ال ەندى وسى ەلدى مەكەننىڭ جۇرتشىلىعىن ەكى جىلدان بەرى الاڭداتىپ وتىرعان ماسەلە بار, سول جايىندا ايتۋعا تۋرا كەلىپ وتىر. كەڭەس اۋىلىنىڭ جانىنان وتەتىن نۇرا وزەنىنە جاقىن ورنالاسقان قورىم-زيراتتا 300-دەن 500-گە دەيىن ءمايىت جاتىر. ونىڭ جان-جاعى ەرتەدە قورشالعان. اۋىل تۇرعىندارىن اتا-بابالارى, جاقىندارى جاتقان وسى زيراتتىڭ بۇگىنگى جاعدايى قاتتى الاڭداتادى ەكەن. اتاپ ايتقاندا, زيراتتىڭ وزەن جاعى ءب ۇلىنىپ جاتىر. قورشاۋ دا, بەيىتتىڭ قۇرىلىس ماتەريالدارى دا وزەنگە قۇلاعان. ەڭ قاۋىپتىسى, سول ادامداردىڭ سۇيەگى كورىنىپ, شاشىلىپ جاتىر.
«اۋىلدىڭ جانىنان وتەتىن وزەن ارقىلى «نۇرا – ەسىل» كانالى دا اعادى. بىلۋىمشە, ەگەر ەسىلدىڭ نۇر-سۇلتان قالاسىنان وتەتىن بولىگىندە سۋ ازايعان جاعدايدا وسى كانال ارقىلى قوسىمشا سۋ جىبەرىلەدى. ياعني, مىناۋ ءبىزدىڭ اۋىلدىڭ زيراتى قۇلاپ جاتقان نۇرانىڭ سۋى استاناعا دا جەتەدى دەگەن ءسوز. ۇلكەندەردىڭ ايتۋىنشا, بۇر قورىمدا حولەرا, وسپا, باسقا دا قاۋىپتى اۋرۋمەن سىرقاتتانىپ قايتقان ادامداردىڭ مايىتتەرى دە بار. دەمەك, وزەن سۋى زياندى بولۋى مۇمكىن. وسى جاعىن ويلاۋ كەرەك شىعار», دەيدى اۋىل اقساقالى قابىكەن ءجۇنىسوۆ.
«مەن وسى اۋىلدا تۋىپ-ءوستىم. قازىر اۋىلدا ەشكىم قالماسا دا, زيراتتىڭ جاعدايى كوپشىلىكتى الاڭداتىپ وتىر. جىلدان-جىلعا ءبىر جاعى ءب ۇلىنىپ, وزەن جاعىنا قۇلاۋدا. مارقۇمداردىڭ سۇيەكتەرى كورىنىپ جاتىر. بۇل ماڭايدا مال جايىلادى, دەمەك ادامدار دا جۇرەدى. ءبىزدىڭ ويىمىزشا, زيراتتىڭ وزەن جاعىنا بەتون قابىرعا قويىلۋى كەرەك, ايتپەسە قورىمداعى بەيىتتىڭ ءبارى بىرتىندەپ وزەنگە قۇلاي بەرەدى. ءبىر جاعىنان بۇل ارۋاقتارىمىزدى قورلاۋ بولسا, ەكىنشى جاعىنان ادامعا دا, مالعا دا, تابيعاتقا دا قيانات قوي» دەپ ءوزىنىڭ پىكىرىن بىلدىرەدى وسى اۋىلدىڭ تۋماسى رۋسلان قىرعىزباەۆ ەسىمدى ازامات.
ال تاعى ءبىر اۋىل ازاماتى قۋاندىق راحىمجانوۆ بولسا, بۇل ماسەلەنى اقمولا وبلىسىنىڭ باسشىلىعى قاراسا ەكەن دەيدى. «بىلتىر اۋىلدىڭ اكىمى وسى ماسەلەگە قاتىستى جينالىسقا قاتىسىپ, اۋدان جانە وبلىس اكىمدىگىنە, دەپۋتاتتاردىڭ نازارىنا بار جاعدايدى جەتكىزەمىن دەگەن بولاتىن. قايتا جينالاتىن بولىپ كەلىسكەن ەدىك. الايدا, تۇرعىندار عانا جينالىپ, جوعارى جاقتان ەشكىم كەلمەگەن سوڭ قىنجىلا-قىنجىلا تارادىق. ال شىن مانىندە بۇل وتە قيىن ماسەلە بولىپ تۇر. زيراتتاعى ارۋاقتاردىڭ شاشىلعان سۇيەكتەرىن كورۋ دەگەن قاسىرەت دەپ ويلايمىن. سوندىقتان وسى پروبلەمانى اقمولا وبلىسىنىڭ اكىمدىگى ءوز نازارىنا السا دەگەن تىلەگىم بار. ايتپەسە, بۇل قاۋىپتىڭ سوڭى ورنى تولماس قايعى-قاسىرەتكە اينالىپ كەتۋى مۇمكىن» دەپ تۇيىندەدى جاعدايعا اشىنعان اۋىل ازاماتى.
شىنىمەن دە, قاۋىپتىڭ الدىن الۋدى اۋىل تۇرعىندارىنىڭ وزدەرى ايتىپ وتىر. جوعارىداعىلار قانداي ارەكەت ەتەر ەكەن؟..
عالىم قوجابەكوۆ,
جۋرناليست