1979 جىلى ىسكە قوسىلىپ, بۇگىندە توزىعى جەتكەن ورال قالاسىنىڭ حالىقارالىق اۋەجايىنا قايتا جوندەۋ جانە كەڭەيتۋ جۇمىستارى بيىل شىلدە ايىندا باستالادى. جوسپار بويىنشا 2020 جىلدىڭ سوڭىندا اياقتالۋى ءتيىس قۇرىلىستىڭ ناتيجەسىندە, تەرمينال كولەمى 4 مىڭنان 7 مىڭ شارشى مەترگە دەيىن كەڭەيەدى. قازىرگى ۋاقىتتا تەرمينالدىڭ وتكىزۋ قابىلەتى – ساعاتىنا 200 جولاۋشى بولسا, جوندەۋدەن كەيىن 400-گە دەيىن جەتەتىن بولادى. قازىر جىلىنا 160 مىڭ جولاۋشىعا قىزمەت كورسەتىلسە, بولاشاقتا اۋەجاي 350 مىڭ جولاۋشىنى قابىلداپ-شىعارىپ سالۋعا مۇمكىندىك الادى.
قازاقستان پرەزيدەنتى اۋەجاي تەرمينالىن قايتا جوندەۋ باتىس قازاقستان وبلىسىندا جايلى ينۆەستيتسيالىق كليمات قالىپتاستىرۋدىڭ العىشارتى ەكەنىنە توقتالدى.
– ورال – ەۋروپاعا شىعاتىن باستى قاقپامىز. شەتەلدىك ينۆەستيتسياعا تارتىمدى بولۋ ءۇشىن مۇنداي جوبانى ساپالى ءارى ۋاقتىلى ورىنداۋ كەرەك, – دەدى قاسىم-جومارت توقاەۆ.
ورال حالىقارالىق اۋەجايىن قايتا جوندەۋ جۇمىستارىنا بيزنەستىڭ الەۋمەتتىك جاۋاپكەرشىلىگى اياسىندا «قاراشىعاناق پەتروليۋم وپەرەيتينگ» كومپانياسى 2,4 ميلليارد تەڭگە بولگەن.