سونىمەن بىرگە ورتالىق ماماندارى وتباسى قۇندىلىقتارىن العا تارتا وتىرىپ, اجىراسۋ كەزەڭىندە ءارى-ءسارى جۇرگەن ەرلى-زايىپتىلارعا مورالدىق جانە پسيحولوگيالىق كومەك كورسەتۋدى كوزدەيدى. ءارى ولاردىڭ اراسىندا تۋىنداعان ءار ءتۇرلى تۇسىنىسپەۋشىلىك پەن كەلىسپەۋشىلىك كورىنىستەرىنە اراشا ءتۇسۋدى, سوعان سايكەس مۇمكىندىگىنە قاراي قاجەتتى كومەك كورسەتۋدى مۇرات تۇتادى.سونداي-اق اقتوبە قالالىق سوتىنىڭ سۋدياسى ايگۇل ابدۋللينانىڭ ايتۋىنشا ايىرىقشا ورتالىق نەكە بۇزۋ ۇدەرىستەرىنىڭ تومەندەۋىنە, ەڭ باستىسى وتباسىنىڭ ساقتالۋىنا ءتيىستى ىقپالىن تيگىزبەك.
كامەلەتتىك جاسقا تولماعان بالالاردىڭ قۇقىعىن قورعاۋ مەن ولاردىڭ تولىققاندى وتباسىندا تاربيەلەنۋى ءۇشىن باعىت-باعدار بەرۋ ءىسى دە ورتالىق قىزمەتكەرلەرىنىڭ ەنشىسىنە ءتيىپ وتىر.
مۇنداي ورتالىقتىڭ قاجەتتىلىگى تومەندەگى دەرەكتەردەن دە ايقىن كورىنەدى. ايتالىق وتكەن 2018 جىلدىڭ 4 ايىندا اقتوبە قالاسى بويىنشا نەكەنى بۇزۋ مەن اجىراسۋ ءۇشىن سوتتارعا 1002 تالاپ ارىز تۇسسە, بۇل سان بيىلعى جىلدىڭ وسى كەزەڭىندە 1264-كە وسكەن. ونىڭ بىرقاتارىنا ءتيىستى شەشىم شىعارىلسا, بىرقاتار ءىس ەكى تاراپتىڭ تاتۋلاسۋىنا بايلانىستى توقتاتىلعان. ءبىر جاقسىسى وسىنداي وڭدى قادامعا بارعاندار قاتارى وتكەن جىلمەن سالىستىرعاندا بيىل ەكى ەسە كوپ ەكەندىگى دەۋگە بولادى.
ايتسە دە سوڭعى جىلدارى وبلىس ورتالىعىندا اجىراسۋ كورىنىستەرى كوبەيىپ وتىرعانى قىنجىلتپاي قويمايدى. وسىنداي جاعدايدا وتباسىن ساقتاۋ ورتالىعى كەلەڭسىز كورىنىستى بولدىرماۋ مەن ەرلى-زايىپتىلاردىڭ باسىن قايتادان قوسۋ باعىتىندا ەلەۋلى ءرول اتقارارى انىق.
وسى ورايدا ورتالىقتىڭ اشىلۋ ءراسىمى كەزىندە ءادىل قازىلاردىڭ اتىنان ايتىلعان كەيبىر ورىندى وي-پىكىرلەردى دە ايتا كەتۋدىڭ ورايى كەلىپ تۇرعانداي. ياعني ولاردىڭ ايتۋىنشا وتباسىن ساقتاپ قالۋ كوپتەگەن جاعدايلاردا سۋديالاردىڭ قولىنان كەلە بەرمەيدى. ولار تەك ءوز تاراپىنان ءتيىستى زاڭ شەڭبەرىندە عانا شەشىم قابىلدايدى. وسىنداي جاعدايدا اقتوبەدە جاڭادان اشىلعان ورتالىق قىزمەتىنىڭ ماڭىزى ارتا تۇسپەك.
ياعني الداعى ۋاقىتتا اجىراسۋ بويىنشا سوتقا كەلىپ تۇسكەن ارىزداردى وسى ورتالىقتا قۇرىلعان كوميسسيا مۇشەلەرىنىڭ قاراۋ ءتارتىبى بەلگىلەنىپ وتىر. وسىنداي ءتارتىپ پەن جۇيە ارقىلى وتباسى مەن نەكەنى ساقتاپ قالۋ مۇمكىندىگى وسە تۇسەتىنىنە شەك كەلتىرۋگە بولمايدى دەيدى سۋديا ايگۇل ابدۋللينا.
اقتوبە