قر پرەمەر-ءمينيسترى اسقار مامين ۇكىمەت وتىرىسىندا اۋىلدىق ەلدىمەكەندەردى سۋمەن قامتاماسىز ەتۋ كورسەتكىشى جوعارى بولىپ تۇرعان الماتى جانە قىزىلوردا وبلىسى اكىمدىكتەرىنىڭ تاجىريبەسىن اتاپ ءوتتى.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى مەدەت ۋسايننىڭ قىزىلوردا وبلىسىندا ورتالىقتاندىرىلعان سۋمەن قامتاماسىز ەتۋدە بىرقاتار جەتىستىككە قول جەتكىزگەندىگىن ايتادى.
"2017 جىلدىڭ ماۋسىم ايىنا دەيىن قىزىلوردا وبلىسىندا وقشاۋ اۋىز سۋ جۇيەسىن پايدالاناتىن 10 مەكەمە جۇمىس ىستەدى. الايدا, وسى مەكەمەلەر تۇتىنۋشىلاردى اۋىز سۋمەن ۇزدىكسىز قامتاماسىز ەتە المادى. سەبەبى, جەرگىلىكتى جەردە كاسىبي مامانداردىڭ تاپشىلىعى, ماتەريالدىق-تەحنيكالىق بازانىڭ السىزدىگى, ارنايى تەحنيكالارىنىڭ بولماۋى, تومەن جانە ءار ءتۇرلى تاريفپەن سۋمەن جابدىقتاۋ جۇيەسىن دۇرىس پايدالانباۋعا اكەلدى. سوندىقتان وبلىستاعى "قازسۋشار" مەكەمەسى "ارال" فيليالىنىڭ ماتەريالدىق-تەحنيكالىق الەۋەتىن پايدالانۋ ءۇشىن, اۋداندارداعى لوكالدى سۋ بەرۋشى مەكەمەلەردى فيليالدىڭ تەڭگەرىمىنە بەرىپ, رەسپۋبليكادا العاش بولىپ وڭىردە بىرىڭعاي وپەراتور قۇرىلدى", - دەدى م.ۋساين.
بىرىڭعاي وپەراتور قۇرۋ ناتيجەسىندە بىرقاتار ماڭىزدى كورسەتكىشتەرگە قول جەتكىزىلدى. ماسەلەن, تاۋلىك بويى سۋ الاتىن اۋىلدىق ەلدىمەكەندەر سانى 88-دەن 145-كە دەيىن كوبەيدى, وقشاۋ سۋ پايدالانۋشىلارعا بىرىڭعاي تاريف بەكىتىلدى.
بۇگىندە قىزىلوردا وبلىسىنىڭ الەۋمەتتىك-ەكونوميكالىق دامۋىنىڭ 2019-2022 جىلدارعا ارنالعان كەشەندى جوسپارى بەكىتىلگەن. كەشەندى جوسپارعا الەۋمەتتىك ماڭىزى بار جالپى قۇنى 29 ملرد.تەڭگەنى قۇرايتىن سۋمەن جابدىقتاۋ جانە سۋ بۇرۋدىڭ 14 جوباسى ەنگىزىلدى. وسى جوبالار ىسكە اسقان كەزدە 111 مىڭ ادام ساپالى اۋىز سۋمەن قامتىلاتىن بولادى.
قىزىلوردا وبلىسى