30 مامىردا مەككە قالاسىندا ساۋد ارابياسىنىڭ كورولى سالمان يبن ابدەل-ءازيز ءال ساۋدتىڭ باستاماسىمەن اراب ليگاسىنا مۇشە بارلىق 20 مەملەكەت كوشباسشىلارىنىڭ توتەنشە ءسامميتى بولدى.
وسى جيىننىڭ الدىندا مەككەدە بولعان پارسى شىعاناعى جاعالاۋىنداعى اراب مەملەكەتتەرى ىنتىماقتاستىعىنىڭ كەڭەسى دە ءدال وسى مازمۇنداعى ءمالىمدەمە جاريالاعان ەدى. بۇل كەڭەسكە التى مەملەكەت مۇشە. وسى فورۋمدى دا «ايماقتاعى جاعدايدىڭ كۇرت ناشارلاپ كەتۋىنە بايلانىستى» دەگەن سەبەپپەن ساۋديانىڭ كورولى شاقىرعان.
ءوز تاراپىنان يران بۇل ءمالىمدەمەلەردەگى ايىپتاردى جوققا شىعارىپ, ەر-ريادتىڭ قاسيەتتى رامازان ايىندا اقش-تى قولداۋ ساياساتى ءۇشىن سامميت ۇيىمداستىرعانىن ايىپتادى.
ءبىز بۇعان دەيىنگى «تاياۋ شىعىس تاعى تولقىپ تۇر» اتتى ماقالامىزدا («ەق», 31.01.2019 ج.) يران مەن اقش اراسىنىڭ قاتتى سۋىسىپ كەتۋ سەبەپتەرى تۋرالى جازعان بولاتىنبىز.
وسى سامميتتەردىڭ الدىندا ساۋديانىڭ سىرتقى ءىستەر جونىندەگى مەملەكەتتىك مينيسترى ادەل ءال-دجۋبەير ەر-ريادتا جاساعان ءباسپاسوز-كونفەرەنتسياسىندا ساۋد ارابياسى تاياۋ شىعىستا سوعىس وتىن تۇتاتپاۋ جولىندا قولىنان كەلگەن ءىستىڭ ءبارىن جاسايتىن بولادى دەپ جاريالاعان. «سوعىس ايماقتاعى بارلىق ەلدەرگە دە قاسىرەت اكەلەدى. سوندىقتان ءبىز ونى بولدىرماۋعا بارلىق كۇش-جىگەرىمىزدى جۇمسايتىن بولامىز», دەدى ول.