تۇرمە قىزمەتكەرلەرى مەن جازاسىن وتەۋشىلەر «قىلمىسكەر» ايۋدى ەركەلەتىپ كاتيا دەپ اتاپ كەتىپتى. ءوز تەمىر تورىنان ەشقايدا شىقپاعان ونى كۇتىپ, باپتاعان دا جازاسىن وتەۋشىلەر ەكەن.
بايعۇس اڭنىڭ نە ءۇشىن تۇرمەگە قامالعانىنا توقتالار بولساق, ونىڭ باسىنان وتكەن شىرعالاڭ تاريحى ون بەس جىل بۇرىن باستالعان. 2004 جىلى اتى-ءجونى بىزگە بەيمالىم ءبىر تسيرك ۇيرەتۋشىسى تۋريستىك اگەنتتىكتەن قارىزعا جارتى ميلليون تەڭگە اقشا الىپ, ايۋدى جەرگىلىكتى «بەلايا يۋرتا» لاگەرىنە كەپىل رەتىندە قالدىرىپ كەتكەن ەكەن. ال جىرتقىش اڭ سول كەزدەرى ەكى ادامعا شابۋىل جاساپ ۇلگەرگەن كورىنەدى. العاش رەت قوستانايعا جارىسقا كەلگەن 11 جاسار نۇرسۇلتان ەسىمدى سپورتشىنىڭ اياعىن تىستەپ العان. ونىڭ بار «جازىعى» – تاماق بەرمەككە ۇمتىلعان ەكەن. سونداي-اق اششى سۋدان ۇرتتاپ العان 28 جاسار ۆيكتور دا كاتيامەن قول بەرىپ امانداسپاقشى بولىپتى. الايدا, ماڭ دالادا ەركىن وسكەن اڭنىڭ تەمىر توردا جاتىپ جۇيكەسى ابدەن جۇقارسا كەرەك, بۇل جولى دا ءوزىن قىزىقتاۋعا كەلگەن جىگىتتى اياماعان. وسى وقيعالاردان سوڭ لاگەر اكىمشىلىگى ەكاتەرينانىڭ «نازىك جاندى» ەمەس ەكەنىن ءتۇسىنىپ, تۇرمەگە قاماۋدى ۇيعارىپتى.
ءسويتىپ, ادامدارعا ارنالعان كولونيادا ءتۇز تاعىسى 15 جىل قاماۋدا بولعان. تۇرمە قىزمەتكەرلەرى ايۋدىڭ قانداي زاڭ نورمالارى نەگىزىندە كولونيادا بولعاندىعى جايلى مالىمەت بەرمەدى. ماسس-مەديا ء"ومىر بويى باس بوستاندىعىنان ايىرىلعان ايۋ" دەپ اتاپ كەتكەن حايۋانعا قانداي دا ءبىر جازا تاعايىندالدى ما, جوق پا, ول جاعى دا بەيمالىم. بەلگىلىسى, قونىس كولونياسىنداعى 750 اداممەن بىرگە بولىپتى. ال بيىلعى ءساۋىر ايىندا بريتاندىق The Sun تابلويدى الگى ايۋ تۋرالى رەپورتاج جاساعان ەدى.
ايتپاقشى, 2010 جىلى قوستانايدا ايۋدىڭ قۇرمەتىنە ەسكەرتكىش-بيۋست ورناتىلعان.
ەندى, مىنە, قوستانايلىق قونىس كولونيا قىزمەتكەرلەرى مەن جازاسىن وتەۋشىلەردىڭ 15 جىل بويى دوسىنا اينالعان «قىلمىسكەر» كاتيا پەتروپاۆل قالاسىنا جول تارتتى.