەمى ەرەكشەلەندى. جاۋىنگەرلىك جانە مەملەكەتتىك-قۇقىقتىق دايىندىق پاندەرى بويىنشا كەرەمەت ناتيجەلەر كورسەتتى, وعان سەنىپ تاپسىرىلعان اسكەري تەحنيكانى ۇلگىلى ۇستادى. دوستارى مەن تانىستارى ونى اشىق جانە وزگەلەردىڭ پروبلەمالارىنا بەيجاي قارامايتىن ادام رەتىندە ەستەرىندە ساقتايدى», دەيدى قورعانىس مينيسترلىگىنىڭ باسشىلىعى.