فورۋمنىڭ اشىلۋىندا ءسوز العان قازاقستان پرەزيدەنتى جانىنداعى «قوعامدىق كەلىسىم» رەسپۋبليكالىق مەملەكەتتىك مەكەمەسىنىڭ ديرەكتورى ساتتار ءماجيتوۆ ەلوردانىڭ ماڭىنداعى تابيعاتى اسەم مەكەندە ەلىمىزدىڭ ءار ايماعىنان جالىندى جاستاردىڭ جينالعانىنا قۋانىشتى ەكەنىن ءبىلدىرىپ, بۇل باسقوسۋ ولاردىڭ كوشباسشىلىق قابىلەتتەرىن شىڭداپ, تۇلعا رەتىندە قالىپتاسۋىنا سەپتىگىن تيگىزەتىنىن ءسوز ەتتى. ءسويتىپ قازاقستان حالقى اسسامبلەياسى ءتوراعاسىنىڭ ورىنباسارى جانسەيىت تۇيمەباەۆتىڭ ىستىق لەبىزىن جەتكىزدى. ونىڭ ءسوزىندە 2018 جىلى «جاڭعىرۋ جولى» رەسپۋبليكالىق جاستار قوزعالىسى ءدال وسى فورۋممەن قانات قاعىپ, بۇگىندە ءبىراز باستامانى جۇزەگە اسىرعانى ايتىلعان. ءبىر جىلدىڭ ىشىندە اتالعان جاستار قوزعالىسىنىڭ 17 وبلىس پەن قالالاردا شتابتارى اشىلىپ, قازىر 5 مىڭعا جۋىق جاس بەلسەندى جۇمىس ىستەپ جاتىر ەكەن. جاستار كۇشىن بىرىكتىرگەن بۇل ۇيىم بيىل ءبىرشاما ىرگەلى جوبالار وتكىزۋدى جوسپارلاپ وتىر. سولاردىڭ قاتارىندا «الەۋمەتتىك حاكاتون», «اۋىل اكىمى بولعىم كەلەدى!», «جاستار سينەرگياسى» جوبالارى بار.
ودان كەيىن قازاقستان حالقى اسسامبلەياسى توراعاسىنىڭ ورىنباسارى شەرزود پۋلاتوۆ ورتاعا شىعىپ, وسىندا جينالعان كوشباسشى جاستاردىڭ دوستاسۋى بىرلىگىمىزدى ارتتىرىپ قانا قويماي, ءار ءوڭىردىڭ دامۋىنا دا ۇلەسىن قوساتىنىن ايتتى. ويتكەنى مۇندا ايتار ويى, بولىسەر تاجىريبەسى بار جاستار ءبىر-بىرىمەن پىكىر الماسىپ, ءوز ايماقتارىنا تىڭ يدەيامەن ورالادى.
«ىنتىماعى جاراسقان, ءبىرلىگى مىعىم, تۇراقتى ەلدە عانا دامۋ, العا جىلجۋ بولادى. ءبىزدىڭ الدىمىزعا ماڭگىلىك ەل بولۋعا, الەمنىڭ دامىعان 30 ەلىنىڭ قاتارىنا قوسىلۋعا باستايتىن ۇلى ماقسات بار. بۇل جولدا جاستاردىڭ ءرولى وتە ماڭىزدى. سوندىقتان دا ەلباسى جاستارعا ۇنەمى ەرەكشە كوڭىل ءبولىپ كەلەدى. ونىڭ ءبىر دالەلى – بيىلعى جىلدىڭ جاستار جىلى دەپ جاريالانۋى. سونىڭ اياسىندا ۇيىمداستىرىلىپ وتىرعان بۇل الاڭنىڭ مۇمكىندىكتەرىن بارىنشا پايدالانىپ قالۋ كەرەك. جاستار وزدەرىنىڭ قابىلەتتەرىن بايقاتىپ, جاقسى قىرلارىن اشىپ كورسەتسە, ءبىر-ءبىرىنە تەك جاعىمدى اسەر قالدىرادى, الماسقان يدەيالارىن ءوز وڭىرلەرىندە جۇزەگە اسىرۋعا تىرىسۋ قاجەت. سونداي-اق مەملەكەتتىك ءتىلدىڭ مارتەبەسىن كوتەرۋگە باسا ءمان بەرۋىمىز ءتيىس. سەبەبى قازاق ءتىلى ءبىزدىڭ ءبىرلىگىمىزدى ودان سايىن بەكىتە تۇسەدى», دەدى ش.پۋلاتوۆ.جاستارعا جاڭا مۇمكىندىكتەر اشۋدى ماقسات ەتكەن فورۋمدا ەل ايماقتارىنا قوسا, شەت مەملەكەتتەردىڭ دە وكىلدەرى بوي كورسەتتى. اتاپ ايتساق, «مى – روسسيانە» رەسەي حالقى جاستار اسسامبلەياسى قوعامدىق قوزعالىسىنىڭ ءتورايىمى دينا گروماتيكوپولو مەن سول ۇيىمنىڭ ومبى ايماعى بويىنشا توراعاسى ەرمەك حاپيزوۆ, قىرعىزستان حالقى جاستارى اسسامبلەياسىنىڭ وكىلى نۋرسۋلتان بەيشەباەۆا جانە ۋكراينالىق, ل.گۋميلەۆ اتىنداعى ەۇۋ-دىڭ ساياساتتانۋ كافەدراسىنىڭ دوكتورانتى رۋبان سۆياتوسلاۆ قاتىسىپ, ءوز ەلدەرىندەگى جاستار ءتاجىريبەسىمەن ءبولىستى.
الماتى قالاسىنداعى «قوعامدىق كەلىسىم» رمم ەتنومادەني بىرلەستىكتەرمەن جۇمىس ىستەۋ ءبولىمىنىڭ باسشىسى ولگا كولەسنيكوۆا «جاستار جىلى اياسىندا ءوتىپ جاتقان بۇل فورۋمنىڭ بەرەرى مول. مۇندا ءبارىمىز ءبىر-بىرىمىزبەن تانىسىپ, وي ءبولىسىپ, تاجىريبە الماسىپ جاتىرمىز. فورۋمنىڭ ەرەكشەلىگى سول, قاتىپ قالعان جيىن فورماتىندا ەمەس, ەركىن, ويىن-ساۋىق, دەمالىس رەتىندە ءوتىپ جاتىر دەۋگە بولادى. مىسالى وڭتۇستىكتەن كەلگەن جاستار ءوز وڭىرىندەگى ءار ەتنومادەني بىرلەستىكتەردىڭ ۇلتتىق بيلەرىنەن فەستيۆال ۇيىمداستىردى. ءبىز دە ءوز قالامىزدا وسىنداي ءىس شارا ءوتكىزسەك دەپ وي تۇيدىك. ال ءبىز ەرىكتىلەر ليگاسىنىڭ ءتاجىريبەسىمەن بولىسەمىز. بۇل – ءارى جاستاردىڭ, ءارى ۇلتتاردىڭ ءبىرلىگىن جاراستىرعان فورۋم» دەدى.
ال شىعىس قازاقستان وبلىسى بويىنشا جەتەكشىسى راۆين يۋنۋسوۆ بۇل فورۋم بيىلعى جاستار جىلىنا ۇلكەن كوڭىل ءبولىنىپ وتىرعانىنىڭ ءبىر كورىنىسى ەكەنىن ايتادى. ول شىعىستا ۇلى دالا ەلىنىڭ قىرلارىن اشىپ كورسەتۋ ءۇشىن قاسيەتتى ورىندارعا ەكسكۋرسيالار ۇيىمداستىرىلىپ, كورشى وڭىرلەرگە دە ساپار شەگىپ تۇراتىندارىن, سوسىن باسقا وڭىرلەردەن ەرەكشەلىگى وبلىستا 14 دوستىق ءۇيى بارىن جەتكىزدى.
«جاڭعىرۋ جولى» جاستار قوزعالىسىنىڭ اقتوبە وبلىسىنداعى وكىلى اسلان ءابۋوۆ: «وسىدان ءبىر جىل بۇرىن الماتىدا, الاتاۋدىڭ باۋرايىندا جاستار «بىرلىك» اتتى لاگەردە باس قوسقانبىز. مىنە بيىل مامىراجاي مامىردا ەلوردانىڭ شەتىندە, تابيعات اياسىندا تاعى دا جينالىپ وتىرمىز. قايتا قاۋىشقانىمىزعا وتە قۋانىشتىمىز. مۇندا ناعىز كوشباسشىلار كەلگەنىن ءبىرىنشى كۇننەن-اق بايقاپ جاتىرمىز. بۇل بارلىق وبلىستىڭ جاستارىن جاراستىرىپ, ەلدىڭ ءبىرلىگىنە جۇمىلدىراتىن جاقسى جوبا بولدى. جاستار جىلى ەلدى تۇتاستىققا, ىنتىماققا ۇيىستىراتىن يگى ءىس-شارالارعا باستاماشى بولۋدا. بۇگىنگى فورۋمنان ءبىز وڭىرىمىزگە جاڭا يدەيالارمەن, تىڭ ەنەرگيامەن ورالامىز», دەيدى.
جالپى, جاستار قوزعالىسىن دامىتۋعا جانە جاستار ساياساتى توڭىرەگىندەگى جاڭا جوبالاردى ىسكە اسىرۋ جولدارىن قاراستىرۋعا مول مۇمكىندىك تۋعىزعان فورۋمدا قاتىسۋشىلار «جاستار جىلى» جول كارتاسى جوباسىنىڭ ءجۇزەگە اسۋى جونىندە كەڭىنەن تالقىلادى.