ايتا كەتۋ كەرەك, بۇل ۇيلەردى «استانا موتورس» كومپانياسى ءوز ەسەبىنەن جوندەپ, اۋلاسىن اباتتاندىرىپ, كوپبالالى جانە كومەككە مۇقتاج وتباسىلارىنا سىيعا تارتتى.
– اقادىر – مەنىڭ كىشى وتانىم. بۇل جەردە مەنىڭ اكەم بالالىق شاعىن وتكىزگەن. بۇل ولكە مەنىڭ اتا-بابالارىم ءۇشىن ىستىق بولعان مەكەن. تابىسقا جەتكەن كەز كەلگەن ادام ءوزىنىڭ وتانى الدىنداعى قارىزىن قايتارۋى ءتيىس. مەن بۇگىن ءوز جەرلەستەرىمە كومەكتەسە العانىم ءۇشىن قۋانىشتىمىن. ءبىزدىڭ كومپانيا قايىرىمدىلىقپەن بەلسەندى تۇردە اينالىسادى, تۇرعىندارعا كومەكتەسەدى. بۇل ءبىزدىڭ تۇجىرىمدامامىز, ءبىزدىڭ ءومىر سالتىمىز جانە ءبىزدىڭ فيلوسوفيامىز, – دەدى كاسىپكەر نۇرلان سماعۇلوۆ.
كوپبالالى وتباسىلارىنا بۇيىرعان باسپانانىڭ ءبارى دە جيھازبەن جابدىقتالعان, اۋلاسى اباتتاندىرىلعان. ءار ءۇيدىڭ جانىندا جەر تەلىمى مەن قوسالقى شارۋاشىلىققا ارنالعان قۇرىلىستار بار. باۋ-باقشا ءوسىرىپ, ءۇي شارۋاشىلىعىن جۇرگىزۋگە وتە قولايلى.
باسپانالى بولۋ باقىتى بۇيىرعان تۇرعىننىڭ ءبىرى فاريدا كومەكوۆانىڭ جەتى بالاسى بار. بۇعان دەيىن ەكى بولمەلى اياداي عانا پاتەردە تۇرىپ كەلگەن وتباسى كەڭ دە ەڭسەلى ءۇيدى ۇزاق ۋاقىت كۇتكەن ەكەن. قازىر كومەكوۆتار وتباسىنىڭ ءتورت بولمەلى ءۇيى جانە 12 سوتىق جەر تەلىمى بار.
– كۇيەۋىمىز ەكەۋمىز دە جۇمىس ىستەيمىز, بىراق ءبىز ءۇشىن باسپاناعا قول جەتكىزۋ ءتۇيىنى شەشىلمەگەن قيىن ماسەلە بولىپ كەلگەن ەدى. بۇگىنگى كۇن – ءبىز ءۇشىن ەڭ باقىتتى كۇن! – دەيدى كوپ بالالى انا, «كۇمىس القا» يەگەرى فاريدا كومەكوۆا قۋانىشى قوينىنا سىيماي.
تاعى ءبىر كوپبالالى انا ءلاززات اقماعانبەتوۆا ءۇي الۋ كەزەگىندە 13 جىل تۇرىپتى. ءوزىنىڭ ۇيەلمەلى-سۇيەلمەلى بەس بالاسى بار.
– مەن سوڭعى كۇنگە دەيىن باسپانالى بولاتىنىمىزعا سەنە الماعان ەدىم. وسى يگى ىسكە قاتىسى بار قايىرىمدى جاندارعا دەگەن العىسىمىز شەكسىز! – دەيدى ءتورت بولمەلى ءۇيدىڭ كىلتىنە يە بولعان كوپبالالى انا.
سالتاناتتى شارا بارىسىندا وبلىس اكىمى ەرلان قوشانوۆ ەلباسىنىڭ تاپسىرماسى بويىنشا وڭىردە كوپبالالى وتباسىلارعا ەرەكشە كوڭىل بولىنەتىنىن اتاپ ءوتتى. سونىمەن قاتار, ول «استانا موتورس» كومپانياسىنا كوپبالالى وتباسىلارعا كومەك كورسەتكەنى ءۇشىن العىس ايتتى. سونداي-اق, ءوڭىر باسشىسى جەرگىلىكتى مەكتەپتىڭ تالانتتى تۇلەكتەرى نۇرلان سماعۇلوۆ قۇرعان «ءبىلىم قورىنىڭ» ارقاسىندا ەلىمىزدىڭ ۇزدىك جوعارى وقۋ ورىندارىندا ءبىلىم الۋ مۇمكىندىگىنە يە بولىپ وتىرعانىنا دا ريزاشىلىق سەزىمىن ءبىلدىردى.
– تاۋەلسىزدىگىمىز قالىپتاسا باستاعاننان بەرى مەملەكەت كاسىپكەرلەردى قولداپ كەلەدى. بۇگىندە اياعىنا نىق تۇرعان بيزنەستىڭ الەۋمەتتىك ماسەلەلەردى شەشۋدە مەملەكەتكە كومەكتەسەتىن كەزى كەلدى. بالالارىمىز بەن نەمەرەلەرىمىز وسىنداي جانى جومارت جانداردى ۇلگى ەتە وتىرىپ, ءوسىپ-ءونۋى ءتيىس. «تۋعان جەر» يدەياسىنىڭ ءوزى تۋعان اۋىلىڭدى ۇمىتپاي, جەرلەستەرىڭە كومەك كورسەتۋ ەمەس پە؟! – دەپ اتاپ ءوتتى ەرلان قوشانوۆ.
ەسكە سالساق, «استانا موتورس» كومپانياسى 2011 جىلى اقادىردا بالالار-جاسوسپىرىمدەر سپورت مەكتەبىن سالىپ بەرگەن بولاتىن. وندا ءجۇزۋ باسسەينى مەن كۇرەس زالى بار. سپورتتىق نىساندا دزيۋدو, سامبو, قازاق كۇرەسى جانە فۋتبولدان جارىستار تۇراقتى تۇردە ءوتىپ تۇرادى. مەكتەپ تاربيەلەنۋشىلەرى حالىقارالىق تۋرنيرلەرگە ءجيى شىعىپ, جۇلدەلى ورىندارعا يە بولىپ ءجۇر.
سونىمەن قاتار, بيىل اقادىر كەنتىندە 70 پاتەرلى تۇرعىن ءۇي قالپىنا كەلتىرىلىپ, پايدالانۋعا بەرىلگەنىن دە ايتا كەتكەن ءجون. باسپانالى بولعاندار اراسىندا كوپبالالى وتباسىلار دا بار. ولاردىڭ بارلىعى تۇرعىن ءۇي الۋعا كەزەكتە تۇرعاندار تىزىمىندە بولعان. جالپى, شەت اۋدانىندا بارلىعى 41 كوپبالالى وتباسى تۇرادى.
بيىل اقادىر كەنتىندە 32 پاتەرلى ءۇي سالۋ جوسپاردا بار. بۇدان بولەك, كەلەسى جىلى تاعى ەكى كوپقاباتتى ءۇي پايدالانۋعا بەرىلمەكشى. ال «استانا موتورس» كومپانياسىنىڭ باسشىسى نۇرلان سماعۇلوۆ الداعى ۋاقىتتا دا جەرلەستەرىنە ارنالعان قايىرىمدىلىق شارالارىنىڭ جالعاسىن تابا بەرەتىنىن جەتكىزدى.