مينيسترلىكتىڭ عىلىم جانە ادام رەسۋرستارى دەپارتامەنتىنىڭ ديرەكتورى ساۋلە سىدىقوۆا سالانىڭ احۋالى تۋرالى سەناتورلاردى حاباردار ەتتى. بۇل رەتتە, قالالىق جانە اۋىلدىق جەرلەردى دارىگەر ماماندارمەن قامتاماسىز ەتۋدە ايىرماشىلىق ساقتالۋدا (قالادا – 10 مىڭ تۇرعىنعا 56,8, اۋىلدىق جەرلەردە 10 مىڭ تۇرعىنعا 16,1 ماماننان كەلەدى). بۇگىندە جۇمىسقا الىنباعان شتاتتىق ورىندار بويىنشا 2481,75 دارىگەر تاپشى بولىپ وتىر.
دەپارتامەنت باسشىسى مەديتسينالىق ءبىلىم بەرۋدى جاڭعىرتۋ اياسىندا دارىگەرلىك ۋنيۆەرسيتەتتەردى دامىتۋدىڭ 5 جىلعا ارنالعان ستراتەگيالىق جوسپارلارى جاسالعانىن, وندا وقىتۋ باعدارلامالارىن وزگەرتۋ جانە ستراتەگيالىق سەرىكتەستەر – شەتەلدىك جوعارى وقۋ ورىندارىمەن بىرلەسكەن ءبىلىم بەرۋ باعدارلاماسىن ەنگىزۋ, مەديتسينالىق جوعارى وقۋ ورىندارىنىڭ اكادەميالىق جانە باسقارۋ دەربەستىگىن كەڭەيتۋ, ۋنيۆەرسيتەتتىك كلينيكالاردى قۇرۋ, پروفەسسورلىق-وقىتۋشىلار قۇرامىنىڭ الەۋەتىن ارتتىرۋ كوزدەلگەنىن اتاپ ءوتتى.
«بۇگىنگى تاڭدا دەنساۋلىق ساقتاۋ مينيسترلىگى ەلىمىزدىڭ دەنساۋلىق ساقتاۋ جۇيەسىندە ادام كاپيتالىن دامىتۋدىڭ 2025 جىلعا دەيىنگى تۇجىرىمدامالىق ءادىستەرىن بەكىتتى, ول دەنساۋلىق ساقتاۋ جۇيەسىندە كادر ساياساتىن جەتىلدىرۋدى جانە دەنساۋلىق ساقتاۋ قىزمەتكەرلەرىن دايارلاۋدىڭ جانە ۇزدىكسىز كاسىبي دامىتۋدىڭ جاڭا ساپاسىن قامتاماسىز ەتۋدى كوزدەيدى.
دەنساۋلىق ساقتاۋ جۇيەسىندە كادر ساياساتىن جەتىلدىرۋ ءجونىندەگى مىندەتتەردى ىسكە اسىرۋ اياسىندا سالالىق بىلىكتىلىك ءجۇيەسى جەتىلدىرىلەدى, دەنساۋلىق ساقتاۋدىڭ كادرلىق رەسۋرستارىن باسقارۋ تەتىكتەرى جاڭعىرتىلادى, دەنساۋلىق ساقتاۋدىڭ كادرلىق رەسۋرستارىن تالداۋ, بولجاۋ جانە مونيتورينگ جۇرگىزۋ ءادىستەرى جەتىلدىرىلىپ, مەديتسينا قىزمەتكەرلەرىنىڭ تارتىمدى بەينەسى قالىپتاسادى, كاسىبىنىڭ بەدەلى ارتا تۇسەتىن بولادى», دەدى س.سىدىقوۆا.
شاراعا نۇر-سۇلتان, الماتى, قاراعاندى جانە سەمەي مەديتسينالىق ۋنيۆەرسيتەتتەرىنىڭ رەكتورلارى دا قاتىسىپ, دەپۋتاتتاردىڭ سۇراقتارىنا جاۋاپ بەردى. دەپۋتاتتار وقۋ ورنىن بىتىرگەن ءتۇلەكتەردىڭ جىبەرىلگەن جەردەگى قىزمەتىن اتقارۋى ماسەلەسىن, ءتۇلەكتەردىڭ جالپىلاما ەمدەيتىن ءدارىگەر سەكىلدى جۇمىس ىستەي المايتىنىن سۇرادى, سونداي-اق ءدارىگەرلىك كوللەدجدەردە مەيىربيكەلەردى دايارلاۋ ساپاسىن قايتا قاراۋ ماسەلەسى دە كوتەرىلدى. سىندارلى ۇنقاتىسۋ مەن پىكىر الماسۋ بولدى.
سەناتور مۇرات باقتيار ۇلى شارانى قورىتىندىلاي كەلىپ, پارلامەنت پەن بارلىق مۇددەلى ورگانداردىڭ بىرلەسكەن جۇمىسىن ودان ءارى جالعاستىرۋ ماڭىزدى دەپ سانايتىنىن جەتكىزدى.