نۇر-سۇلتان قالاسى اكىمىنىڭ شەشىمىمەن ەلوردا تۇرعىندارىنىڭ ءومىر ساپاسىن جاقسارتۋ ماقساتىندا كەشەندى جوسپار ازىرلەنگەن. ونىڭ ىشىندە كوممۋنالدىق قىزمەت تولەمدەرىنە كومەك, مۇمكىندىگى شەكتەۋلى جانداردى الىپ جۇرەتىن ادامداردىڭ جولاقىسىن تولەۋ, ءمۇمكىندىگى شەكتەۋلى بالالارعا كومەك كورسەتۋ, كوپ بالالى وتباسىلار بالالارىنىڭ كوللەدجدە تەگىن وقۋى, تۇرعىن ءۇي سەرتيفيكاتتارى, كوپ بالالى وتباسىلارىنىڭ مەكتەپ, كوللەدجدە وقيتىن ستۋدەنتتەرىنىڭ جولاقىسىن تولەۋ, كوپ بالالى وتباسىلارىنىڭ بالالارىن مەكتەپتە تەگىن تاماقتاندىرۋ, ساۋىقتىرۋ لاگەرلەرىنە جولداما بەرۋ, مەكتەپ فورماسى مەن كانتسەلياريالىق تاۋارلارمەن قامتاماسىز ەتۋ, ت.ب. كومەك تۇرلەرى بار.
الەۋمەتتىك تۇرعىدان از قامتىلعان جانە كوپ بالالى وتباسىلاردى قولداۋ ءۇشىن قوسىمشا 13 شارا قولعا الىنىپ, وعان 6,5 ملرد تەڭگە ءبولىندى.
بيىل نۇر-سۇلتان قالاسىندا الەۋمەتتىك سالاعا بولىنگەن قارجى سوماسى 150 ملرد تەڭگەنى قۇراپ وتىر. 2019 جىلدىڭ ءساۋىرىنەن باستاپ قالاداعى ەمحانالاردا ءار سەنبى سايىن كوپ بالالى وتباسىلاردى قابىلداۋ ۇيىمداستىرىلعان. مۇمكىندىگى شەكتەۋلى بالالاردىڭ ۇيلەرىنە بارىپ كومەك كورسەتۋگە قاراستىرىلاتىن قارجى 6,5 اەك-تەن 10 اەك-كە (25250 تەڭگە) دەيىن ارتتى. بۇل شارا بويىنشا 228 ادامدى قامتۋ كوزدەلىپ وتىر. سونىمەن قاتار ءبىلىم بەرۋ قورىنان دا الەۋمەتتىك كومەك الۋعا بولادى.
جەرگىلىكتى اتقارۋشى ورگان الەۋمەتتىك از قامتىلعان وتباسىلاردى جان-جاقتى قولداۋ ءۇشىن 30-دان استام تولەم جۇرگىزۋدى قولعا العان. بۇل ماقساتقا بولىنگەن قارجى – 12,2 ملرد تەڭگە. باسپانا ماسەلەسىن شەشۋگە تولەنەتىن تولەمدەر ورتاشا العاندا 18%-عا ارتتى, ول ءۇشىن تاعى 34 ملن تەڭگە ءبولىنگەن. كوپ بالالى 1300 وتباسى مامىر ايىندا قونىس تويىن تويلايدى. 1300 ءبىلىم بەرۋ, دەنساۋلىق ساقتاۋ سالاسى مەن پوليتسيا دەپارتامەنتى قىزمەتكەرلەرىنىڭ باسپانا ماسەلەسىن شەشۋگە 2 مىڭ تۇرعىن ءۇي سەرتيفيكاتىن بەرۋ كوزدەلگەن.
جەرگىلىكتى بيۋدجەت ەسەبىنەن الەۋمەتتىك ءالسىز توپقا قوسىمشا قولداۋ كورسەتىلەتىن بولادى. الەۋمەتتىك جوبا اياسىندا اۋتيزممەن اۋىراتىن بالالارعا ارنايى قىزمەت كورسەتۋ ءۇشىن بيۋدجەتتەن 40 ملن تەڭگە قاراستىرىلعان. قازىرگى تاڭدا نۇر-سۇلتان قالاسىندا 100-دەي بالاعا وسىنداي كومەك كورسەتىلەدى.
جۇمىسپەن قامتۋ باعدارلاماسى اياسىندا 2019 جىلى 1,2 ملرد تەڭگە ءبولىندى. سونىڭ ناتيجەسىندە قوعامدىق جۇمىسقا تارتىلاتىن ازاماتتار سانى 500-دەن 1 مىڭ ادامعا دەيىن ارتادى. قوعامدىق جۇمىستارمەن قامتاماسىز ەتىلگەن ادامداردىڭ جالاقىسى 48 مىڭنان 84 مىڭعا دەيىن كوبەيدى.
مايگۇل سۇلتان,
«Egemen Qazaqstan»