...اسەرىمەن بولىسەدى
ءانشى اپامىزدى ساعىنىپ قالىپپىز
پاۆلودار قالاسىندا ارداقتى دا اسىل ءانشى اپامىز روزا باعلانوۆانى ەسكە الۋ كەشى ءوتىپ, ءانشىنىڭ اسەم داۋىسىن ساعىنعان حالىق قالالىق مادەنيەت سارايىنا لىق تولدى. كەشكە جينالعاندار الدىمەن روزا اپامىزدىڭ سىڭعىرلاعان اسەم اندەرىن تىڭداپ, ەكراننان اپامىزدىڭ جارقىن بەينەسىن كورىپ ريزا بولىستى. كەش بارىسىندا روزا تاجىبايقىزى تۋرالى دەرەكتى فيلمنەن ۇزىندىلەر بەرىلىپ, ارداقتى اپامىزدىڭ ءبىز بىلە بەرمەيتىن ءومىر ساتتەرىن تاماشالادىق.
ەلىنىڭ قامىن ويلاعان ءانشى اپامىز قازاق ەلىنىڭ ماقتانىشىنا, الماتى قالاسىنىڭ سانىنە اينالعان اسەم ساراي سالدىرتتى, مادەنيەتىمىزدىڭ وركەندەۋىنە ءوز ۇلەسىن قوستى. سوناۋ سۇراپىل سوعىس جىلدارىندا الدىڭعى شەپكە بارىپ, قوڭىراۋداي سىڭعىرلاعان ۇنىمەن ءان سالىپ, جاۋىنگەرلەردىڭ ەڭسەسىن كوتەرگەنىن بىلەمىز.
روزا باعلانوۆا «ساحنا ساندۋعاشى» عانا ەمەس, ساحنانىڭ كوركى دە ەدى. كيىم كيىسى, ساحنادا ءوزىن ۇستاۋى, ءجۇرىس-تۇرىسى ەشكىمگە ۇقسامايتىن ەرەكشە بولاتىن. اپامىز اندەردى ايتقاندا ءار ءسوزدىڭ ماعىناسىن تەرەڭ ءتۇسىنىپ, سول ماعىناعا سايكەس داۋىس ىرعاعىن, داۋىس اسەمدىگىن ساي كەلتىرە شىرقايتىن, سوزدەرىنەن مول ادامگەرشىلىك قاسيەت, كورەرمەنگە دەگەن ۇلكەن قۇرمەت سەزىلىپ تۇرۋشى ەدى.
«حالىق قاھارمانى» اتاعىن العان ارداقتى ءانشى قۇرمەتىنە الماتى قالاسىنداعى جاستار مەن ستۋدەنتتەر سارايى روزا باعلانوۆا اتىنداعى جاستار مەن ستۋدەنتتەر سارايى دەپ اتالسا نۇر ۇستىنە نۇر بولار ەدى.
ءاليما ايتكەنوۆا,
زەينەتكەر ۇستاز
پاۆلودار
...دابىل قاعادى
ۇرلىققا تۇساۋ بولماي تۇر
سوڭعى ۋاقىتتا ءبىزدىڭ شاعىن اۋىلدىڭ اۋماعىندا جىلقى ۇرلاۋ دەرەكتەرى كوبەيىپ بارادى. ايتسە دە بۇعان قاتىستى تەكسەرۋلەر مەن تەرگەۋ امالدارى جۇرگىزىلمەي كەلەدى. ماسەلەن, وتكەن 2018 جىلى ءبىزدىڭ تالدىق اۋىلىنىڭ وزىنەن كوپتەگەن جىلقى جوعالىپتى. ونىڭ 13-ءى مەنىڭ يەلىگىمدەگى سەرىكتەستىكتىڭ جىلقىلارى. ءىرى كولەمدەگى مال ۇرلىعى بولعان سوڭ وعان قۇقىق قورعاۋ ورگاندارى ءتيىستى تەرگەۋلەر جۇرگىزۋى قاجەت ەمەس پە؟ الايدا, بۇلاي بولماي وتىر.
بۇل ماسەلەنى اۋداندىق ىشكى ىستەر ءبولىمىنىڭ باستىعى ورىنباسارىنا بىرنەشە رەت ايتقان ەدىك. الايدا, ول تەرگەۋشىلەردىڭ جەتىسپەي جاتقانىن ايتۋمەن عانا شەكتەلىپ ءجۇر. باسقا امالىم قالماعان سوڭ جانۋارلاردى ىزدەۋگە ءوزىم كىرىستىم. بۇل ارەكەتىم بەلگىلى ءبىر دەڭگەيدە ناتيجە بەردى دە.
ء سويتىپ جوعالعان جىلقىلارىمنىڭ بىرەۋىن ەمبى قالاسى ماڭىنداعى اۋىلدىڭ بىرىنەن تاۋىپ, الىپ كەلدىم. ال ەكەۋىن سويىپ تاستاپتى. مەن ءبارىنىڭ باعىتى مەن دەرەگىن سىلتەپ تۇرسام دا, تەرگەۋ امالدارىنىڭ جۇرگىزىلمەي جۇرگەنى قىنجىلتادى. بۇل جاعدايدى اقتوبە وبلىستىق پوليتسيا دەپارتامەنتىنىڭ باستىعى تىكەلەي ءوز باقىلاۋىنا السا, مۇمكىن ءبىر ناتيجەسى شىعار دەپ ۇمىتتەنەمىن.
قاميدوللا ءجۇسىپوۆ,
تالدىق اۋىلىنداعى
«قۇلاگەر» جشس-ءنىڭ قۇرىلتايشىسى
اقتوبە وبلىسى,
ايتەكە بي اۋدانى
...ريزاشىلىق بىلدىرەدى
ۇلتتىق ونەردى ۇلىقتاعان فيلم
«قازاقستان» ۇلتتىق تەلەارناسىنان «كۇي عۇمىر» اتتى تەلەسەريال ءبىرازدان بەرى ءوز كورەرمەندەرىنە ۇسىنىلىپ كەلدى. تۇراقتى كورەرمەن رەتىندە كۇن سايىن كەزەكتى سەرياسىن اسىعا كۇتەتىنبىز. 20 بولىمنەن تۇراتىن سەريال بىزگە قاتتى ۇنادى. كەزىندە تاماشالاعان «بولاشاق» اتتى لەنتادان كەيىنگى اۋىز تۇششىنىپ كورگەن تۋىندىمىز وسى بولدى. ستسەناريىن جازعان اقىن قارىنداسىمىز گۇلنار سالىقباي ەكەن.
ۇلتتىڭ ماڭگىلىك اسىل قازىناسى – كۇمبىرلەگەن كۇيگە ارنالعان ءفيلمنىڭ وقيعاسى دا قىزىقتى ءورىلىپ وتىرادى. كەيبىر جەكەلەگەن ەپيزودتارى بولماسا, وقيعالارى دا نانىمدى. ءبىزدىڭ ويىمىزشا, تاجىريبەلى اكتەرلەر ويناعان رولدەر ءساتتى شىققان. كۇيلەردى ورىنداعان سايان اقمولدا ءفيلمنىڭ اجارىن ودان ءارى اشا تۇسكەن.
ايتايىن دەگەنىم – فيلم ءساتتى شىققان, سونىسىمەن دە بىزگە ۇنادى. الداعى ۋاقىتتا وسىنداي دۇنيەلەر كوز قۋانىشىمىزعا اينالا بەرسە ەكەن دەگەن تىلەك قالدى كوڭىلدە.
كارىباي امزە ۇلى,
زەينەتكەر
تۇركىستان وبلىسى
...ماقتان تۇتادى
كورەيادان جۇلدەمەن ورالدى
بالالاردىڭ قابىلەتىنە زەر سالىپ, دارىندىلاردى تاني ءبىلۋ قاجەت. وسى ماقساتتى العا قويعان بۋراباي اۋدانىنداعى ششۋچينسك قالاسىنىڭ №9 مەكتەپ-گيمنازياسى وقۋشىلاردى مەكتەپ قابىرعاسىنان عىلىمي ىزدەنىسكە باۋلىپ, جەتىستىكتەرگە جەتكىزىپ جاتقانى قۋانتادى. ءناتيجە تىڭعىلىقتى جۇمىسپەن, جۇيەلى باسقارۋمەن كەلەتىنى ءسوزسىز. «ءماڭگىلىك ەل يدەياسى – مەكتەپتە» جوباسى نەگىزىندە جۇرگىزىلىپ جاتقان جاڭاشىلدىققا ۇمتىلىستى ناعىز باسەكەگە قابىلەتتى تۇلعا دايارلاۋداعى ۇتىمدى ءىس دەۋگە بولادى.
سونىڭ ىشىندە «وتاندىق ءونىم, ۇلتتىق برەند» باعىتى بويىنشا وقۋشىلاردى تۋعان ولكەنىڭ تابيعاتىن, تىنىس-تىرشىلىگىن زەرتتەپ, وتاندىق ءونىمدى قايتا جاڭعىرتىپ, ۇلتتىق برەندكە اينالدىرۋداعى جەتىستىكتەردى ماقتانىشپەن ايتا الامىز. وتكەن جىلى وقۋشىلارىمىز ساۋمال سۇتتەن جاسالعان بالمۇزداقتىڭ شيپاسىن الەمگە ايگىلەگەن بولاتىن.
سول جولمەن بيىل دا 11-سىنىپ وقۋشىسى اققۋ جۇكەباي وڭتۇستىك كورەيانىڭ تەدجون قالاسىندا وتكەن «جاس عالىم» عىلىمي جوبا جارىسىندا «وتاندىق ءونىم – قۇرتجيدەك» اتتى عىلىمي جوباسىن قورعاپ, جۇلدەلى ءىى ورىنعا يە بولدى. وسى جوباعا جەتەكشىلىك ەتكەن قازاق ءتىلى مەن ادەبيەتى ءپانى مۇعالىمى جانار قۋاندىق پەن بيولوگيا ءپانى مۇعالىمى ءارى مەكتەپ ديرەكتورى بيبىگۇل كوشەكوۆانىڭ ەڭبەگى وتە زور. ش.ءۋاليحانوۆ اتىنداعى كوكشەتاۋ ۋنيۆەرسيتەتىنىڭ وقىتۋشىلارى مەن كوكشەتاۋ ءسۇت زاۋىتى قىزمەتكەرلەرىنىڭ قولداۋىمەن جاسالعان بۇل جوبا بولاشاقتا ۇلتتىق برەندكە اينالىپ, ەل يگىلىگىنە جارايدى دەگەن سەنىمدەمىز.
ب.بەكەتاي,
ديرەكتوردىڭ بەيىندى وقىتۋ
جونىندەگى ورىنباسارى
اقمولا وبلىسى