ءبىر جەرىمىز اۋىرا قالسا الىپ ۇشىپ كىمگە بارامىز؟ ارينە, ەمحاناعا, دارىگەرگە جۇگىرەمىز. سولاردان كومەك سۇرايمىز. ال جىلىنا ءبىر كەلەر ايشىقتى مەرەكەدە تىرشىلىككە كۇرەتامىر بولعان ىزگىشۋاق جانداردى مەرەكەسىمەن قۇتتىقتاۋ يگى داستۇرگە اينالسا قۇبا-قۇپ. بيىل الماتىدا وسىنداي باستاما قولعا الىندى. اتاۋلى مەرەكەگە وراي الماتى قالاسى, №9 قالالىق ەمحاناسىنا بەلگىلى ءانشى باقىت شاداەۆا ەم الۋعا ەمەس, اق حالاتتى ابزال جانداردىڭ كۇندەلىكتى قىزمەتىمەن تانىسىپ, ولاردى قۇتتىقتاۋعا ارنايى كەلدى.
ەسترادا ءانشىسى ءبىر كۇنىن مەيىربيكە قىزمەتىنىڭ قىر-سىرىن اشۋعا ارنادى. اق حالاتتى كيىپ الىپ ەمدەلۋشىلەردى قابىلداپ, مەيىربيكەنىڭ ءبىر كۇندىك جۇمىسىمەن تانىستى. ومىرگە ءسان, تىرشىلىكككە ءنار بەرىپ, قوعامعا قالتقىسىز قىزمەتىن ۇسىنىپ, مەيىرىمدىلىك پەن جىلىلىقتىڭ سيمۆولىنا اينالىپ, يگىلىكتى ماماندىق يەسى اتانعان مەيىربيكە ءىسى قاشاندا سىي-قۇرمەتكە لايىق ەكەنىنە كوز جەتكىزدى.
«حالىق دەنساۋلىعىن جاقسارتۋ, مەديتسينالىق قىزمەت ساپاسىن ارتتىرۋ, حالىقتى قولجەتىمدى مەديتسينامەن قامتاماسىز ەتۋ, مەديتسينالىق العاشقى جاردەمدى جەتىلدىرۋ, انا مەن بالا دەنساۋلىعىن قورعاۋ, اۋرۋدىڭ الدىن الۋ باعىتىنداعى سكرينينگتىك تەكسەرۋلەر, تۇرعىنداردى سالاۋاتتى ءومىر سالتىنا باۋلۋ, باسقا دا قانشاما شارالاردىڭ جۇزەگە اسىرىلۋىنداعى مەيىربيكەلەردىڭ قىزمەتتىك مىندەتتەرى, ناۋقاستى قابىلداعاننان باستاپ, ونى ەمدەۋ بارىسىنداعى بارلىق كۇيبەڭ تىرشىلىكتىڭ بەل ورتاسىندا جۇرەتىن مەيىربيكەلەر ەڭبەگى شىنىندا ۇشان-تەڭىز. مەنىڭ بۇگىنگى كۇننەن جاساعان قورىتىندىم وسى» -دەيدى ول.
بەلگىلى ءانشى مەيىربيكەلەردىڭ مەرەكەسىنە ارنالعان سالتاناتتى جيىنعا قاتىسىپ, №9 قالالىق ەمحاناسىنىڭ باس دارىگەرى اسەم مۇراتقىزىمەن بىرگە قىزمەتكەرلەرگە العىس حاتتار تابىستادى. ءسوز سوڭىندا, حالىقارالىق مەيىربيكەلەر كۇنى مەرەكەسىمەن قۇتتىقتاپ, «ەرەن ەڭبەكتەرىڭىزدىڭ جەمىسىن كورىپ, ۇلت ساۋلىعى جولىندا ايانباي ەڭبەك ەتىپ, بيىك بەلەستەردى باعىندىرا بەرىڭىزدەر» دەگەن تىلەگىن جەتكىزدى.