«جاستاردىڭ ءوزىن ءوزى باسقارۋ جۇيەسىن دامىتۋ» جوباسى – جاستار جىلىنا وراي اقپارات جانە قوعامدىق دامۋ مينيسترلىگى مەن «ازاماتتىق باستامالاردى قولداۋ ورتالىعى» كەاق قولداۋىمەن قازاقستان ستۋدەنتتەرىنىڭ اليانسى تاراپىنان جۇزەگە اسىپ جاتقان جاڭا جوبا. بۇل ەلىمىز بويىنشا جوعارى وقۋ ورىندارى مەن كوللەدجدەردەگى جانە كاسىپورىندارداعى جاستار ءىسى جونىندەگى كوميتەتتەردىڭ جۇمىسىن ءبىر جۇيەگە كەلتىرۋ, سونداي-اق جاستاردىڭ ازاماتتىق بەلسەندىلىگىن, ءوزىن ءوزى باسقارۋ جۇيەسىن دامىتۋ ارقىلى جەرگىلىكتى دەڭگەيدە ازاماتتىق ديالوگتى قۇرۋ پروتسەسىنە تارتۋ ماقساتىندا قولعا الىنعان. بۇل كەزدەسۋ سول جوبانى جۇزەگە اسىرۋداعى جۇمىستىڭ ءبىر پاراسى عانا. باسقوسۋعا ەلورداداعى 14 جوو مەن 35 كوللەدجدەگى جاستار ءىسى كوميتەتتەرىنىڭ باسشىلارى قاتىستى.
«ءبىز تىكەلەي ستۋدەنتتەرمەن جۇمىس ىستەيتىن ۇيىم رەتىندە جاستار ءىسى ءجونىندەگى كوميتەتتەردىڭ قىزمەتىن جاڭا دەڭگەيگە شىعارساق دەيمىز. جاڭا جوبا اياسىندا جىلدىڭ سوڭىنا دەيىن سايت قۇرىلاتىن بولادى. وندا ستۋدەنتتەرگە ارنالعان بارلىق زاڭدار, كەرەكتى جاڭالىقتار جاريالانادى. جاستار شاعىمدار مەن ۇسىنىستارىن دا سول سايت ارقىلى بەرە الادى. سونداي-اق ستۋدەنتتەردىڭ بازاسى, جاستار ءىسى كوميتەتتەرىنىڭ جۇمىسى ورنالاستىرىلادى. اشىقتىق رەتىندە جىل سايىن وتەتىن ۇزدىك جوو مەن ستۋدەنتتى انىقتاۋدى دا سايت ارقىلى جۇزەگە اسىرماقپىز», دەدى «قازاقستان ستۋدەنتتەرىنىڭ اليانسى» قب پرەزيدەنتى ءىلياس تۇستىكباەۆ.
جوبا مادەنيەت, ءبىلىم, الەۋمەتتىك, جەمقورلىققا قارسى, سپورت سياقتى بەس باعىتتى قاراستىرادى. قازاقستان ستۋدەنتتەرىنىڭ اليانسى ستۋدەنتتەردىڭ الەۋمەتتىك جاعدايىن جاقسارتۋ ءۇشىن 2005 جىلدان بەرى «قالاي تۇرىپ جاتىرسىڭ؟» اكتسياسىن وتكىزىپ كەلەدى. 2016-2018 جىلدارى اليانس بارلىق وبلىستارداعى ستۋدەنتتەرگە قانشا ورىن جەتىسپەيتىنىن, جاتاقحانالاردىڭ ساپاسىن انىقتاعان بولاتىن. سول نەگىزدە تۇڭعىش پرەزيدەنت – ەلباسى 2022 جىلعا دەيىن 75 مىڭ ورىندىق ستۋدەنتتىك جاتاقحانا سالۋدى تاپسىرعان ەدى. جاڭا جاتاقحانالاردىڭ بەرىلۋى دە وسى قوعامدىق ۇيىمنىڭ باقىلاۋىندا ەكەن. «ءبىز جاڭا جاتاقحانالاردىڭ بەرىلۋى بويىنشا 28 مامىردا الماتى قالاسىندا قازيتۋ-دا العاشقى كەزدەسۋىمىزدى وتكىزەمىز. وندا جاڭادان سالىنعان جاتاقحانادا ستۋدەنتتەر مەملەكەتتىك ستاندارتتارعا سايكەس تۇرىپ جاتىر ما دەگەن ماسەلەنى انىقتايمىز. ويتكەنى ءار ستۋدەنتكە 6 شارشى مەتر كەڭىستىك بولۋى كەرەك. سونىمەن قاتار وندا تەك ۋنيۆەرسيتەتتىڭ ستۋدەنتتەرى عانا تۇرىپ جاتقانىنا, ورىندار مۇعالىمدەرگە نەمەسە وزگە كىسىلەرگە بەرىلگەن, بەرىلمەگەنىنە كوز جەتكىزەمىز. وسىلايشا ءبىز جاڭا جاتاقحانالاردىڭ بارلىعىن تەكسەرىپ شىعاتىن بولامىز. ال بۇرىننان پايدالانۋدا بولعان جاتاقحانالاردىڭ جاعدايى دا ءبىزدىڭ نازارىمىزدا. جىل سايىن ەكى رەت, ياعني مامىر-ماۋسىم جانە قىركۇيەك-قازان ايلارىندا رەسپۋبليكا بويىنشا اۋقىمدى اكتسيا وتەتىن بولادى. العاشقىسىندا جاتاقحانالاردىڭ جاعدايىن تەكسەرسەك, كۇزدە سول ماسەلەلەردىڭ شەشىمى قالاي بولعانىن انىقتايمىز», دەيدى ءىلياس تۇستىكباەۆ.
بۇدان بولەك ستۋدەنتتەر ۇيىمى بولون پروتسەسى جانە اكادەميالىق ۇتقىرلىق ورتالىعىمەن بىرلەسىپ ستۋدەنتتەردىڭ شەتەلدە وقىپ, تاجىريبە الۋىنا دا جول اشىپ وتىر. الداعى ۋاقىتتا بىرلەستىك ءبىلىم سالاسىنا كۇش سالىپ, جاستاردى اقپاراتتاندىرۋدى قولعا الماق. جيىندا ءسوز العان بولون پروتسەسى جانە اكادەميالىق ۇتقىرلىق ورتالىعى حالىقارالىق ىستەر ءبولىمىنىڭ باسشىسى ۋنزەيليا حاسەنوۆا ستۋدەنتتەردىڭ وقي ءجۇرىپ شەتەلگە شىعىپ ءبىلىمىن قالاي شىڭداۋعا بولاتىنىن ەگجەي-تەگجەيلى ءتۇسىندىردى. باسقوسۋ سوڭىندا نۇر-سۇلتان قالالىق جاستار ءىسى جونىندەگى باسشىلار كەڭەسى قۇرىلدى.